Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Здоровье

Н.А.Ярцева: «Шить каршеса ащекшнеда маштозь»

Ульцяса азорондай кизось. Ламонцне тя пингоня срхксихть моряв, шинь сюролдатнень ала эжендема. Арьсят, бта мезеньге кальдяв тянь эса аш, нльне меколанкт,—шинь пидеф киськсь арси шоколад лангс шарфты мазы тюсонь, мезть вельде кяшендевихть сембе аф сатыксне. Тяда башка, ультрафиолетсь касфнесы верса серотонин веществать лувксонц, кона отвечай цебярь настроениять инкса. Стане жа шинь сюролдатне лезнихть касфнемс организмаса D витаминть, кона кемокснесыне пейхнень, пакарьхнень и эзнятнень. И нинге. Шить ала пицевомста ломанть кемоксни  иммунитетоц, а сяс кельмофтевоматне арсихть теенза аф сяшкава пельксокс. Тя сембось тяфта, кда ащекшнемс шить каршеса маштозь. Лиякс, цебярь вастс организмати тиеви оцюдонга оцю зиян.  Кода аф нолдамс тянь, а стане жа мезьса пелькссна солярийхнень и  лиянь колга корреспондентоньконь мархта корхнемста азондсь Мордовскяй республиканскяй кожно-венерологическяй диспансеронь врачсь-дерматовенерологсь Н.А.Ярцева.
—Наталья Александровна, азк лувиеньконди, кода кизонь пси шитнень вятемс пряцень ульцяса, пиди шить ала?
—Штоба аф тиемс зиян организмати, шить ала сяда пара ащекшнемс шобдава 10 частти молемс и обедта меле 16 частта меле. Кда сави лама пингс ащемс шинь сюролдатнень ала 10 частста сявомок 16 частти молемс, обязательна вадендесть киськть шида аралай кремса. Тиема тя пяле частта ульцяв лисемда инголе. Крем кочкама стама, кона аф теждяста штави ведьса. Тяда башка,  тяда юксне щамс шида аралай сельмованомат. Синь лац араласазь сельмокерхнень и щека пакарьхнень ультрафиолетть эзда. Азома сявок, што кда кизоньберьф каннемс тяфтама сельмованомат, ули кода перямс кить сельмокеронь киськть пингта инголе сиредеманцты, срмафкснень эвондамаснонды.
—Мекольдень пингть тевс келиста нолявихть солярийхне, коса  теждяста и нюрьхкяня пингста ули кода тюжалгофтомс киськть. Мезе азолеть синь колгаст?
—Койсон, тяниень пингть синь ушедсть лисендема модаста. И тя пяк пара. Ламонцне эльбядезь арьсихть, бта солярийсь сяда аф пелькс шинь сюролдатнень коряс. Афкукс тевсь ащи лиякс. Солярии якамста кафтонь-крда касонды киськонь раконь эвондамань пелькссь, сяс мес лампатне нолнихть UVA спектрань волнат, а ня лучне сембода пельксне. Содаф, што солярии 35 кизонь топодемс якай колма ломаттнень еткста кафттнень эвондакшни киськонь онкологическяй урма. Кда эряфоньберьф хуш весть молемс солярии, киськонь раконь пелькссь касонды 20 процентта. Сядонга пелькст солярийхне валда киське мархта ломаттненди.
—Наталья Александровна, азонтк, пожалуйста, кода эвондакшни тя пелькс урмась и кода няфнесы прянц?
—Киськонь ракть, кода и целайнек онкологическяй урматнень эвондамаснонды туфталсь мзярс аф содаф. Медицинати аф шарьхкотьф, мес фкя пингста клеткатне ушеткшнихть вятема пряснон аф стане, кода фалу, синь, бта, пяляскоткшнихть, ушеткшнихть апак лотксек касома, арсихть злокачественнайкс. Ули кода азомс аньцек сянь, мезе аф эряви тиендемс, штоба аф виияфтомс киськонь раконь эвондамань пельксть. Васендакиге азома ся, мезень колга мольфтевсь корхтамась ушетксса—шить ала ащекшнемась. Ков сяда ламос ломанць ащекшни ультрафиолетовай излучениять ала, тов сяда оцю урмань эвондамань пелькссь. Сяда сидеста киськонь ракса сярятькшнихть велень хозяйствань профессиянь представительхне, калонь кунцихне и ломаттне, конатненди сашендови лама ащекшнемс ульцяса. Тяда башка, киськонь раковай патологиятненди срхкафтыкс арсихть химическяй веществатне, кда синь повондыхть киськть лангс, рентгеновскяй излучениясь, шачема тяштенятнень (родинка) киськордавомасна-токавомасна и стак тов. Киськонь раксь стане жа етни и наследствас коре.
Киськонь ракть шарьхкодемац аф стака, кда улемс внимательнайкс  эстейть. Урмать ушеткшнемста киськть лангса эвондакшни якстерь  или уле тюсонь тяштеня. Меле сон ушеткшни касома, китнема, а кой-коста и верыяма. Тя случайста эстокиге молема враченди, штоба эсь пингстонза ушедомс пчксемать.
О.Евдокимова.

27.06.2019 №25
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин