Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Наша усадьба

Минь усадьбаньке

Сявать лофцоц кармась вер мархта
—Аф кунара рамаме кафта потяви сяват. Синь лац потявихть, кажнайсь эздост максы 3 литрань лофца. Лофцсна танцти, аш кодамовок шинец. Аф кунара приметаськ, кда лофцсь ащи холодильникса, банкать потмаксса  озайхть веронь якстерь тустт. Мастит лангс тестсь отрицательнай. Сурса щупсезь кодамовок покольнят-таргозьфт аш, одарсна цебярьхть. Кода пчкафтомс сяватнень и можна-аф симондемс тяфтама лофцта?
Т.Соломатина.
—Кда верда башка банкать потмаксса мезевок аш, кепотьксонди—навлат, пакшт—эста туфталсь одаронь веронь лафча саттнень эса. Одарсь оцю и якамста сязендевихть веронь емла саннятне. Тяста эвондакшни лофцса вер. Можна сявати ковшка макссемс тифтень таблетка Аскорутин—весть-кафксть шити. Недяляда меле ни няеви результатсь. Эрь потямда меле одарсь пара вадендемс варикозда кремса (Троксевазин, Венолгон). Ваность, кода потямста фатнесасть потятнень. Уленди стане, мзярда фатневихть аф аньцек потятне, но и одарське. Косот потянь юрхне, самай тоса лама веронь санда. И кда потямста фатнемс потятнень пяк вярде, эста колсевихть-сязендевихть вер саттне. Сяс потямста нолдамат кяттне цютькада алу и сяда аф вииста люпшнема.
 
Куярхне максыхть козя урожай
Меля кочкань куяронь пяк козя урожай. Азондса, кода удалась сатомс тянь. Куярхнень озафнесайне «банкава»: пластиковай 5 литрань сюлекатнень керсесайне потмаксснон и лафту видева вярце пяльксснон, калмосесайне синь модати 5 сантиметрань крхкалмоса и марсян эзост тяфтама шоряфкс:  пангонь касфнемда меле теплицаса лятф торф—1/3 пялькс, перень мода—1/2 пялькс, кулу—1/6 пялькс. Банкатне аф пяшкодемат кафта сурда.
Эрь банкати озафнян куяронь 2-3 лисьф видьме. Панденять кувалмос ладянь арматураста каркас и повфтань 10х10 размерса пластиковай сетка.
Куярхнень тяфта касфтомасна лезды: 7-10 шида сяда рана получамс урожай; карьхцямс сяда кржа ведь (аньцек 0,5 литра шити)—ведсь аф шуди ширева, а повонды унксненди, аш прябалат сор тишетнень мархта.
А нинге нолнеса тевс кшинь шапафтомать. Куярхненди тя инь цебярь удобрениясь! Анокламац пяк теждя. Равжа кшинь кувоняса пяшкотькшнеса ведаркать 2/3 пяльксонц, кайсян лангозост ведь и матросесайне мезеньге стакаса, штоба кувонятне афольхть кеподе вяри. Ведаркать кадондса ащема лямбе вастса недяляс. Шапафтомать шорсеса ведь мархта (1:3) и валондсайне куярхнень унксснон алу—0,5 литрань эрь кусторксть алу.
 
Кода тюремс колорадскяй унжать каршес
Ушеткшни модамарень копанямась. Тяка пингть эряви кярьмодемс колорадскяй унжать каршес тюремати. Унжать машфтоманкса ули несколька метод.
Механическяй методсь—тя унжать кядьса кочксемац, а меле машфтомац. Лац-ряц  ванондомат аф аньцек касыксне, но и перьфкаст модась.
Почфсь. Пркшасть модань участкать ведьса, а меле почедость почфса. Или учеда цебярь роса и почедость участкать почфса сонь ланганза. Унжатне тяда меле эвондайхть аф курокста.
Кулусь. Ули кода панжемстонза модамарьть почедомс сифтемня пачк кулуса. Тиендемс тяфта, мзярс касыксне аф лоткайхть панжемда. Стане жа можна пркшамс модамарень кусторкснень сапонень и кулувонь растворса. Килограмма кулуть лакафтомс 15 минута 10 литрат ведьса, кадомс ащема кафта шис, меле педямс и шовордамс эзонза хозяйственнай сапонень пялькскя, кона тяда инголе шовама теркаса. Шорямс, каямс нинге 10 литрат ведь и пркшамс касыкснень.
Колорадскяй унжатнень эвфтеманкса можна модамарьть перьфке озафтомс календула, бобовай культура или чеснок. Стане жа модамарьть еткова ули пара озафтомс мзярошка тяфтама касыкс.

27.06.2019 №25
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин