Поиск по сайту: 
 

Архив
 февраль 
 2020 
пн вт ср чт пт сб вс
     12
3456789
10111213141516
17181920212223
242526272829 

 
 

 

Юмор и сатира

УЦЕЗ НОРМАЛЬХТЬ

Сенем автобусста, кода крня, кеворсь алняня эчке аля. Сенем трикоса, акша картузса. Тя—«Пиже тарад» садоводческяй обществань дачниксь Пихтельков. Недяляньберьф ни ашель «умасонза». Улема, тянемс кенерсть ни тоса нормалензовок.
Кяльсь алясь дачанц шири и арьсесь: дачась бта ваймама васта, а мзяра ливозьда шудефни азоронц копорьста! Тунда каймоса урафтома: модась шувондома, тиендемат панденят, шурьхкянек-пурьхкянек путомат. Сяльде мотыгаса ляпопнема сембе путф-озафнеф вастсь. Тоса тяфта «ваймосезь» сембе ваймама шинзон ётафнезень.
И тага ваймама шиц... Кепотьф мяльса алясь аськоляй. Вона дачань кудняцка, сенемста архнеф перяфкссь. Маладсь кенкшкяти и мезе Пихтельков перяфкскять вельф няи? Нормалень панденянзон ланга комада якай эчке катля ава, кептерезонза кочкай кстыхть. Ва авась видемсь, пушкстсь, нардазень конястонза ливозензон эчке кядьзяярьса и тага комась. Пихтельков шуфтомфста ащесь кенкшкять маласа и ванць, ванць—ашезь веронда эсь сельмонзонды. Тя дачась, сонне шта? Кда сонне, Пихтельковонь, мес ина тяса тя эчке катля авась? Ожука, а коста, шта, сонь Пихтельков тяда инголе няендезе? Пяк ни содаф шамац. Коняц тяйняня, щеканза уфафт, шалхкоц лапш. А-а! Лядьсь Пихтельковонь мяльс. Тя авать сон васьфнезе базарса. Тоса мишенкшни шурьхкат-пурьхкат, нормальхтьке.
И мишенкшнесыне аф питниста. Ломаттне теенза рамама очередьса эцекшнихть.
Валом-валом Пихтельков сась эсезонза. Сон лятфтазе: мелямбавок весть кати-кие панденястонза кочказень кенерьф нормалензон. Афоли тя авась... Пихтельков хуш алняня, а вайгялец бта атя мациень. Сарду. Эсток кенкшкять маласта, сенем штакетниконь байдеконятнень вельф пшкядсь:
—Шумбрат, щакай!
Ся юп!—видемсь. Эводезь варжакстсь вайгялень максыть шири, валоц аф азови.
—Кода урожайсь? Удалаф?—тага пшкядсь Пихтельков.
—Удалаф. А мес аф удалаф?
—Няйса, кептерцень пцтай пяшкодить. Тон аф мисайть тейне кочкаф нормальхнень? Мон пяк кельгса нормалень варениять.
Авась седиень озазь нардазе улонц:
—Монга кельгса стамть. Но кда пяк мяльце, мисайне нятнень.
—Мзяра кептерь нормаленкса анат?
Авась азсь аф сяшкава ни оцю питне. А Пихтельков:
—Эх, тняра ярмак аш мархтон. Аре ошу пялон. Тоса и тихтяма мархтот расчет. Пяк ни нормальхне цебярьхть. Оцюфт. Якстерьхть. Нать, лац валонкшнить-мезе.
—Мезе ульсь—ся ульсь. Аде ошу. Пялот. Тейне сякокс синь коса-аф коса мимат.
Дачань азорсь и нормальда пяшксе кептерь мархта эчке катля авась ряцоконе тусть ошть шири. Молембачк авась кептеренц сявондезе то фкя кядезонза, то омбоцети. А Пихтельков аськолясь вакссонза тёждяста.
Молихне пачкодсть автобусонь лотксема вастти, озасть автобусс. Ардсть аф прокс ламос. И пачкодсть. Пихтельков сувафтозе авать квартиразонза. Ся путозе стака кептеренц киякс кучкав, сонць пушкснезь озась стулня лангс...
Пихтельков озась каршезонза и корхтазевсь:
—Пяк ни уцезста нормальхнень мишендьсайть. Мес тяфта?
—Эрь минь аф скупойхтяма, а кда мяльце—макст сяда оцю питне.
Пихтельков ётась омба комнатав и аф лама пингта меле тоста лиссь милиционеронь щамса. Казямста пшкядсь:
—Мон ня нормальхнень инкса аф пандан кодамовок питне, сяс мес касфнине-валондыне монць. А тон мес лиянь дачава урожайхть кочксят?
Авась трнатозевсь. Пелезь-эводезь то кенкшть шири варжаксты, то милиционерть лангс...
Михаил МОИСЕЕВ.

27.06.2019 №25
 
 
 

 
НОВОСТИ
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин