Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

МОСКУТЬ ВЕЛЬХКССА ТАГА КАЙГСТЬ МОКШЕНЬ И ЭРЗЯНЬ МОРОТНЕ

 «Москуса аф кржа земляктонк, а стане жа лия региоттнень эзда эрзяда и мокшеда, конат тонафнихть и работайхть столицаса,—мярьгсь корреспондентоньконди Российскяй Федерациянь Президентть видеса Мордовия Республикать Постояннай представительстванц Мокшэрзянь культурань центранц директороц Л.В.Круглова,—«Шумбрат» мокшэрзянь праздниксь ётафтови кафксоцеда. Минь, васендакиге, ёратама, штоба мокшетне и эрзятне афольхть юксне этническяй юрснон колга, штоба коль сяда лама ломань содаль мокшэрзятнень национальнай койснон-обуцяснон, ярхцамбяльснон, щамснон-карямснон колга и няелезь тянь семботь».

«Шумбрат» мокшэрзянь национальнай праздниксь ушедозе кинц 2012 кизоня, сяс Москуса эряй мокшетне и эрзятне тонадсть теенза. Сон арась земляконь мархта васетькшнема, лажатфонь ётафтома, ялгань мархта няема вастокс.

Тяддевок инжихненди аноклафоль мялень салай, козя программа. Аф ваномок пиземть лангс, сембе васьфтьфтольхть праздничнай площадкать лангса. Мольсь Мордовия Республикань прикладной искусствань и ремеслань—куйгорста, сёвоньцта, шуфтста, сюреса сёрматф изделиянь, мокшэрзянь някань, сувениронь мишендемась. Тяда башка, ульсь кода варжамс и рамамс мокшэрзянь масторса тиф колбасат, сырхт, конфетат-месть. Ётафтовсть шуфтть ланга керсемать, сюреса сёрмадомать, кодамать коряс мастер-класст.

Работасть Мокшэрзянь народнай налхксемань, кона каннесь «Тюштянь налксемат» лем и «Морак, гармония» площадкатне. Кулевсть морот, сиде моронят.

Шить кучкаста ётась праздникть торжественнайста панжемац.

Вятезь концертть мокшень стирсь Елена Помозова (Алямкина), конань лемоц лац содаф лувиеньконди и Мордовия Республикань Заслуженнай артистсь В.Л.Исляйкин. Елена Анатольевна—Мокшэрзянь землячествать сембе пуромксонзон вятисна. Тяда башка, пяк мазы вайгялец. Най кулхцондолеть эсонза!

Праздникс пуромфненди приветствиянь валхт азсть Мордовия Республикань Правительствать Председателенц заместителец—Российскяй Федерациянь Президентть видеса Мордовия Республикать Полномочнай Представителец В.И.Чиндяскин, Моску ошень Национальнай политикань и  межрегиональнай связень Департаментть Национальнай политикань отделонц начальникоц Д.Э.Утлик, Мордовскяй Митрополиять оцюняц, Саранскяй и Мордовскяй Митрополитсь Зиновий, Финно-угорскяй народонь культурань Поволжскяй центрать Исполнительнай директороц Р.И.Акашкина.

Ульсь «Ялгаксшинь хоровод» флешмоб, конань пингста менельти нолдафтольхть разнай тюсонь уфамнят. Тя лемтьфоль нароттнень ёткса ялгаксшити и фкя-фкянь шарьхкодемати.

Флешмобть поладозе концертнай программась. Эзонза сувсесть Москувонь, Мордовиянь артисттнень, фольклорнай коллектифнень выступлениясна, весяла конкурст и пялькстомат. 

Сценать лангс лисендсть «Эх, мордовочка», «Бояраваня»,  «Азорава», «Тяштеня», «Эрзянь вайгель» и лия фольклорнай коллектифне, «Эрязат»  фольклорнай группась, Гнесситтнень лемса музыкань  Академиянь студенттне Н.Каяцкий, И.Шишканова, «Азорава» ансамбльть солисткац А.Пиксайкина, «Колопинские голоса» дуэтсь, «Губерния» группась.

 Оцю казнекс арась Россиянь и Мордовиянь Народнай артисткать А.Н.Куликовать выступленияц. Праздникса ульсь «Синяя птица» Всероссийскяй конкурсса сяськись В.Шумкин, конань выступленияц стане жа тусь пуромфнень мяльс.

Пцтай шобдати Кузьминки паркса кайгсть морот, сиде моронят, кулевсть гармониять и музыкальнай лия инструменттнень вайгяльсна. Ломаттне «Шумбрат» праздникса ськамостольхть, семьяснон, ялгаснон, содафснон мархта. Оцю мяльса ванондозь мишендеви товархнень, рамсезь синь, а стане жа варчсезь национальнай ярхцамбяльхнень, тифнесть лятфнембяленди фотографият.

Шумбрат валть азомста эрсь эздонк арьси ломанти шумбраши, паваз, пара эряф. Пяк ламоксть сон азфоль 29 июньцта Москувонь Кузьминки паркса. Шумбракснесть фкя-фкянь мархта русне, мокшетне, эрзятне, татархне, лиятне.

Ули кода азомс, што «Шумбрат» праздниксь кемоста сувась Москувонь мокшетнень и эрзятнень эряфс.

Т.Альшина.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022