Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Наша семья

КАФКСА ИДЕНЬ ТЯДЯ

—И коста аньцек вийхнень сявондьсайть?—кизефнеса Прасковья Павловнань.

 

—Тя аньцек одста няеван,—шутендазь азозе мокшавась.—А кизоне ни бабань. Кизос коре ялгане ой да вай, эряфкшу ломанькс тиендихть. А мон старандан аф макссемс пря урматненди. Фалу тев мархтан, фалу ломань етксан.

 

И виде. Прасковья Павловна ся ломаттнень эзда, кона тевфтома аф ащекшни. Атерень кинь строяма участкати макссь нильгемоньда лама киза. Тусь пенсияс 50 кизоса. А покодсь мянь 66 кизозонза. И сонь работац стакадонга стакаль. Строясь од кит, петсь уликснень эса.

 

—Работань лама оцюнянь видеса,—поладозе Прасковья Павловна.—И сембе путнесть честь. Трудозень няендезь, шнакшнезь. А монць конашкава кельгине ДРСУ-ть, коллективть, эсь тевозень. 66 кизода мелевок лиселень работама, но кардамазь идьне.

 

Но тянемс мокшавась «Мордовавтодор» организациять и сонь ломанензон лятфнесыне аньцек шнама валса. Лама киза покодсь С.Н.Андинонь, Я.И.Данинонь, А.Ф.Шумкинонь руководстваснон ала. Мархтонза покодсть Атерень мокшаватне И.Ф.Лемяскина, А.И.Чалдышкина, З.Т.Москвина, М.Т.Равочкина, лиятне. Лац покодеманкса Прасковья Павловна казьф дипломса, Почетнай грамотаса Мордовия Республикань Оцюнять, Правительствать, «Мордовавтодор» республиканскяй объединениять эзда. Аф весть лувондовсь инь цебярькс профессиясонза, сяськикс пялькстомаса и стак тов. Ня казнетнень мархта шнафтыхть пря иденза, уноконза. Тяфтама тядять, щавать, бабать инкса маряйхть оцю гордость. Сон сембонди пример и прянь шнафтома васта.

 

Шачсь Прасковья Павловна 1944 кизонь 24 сентябрьста Атерь велеса. Аляц, П.И.Сараев, войнасоль, няйсь аф кржа нужа. Казьфоль лама боевой орденца и медальса. Сяськикс мрдась куду. Войнада меле шачсть нинге кафкса иденза. Тядяц, Надежда Григорьевна, ульсь трудонь кельги и павазу ломанькс. Шачфтомс вейхкса итть, тонафнефтемс синь, аф кажнайти сафтови. Сембонь лемсна, покодема вастсна аф лятфтавихть. Азса, што Ф.П.Сараев—полковник. Лама пинге  работась Мордовия Республикань прокуратураса. Н.П.Сараев лама киза вятезе Атюрьевскяй райононь велень хозяйствань Управлениять, ульсь райононь оцюняти заместителькс. Вейхкса иттнень эзда кулоф Валентина Павловна. Сараефнень оцю родсна-плямасна, нолдасть крхка ункст шачема-касома модати. Вдь аньцек Прасковья Павловна шачфтсь и касфтсь кафкса итть. Сембонди макссь цебярь образования, воспитания. Сембонь семьясна, идьсна, эряфсна-ащефсна. Кафта стиренза, Анна и Елена, трудендайхть Атерьса. Валерий Петрович эряй и покоди Вольно-Никольск велеса, Светлана Петровна—Ковылкинаса. Лядыксне Москусот. Кемголмува унокоц и уноконь фкя идец. Ужяль, пингта инголе тусь эряфста кельгома мирдец, Петр Петрович. Сон цебярь водителель, шнама ломанель. Атерьса содафоль кода цебярь гармонист. Кодама аньцек иласа  ашель. Морсесь концерт-тнень, фестивальхнень эса и стак тов. Гармониянц инголе кштифнезень аф аньцек эсь раднянзон, но и сембе велеряензон. Морсесь и свадьбаса, и кстингаса, и шачема шинь иласа.

 

Тяни П.П.Надина эряй кирпицьста строяф оцю кудса ськамонза. Сашендыхть иденза, уноконза. Сонцьке сидеста якай ширезост.

 

—Ськамон эрямати аф тонатфан,—виденцясь Прасковья Павловна.—Семьяньке фалу оцюволь. Ингольдень кудсонк эряме мянь кемгафтувонек. Минць миртть-рьват, кафкса иденьке, атяньке-бабаньке. Эряме ладязь, фкя-фкянь шарьхкодезь, тяльгондеме и шра ваксс, ульсть и удома вастт. Тяни кудоньке оцю. Сей етан, ськамонан, тов етан, ськамонан.

 

Ульсь пинге, мзярда пирьфсна пяшксель жуватада. И тракст кирдсть, и букат, и тувот. Тяни Прасковья Павловна кирди аньцек куднармотть, путни переня. Сяка тефне сатыхть. Эряфонц лангс вестевок аф пеняцяй. Сараефнень и Надиттнень родсост-плямасост Прасковья Павловна кельгома ломань, прянь шнама васта, сембоса пример. Эряфоньберьф сон киндивок ашезь тиенде кальдяв, сембонь шарьхкотькшнезень, сембонди лезнесь. Кенкшец панжада сембонди тянемс. Кальдяв киндивок аф арьси. Сембонь шарьхкодьсыне и максы эрявикс советт.

 

И.Вешкин.

 

СнимкаТНЕНЬ Эса: П.П.Надина; Надиттнень семьясна.

 


04.07.2019 №26
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин