Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Культура

ЛЕВЖА ВЕЛЕНЬ АРТИСТКАТНЕ НЯФТЕЗЬ ЭСЬ МАШТОМОШИСНОН ФИННО-УГРАНЬ МЕЖДУНАРОДНАЙ ФЕСТИВАЛЬСА

Мзярда перетне путфт, а урожаень кочкамати пингта ляткшни лама—эста и васьфнемат инжихне, якама фкя-фкянь шири и морсема морот. Карелхне кунардонь тя койти мярьгихть сугуваставунду. Фестивальть сембе пуромксонза етнихть панжада площадкатнень эса, аф ичкозе эрьхкнень, ведть, мазы перьфпяльть эзда.

 

Тядде Карелияв велень финно-угорскяй Международнай фестивальти Мордовияста якась Рузаевскяй муниципальнай райононь Левжа мокшень велень «Ару лихтибря» фольклорнай коллективсь, конань руководителец Российскяй Федерациянь Правительствать «Душа России» премиянц Лауреатоц мокшавась Людмила Гавриловна Канаева. «Ару лихтибря» фольклорнай коллективсь содаф ламотненди, пуроптфоль Левжаса 1962 кизоня.

 

Фестивальсь мольсь ниле шит, выступлениятне ульсть Чална велеса, Рускеала пандонь паркса, Петрозаводскяйса, Сортавала ошса. Творческяй коллектифне сашендсть Карелияста, Удмуртияста, Эстонияста, Финляндияста, Мордовияста. Участникне несколька шис арсесть фкя оцю семьякс.

 

«Ару лихтибря» фольклорнай коллективть руководителенц Людмила Гавриловна Канаевать валонзон коряс, мяль салась кода сонць фестивальсь, стане и Карелияв кись, кона мольсь Санкт-Петербург ошть пачк, сяс удалась няемс соньге мазы вастонзон.

 

«Мокшень щамоньконь-карямоньконь колга ерасть содамс кода оцюфне, стане и  иттне. Ломаттне кизефнесть, тифнесть лятфнембяленди фотографият»,—мярьгсь сон.

 

Карелияв самда меле «Ару лихтибря» коллективсь якась экскурсияс Валаам острову.

 

Тя островсь—сетьме уженя. Ладожскяй эрьхксь, кевонь панттне, перьфпяльсь… Сей сашендыхть Шкаенди верондай ломаттне, штоба няемс святой васттнень, и туристтне, штоба ваймамс эрь шинь тефнень эзда и няемс тястонь мазышить. Фкя шиста, шарьхкотьф, семботь аф няйсак, сяс пара ули самс Валааму сяда ламос.

 

«Родовое гостевание» фестивальть официальнай панжемац ульсь  васенце шистонза, 26 июньцта, Сортавала ошть площадьса-скверса. Участникненди и пуромфненди седиста моли лямбе валхт азсь «Карелия-Финляндия» Ялгаксшинь обществать  правлениянц  председателец Е.А.Барбашина.

 

Васенцекс сценати лиссь «Туоми» финскяй моронь ансамбльсь, кона пуроптфоль 1956 кизоня. Сон—Карелия Республикань инь сире самодеятельнай коллектифнень эзда фкясь.

 

Левжаста «Ару лихтибря» коллективсь выступандась мекольцекс. Сортавала ошень эряйхне и инжихне оцю мяльса кулхцондозь мокшэрзянь моротнень, ламос цяпазь кядьснон коллективти.

 

Омбоце шиня, 27 июньцта, фестивальсь поладовсь Рускеала пандонь паркса. Тоса участникне няезь Пряжинскяй и Прионежскяй райоттнень эса  Урозеро эрьхкть—перьфпялень гидрологическяй памятникть.

 

Экскурсияда меле фестивальс саф фольклорнай коллектифне няфтезь кштимаса-морамаса маштомошиснон.

 

Фестивальть колмоце шиц ушедсь Корза кунардонь вели экскурсияста. «Ару лихтибря» участникнень дивандафтозень ся, што тяниень пингонь ломаттне эряйхть ташта куттнень эса, конатненди реконструкциявок аф тиендихть, а ванфтсазь синь культурнай объект лаца. Удалась улемс Николай Данилович Савкинонь ширеса. Сон казсь мокшень ломаттненди павазонди подкав. Тя экскурсиять пингста лама мезе содафоль  карелхнень и синь атянь атяснон эряфснон колга.

 

Шить омбоце пялестонза «Ару лихтибря» фольклорнай коллективсь ульсь Пряжинскяй райононь Чална велеса, коса няфтьфтольхть карелхнень авань костюмсна. Меле эрь коллективсь няфтезень эсь щамснон и азондсь колгаст. Тяда меле етась «Туоми» ансамбльть 60 кизонь топодеманцты лемтьф концерт, конань шумордамдонза меле участникненди казьфтольхть казнет и максфтольхть «Сугуваставунду» фестивалень участникнень Дипломсна.

 

29 июньцта «Ару лихтибрясь» макссь концерт Петрозаводск ошса. Тяса и шумордавсь фестивальсь, но лятфнематне колганза ламос ванфтовихть участникнень седиса и ваймоса.

 

Т.Альшина.

 


11.07.2019 №27
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин