Поиск по сайту: 
 

Архив
 январь 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

«ВАЛДА ШИНЯСЬ» МОКШЭРЗЯНЬ ПРАЗДНИКСЬ—ТАТАРСТАНЦА!

Тя оцю пуромксть ётафтоманц квалма мяльть азозь Тетюшскяй краень Историянь музейть сотрудниконза, конат анокласть «Валда шинясь» Мокшэрзянь культурань республиканскяй праздник» грантовай проект. Ширенц кирдезе Татарстан Республикань Правительствась и макссь финансовай лезкс. Проектть вельде ванфтовихть мокшэрзятнень койсна-обуцясна, этническяй мялямсь, виияфтовихть фольклорнай коллектифнень и народнай творчествань мастерхнень работасна.

 

Шобдаваста сявомок «Инжиень кужеса» праздникс сайхнень васьфнезь весяла мороса, сиде мороняса.  «Музыкальнай завалинкаса» мольсть «Кайгоза шачем масторозень мороц» моронь посиделкатне, а «Сиде моронянь кужеса» ульсь кода морамс сиде моронят, пеетьфти-рахсефти морот.  Сяда тов кись вятсь «Тюштянскяй ярмаркати», коса мишендевсть народнай промыслань, ремеслань, декоративно-прикладной творчествань и изобразительнай искусствань изделият, сувенирхт, ётафневсть анокламаснон коряс мастер-класст.

 

«Запечатли момент на память»—тяфтама лем каннесь фото-площадкась, коса ламотне тифнесть лятфнембяленди фотографият. Ламоль идьта «Мокшень налхксемат» площадкаса: шабатне комотнесть батутса, ичкози кулевсть кайги, весяла вайгяльсна.

 

Оцюфне няфнезь вийснон и маштомошиснон «Тюштянь налксемат» пялькстомаса: шочконь шашфнемаса, шочка лангса ащезь кяскавса тюремаса, байдеконь усксемаса, шочконь кепсемаса.

 

Инжихнень пара мяльса учезь  калонь кунциень стан мархта «Мокшэрзянь подворьять» ваксса. Тястонь азорхне содафтозь синь мокшэрзятнень культураснон, эряфснон-ащефснон мархта. Сембе, кинь мяльсноль, варжазь вийснон калонь кунцемаса, а стане жа содафтфтольхть кода анокламс калхнень эзда ярхцамбяльхть. Кепотьксонди, танцти шонгарям.

 

«Валда шинясь» праздникс пуромфне каваняфтольхть мокшэрзянь ярхцамбяльса и симомбяльса: пачаса, пярякаса, позаса, рястаф сивольса…

 

Панжевсь «Валда шинясь» праздниксь «Эжнек шить сюролданзон ала шачема кудцень эса» театрализованнай прологса.

 

Меле ульсь сонь торжественнай пяльксоц.

 

Пуромфненди приветствиянь валхт азсть Тетюшскяй муниципальнай райононь оцюнясь Р.Х.Сафиуллов, Татарстан Республикань Государственнай Советонь депутатсь, Татарстанонь Нароттнень ялгаксшиснон Кудснон директороц И.И.Шарипов, лиятне.

 

Мордовия Республикать эзда тя праздникса ульсть Финно-угорскяй народонь культурань Поволжскяй центрать нациятнень ёткса соткснень ладямаснон кизефкснень коряс координаторсь Т.Т.Чекушова, «Ламзурь» народнай фольклорно-этнографическяй ансамбльть участницанза В.И.Пронина и Р.Б.Щанкина.

 

Т.Т.Чекушова Финно-угорскяй народонь культурань Поволжскяй центрать Благодарностензон мархта казезень Тетюшскяй муниципальнай райононь Исполнительнай комитетть культурань отделонц начальниконц Ю.В.Сиякинонь, тяка райононь Кильдюшевскяй велень поселениять оцюнянц В.С.Исаевонь, лиятнень. Ня ломаттне лама тисть мокшэрзятнень национальнай культураснон виияфтоманц и ванфтоманц инкса.

 

«Ламзурень» участницатне В.И.Пронина и Р.Б.Щанкина морасть мокшэрзянь морот, конат тусть сембонь мяльс и занясть башка васта «Валда шинясь» мокшэрзянь культурань праздникть республиканскяй фестивальсонза.

 

Тядде «Валда шинясь» праздникса ульсь финскяй актёрсь, телеведущайсь Вилле Хаапасало, кона содаф «Особенности национальной охоты», «Кукушка» и лия фильматнень коряс.

 

Пцтай илядьс кайгсть Кильдюшевать вельхксса мокшэрзянь морот, сиде моронят. Праздниксь удалась сембе ширде.

 

Тя ульсь аф аньцек Тетюшинь эряйхнень праздниксна, сон марс пуроптозень пяк ламотнень. Кильдюшевав сашендсть творческяй коллектифт Татарстанцта и Россиянь лия региоттнень эзда, мезсь корхтай сянь колга, што ломаттнень мяльсна васетькшнемс, пачфнемс фкя-фкянди творческяй     сатфксснон и сай пингонди планцнон квалма.

 

                                                                                                        Т.АЛЬШИНА.

 


18.07.2019 №28
 
 
 

 
НОВОСТИ
 
 
 
 

Од ломаттненди азонтфоль РФ-нь Конституциять колга

12 декабрьста Мордовия Республикань Государственнай Собранияса ётась пуромкс, кона лемтьфоль Российскяй Федерациянь Конституциять шинцты. Госсобранияв сашендсть Саранск ошень 23№ гимназиянь и Рузаевкань 9№ школань тонафнихне. Тяса теест ётафтфоль экскурсия зданиять эзга, няфтьфоль Госсобраниянь музейсь, азонтфоль закононь нолни органть работанц колга. Тяда меле школьникне пуромкшнесть Оцю залса, коса синь мархтост васетькшнесь МР-нь Госсобраниять Председателец, «Единая Россия» партиять Мордовскяй региональнай отделениянц Секретарец В.В.Чибиркин. Владимир Васильевич пачфтсь од ломаттненди кода и мезенди примафоль Конституциясь, азондсь республикаса властень системать колга.

—Странаньконь фкя инь васенце законоц—Конституциясь примафоль аф тёждя пингста синцень странань эряйхнень мяльснон коряс,—азозе В.В.Чибиркин.—Эсонза кемокстафт ломанть праванза и воляшинза.

 

Российскяй Федерациянь Конституциясь примафоль 1993 кизоня. Тядде теенза топодсь 25 киза.

 

В.В.Чибиркин кошардозень од ломаттнень улемс эсь странань афкуксонь гражданинкс, кельгомс шачема масторснон. Тинь эздонт, мярьгсь Владимир Васильевич, ащи Россиять сай пингоц.

 

Сяда тов Российскяй Федерациянь Конституциять колга лекция школань тонафнихненди лувсь «Молодая гвардия «Единой России» ВОО-ть МРО-ц вятиенц тевонзон тиендисна И.А.Заугольнов.

 

О.ЕВДОКИМОВА.

 

 

 

13.12.2019
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин