Поиск по сайту: 
 

Архив
 октябрь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Национальная тематика

Т.А.ВЛАДИМИРОВА:

—Кода ярхцамбяльсь эряви ронгти, стане музыкась ваймоти,—мярьгсь мокшавась Татьяна Александровна Владимирова, кона аф няйсы эсь эряфонц морофтома.

 

—Музыкась эряфсон—тя кода эряфонь сталмотнень, эряскодоматнень, сизематнень эзда кяшема васта. Морамась касфтсы ломанть эса кельгомать, тиендьсы ваймонц арукс, валдокс. Сембодонга пяк мала тейне фольклорнай музыкась, кельгсайне кунардонь пингонь мокшэрзянь моротнень.

 

Т.А.Владимирова—Шкайть мархта асушиса казьф мокшава. Шачсь сон Саранскяйса лама идень семьяса. Аляц, Александр Фёдорович Пудашкин, эряфоньберьф работась слесарькс-связистокс. Тядяц, Людмила Васильевна, покодсь больницяса медсестракс.

 

Татьяна Александровна филологическяй наукань кандидат, немецкяй филологиянь кафедрань доцент. Работай Н.П.Огарёвонь лемса Мордовскяй госуниверситетса преподавателькс.

 

Т.А.Владимировать мархта васедемстонк, мзярда корхтаманьке мольфтевсь музыкать колга, авать сельмоса палозь-палсть тя тевти кельгомань толнятне. То сон ушедсы «Вай, луга, луга» мокшень мороть, конань идькс пингстонза морсезе теенза бабац, то морай куплет «Москва-Саранск» эсь моростонза, конань сон аф кунара сёрмадозе. Мокшавать валонзон коряс, сонь прясонза фалу шары кодамовок мора—сонь обработкац, вайгяльге явомац, аккомпанементонь ширде тонафнемац. Тя аф стак, вдь Татьяна Александровна морай «Лайме» эстрадно-фольклорнай ансамбльса. Кочкуровскяй райононь Сабаево велеса, коса тяни сон эряй семьянек, вятьсы «Виринея» фольклорнай коллективть, «Сурань зорюват» ансамбльть, тонафни морама итть Сабаевань школаса «Потешки» вокальнай студияса. Сонць сёрматкшни морот (и музыкать, и валхнень). Недляшиста морси церькавонь клироса (хорса) Казанскяй Божьей Матерть шкаень ликонянц лемс Саранск ошень храмса и Сабаевань церькавса. Тонафнесыне иттнень церькавонь воскреснай школаса. Тонафнемань цебярь программань тиеманкса 2016 кизоня «Серафимовский учитель» конкурсса сатсь (поощрительнай) премия. Героиняньконь аф аньцек горняй пайгоня лаца вайгялец, сон ваймоса, сурса марясы эрь музыкальнай инструментть. Морай гитараса, балалайкаса, гусляса, пианинаса, а аф кунара сявозе кядезонза гармониять. Кочкуровань «Сударушка» народнай фольклорнай ансамбльть урмаськодсь гармонистоц, а тяса ни малаткшни «Морак, гармония!» народнай творчествань республиканскяй конкурссь, коллективсь эняльдсь Татьяна  Александровнанди сявомс эсь лангозонза аккомпанементть, и сон ашезь атказа.

 

—Кода сембе вастова кенерькшнят? Вдь эряви лама пингта репетициянди, эрь коса ётафневи концерттненди?

 

Кизефксозень лангс мокшавась пеедезевсь и ушедсь азондома:

 

—Тянь вешсы ваймозе. Музыкась—кельгома тевозе, кона арась тейне омбоце профессиякс. Идькс пингстокиге морофтома ашезь ётне фкявок шизе. Мяляфтса, Галина сазорозень мархта, а минь сонь мархтонза кафтастяма, шабакс автобусса ардомшовор, мультфильмаста моронь морсезь кепсеськ мяльснон мархтонк ардыхнень. Мон шачень-касонь семьяса, коса сембе кельгсазь морамаснон. Тядязе, алязе, брадозе и нльне щавазе сембе морасть гитараса. Сяс, улема, гитарась монь кельгома музыкальнай инструментозе. Коль корхтаманьке пачкодсь идькс пингозон, мялезе башка лятфтамс бабазень и щавазень колга. Щавазе, Ольга Степановна Орлова, ульсь немецкяй кялень учителькс. Ёмластокиге касфнезе эсон кяльхненди кельгомать. Ётка пингста ётафнесь тейне и сазорозти диктантт, марса мархтонза тонафнеськ немецкяй кяльть.

 

Бабазе, Прасковья Владимировна Пудашкина, эрясь Рузаевскяй райононь Пушкино велеса. Ширесонза ётафнеськ сембе каникулатнень. Тяни бабазень колга лятфнемста-арьсемста панчсеви тейне ётай пингонь поколениять смузьшиц, кодама сон ульсь скромнайкс, сетьмокс, ляденди мялезон козовок аф эряскоды велень эряфсь. Мяляфтсайне мокшень моротнень, пачатнень, пярякатнень, койхнень-обуцятнень, перьфпялень мазышить. Бабазе каннесь мокшень щапт, корхнесь мархтонк аньцек мокшекс. Сон видесь уноконзон ваймос эсь народоньконь кельгомань видьмот. Мон сюконян бабазти, васендакиге сянкса, мес маряса прязень мокшень ломанькс.

 

Татьяна Александровна сафтсы аф аньцек преподавателень работаса и творческяй тевса, тяда башка, сон цебярь кудазорава. Кельгсы танцтиста пидеманц-панеманц. Тядянь-алянь кельгомаса касонды 5 кизоса Фёдор цёраняц. Мирденц, Алексей Владимировичень, мархта арьсекшнихть панжемс аф оцю семейнай музей. Синь кочксесазь-ванфнесазь кунардонь пингонь паршихнень. Кудсост няеви вастса ванфневихть атянь-атяснон, щятяснон орденцна и медальсна. Азонкшнихть цёраняснонды ингольдень пингонь эряфть колга, кода араласть шачема мастороньконь эса атянь-атяньке.

 

Культурань ванфтозь, историянь содазь, сембе минценнети седиень палозь кармай панжема шачема мастороньке!

 

 

                                                                                                          Т.ПЕТРОВА.

 

 


«МОРОФТОМА АФ ЁТНИ ФКЯВОК ШИЗЕ»
18.07.2019 №28
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин