Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Рузаевский район: высокоскоростной интернет в каждую школу

Москувонь и сембе Русень Святейшай Патриархсь Кирилл:

Василий Степанович шачсь 1879 кизоня Астраханьца. 1903 кизоня сонь семьяц етась Нижегородскяй губерниянь Лукоянов ошу, коса Василий работась машина кинь депоса машинистокс-механикокс. Тяса сон рьвяясь Ичалковскяй Лада велень эряйть Параскева Ивановнать лангс, конань мархта синь касфтсть кафкса итть. Кизонь кофнень семьянь келеса эрь кизоня якасть Оброчнай вели, коса Василий Степановичень ульсь родителензон кудсна.

 

Улемок Шкайти пяк верондай ломанькс, Василий Гундяев пцтай сембе заработканц кучсезе Афону Святой Пандти, коса сонь родоц тяштьф вечнай поминовенияс несколька монастырьхнень эса. 1921 кизоня, большевикнень властти самдост меле, сон арестовандафоль и целайнек 20 кизода лама (пингонь-пингонь) етафтсь тюрьматнень и лагерьхнень эса. 1950 кизотнень песта, лама стака-сталма няемада меле, Василий Степанович ульсь путф священникокс и несколька киза служась Башкириять территорияса храпнень эзда фкаса. Ефси сиреста, Святейшай Патриархть Алексий I мярьгоманц коряс покойс нолдамдонза меле, иерейсь Василий Гундяев мрдась Оброчнай вели, коса кулось 1969 кизонь 31 октябрьста 90 кизонц лангса.

 

Мирденц куломда меле Параскева Ивановна етась эряма Саранскяи. Сон кулось сяка жа шиня, 31 октябрьста, кода и мирдец, 1974 кизоня. 90 кизонц топодеманцты лядондсть 10 шит. Святейшай Патриархть бабац калмаф Ключаревскяй калмотненди  Саранскяйса.

 

1980 кизоста сявомок Гундаефнень семьяснон кудса эрясть лия кудазорхт. 2011 кизоня, мзярда Патриархсь сашендсь Мордовияв Первосвятительскяй визит мархта, сон сувсесь тя кудти, корхнесь азорхнень мархта. Эста и сась мяльсь петемс сонь стане, кода лядсь унокнень мялямса.

 

Кудть рамазе 2017 кизоня Саранскяй епархиясь, сонь петезь ванфтф фотографиятнень и Василий Гундяевонь маластонь ломанензон лятфнемаснон коряс. Кудботмоть тиезь стане, кода ульсь пяле векта инголе. Тиезь тянь сембе марса и прихожаттне, и священнослужительхне. Трудта путфоль афкукс лама. Ичалковскяй райононь Благочиннайсь, протоиерейсь Иоанн Просвирнин покодсь тоса виень аф ужяльдезь. Сон тись реставрация семботи, мезти ульсь возможность. Ванфтозе ингольдень поталакть, кияксть, стенатнень, вальмятнень и кенкшнень. Ламось кудса полафтфоль ингольдень азорхнень мархта. Калафтфоль пянакудсь, тяни сон тиф одукс, сяконь лаца, кодамокс ульсь.

 

Мзярда Святейшай Патриархсь аськолдась кудонь порогть вельф—сон лоткась и абонтфста ламос ванць. Предстоятельсь пяк дивандась и кенярдезь мярьгсь: «Вов тя да! Да вдь тяса сембось тяфта и ульсь! И кенкшне, и стенатне, и диванць. Вов тяса мон утцень пянакудлангса бабазень мархта. Вов арзясь. Тяфтама жа. Бабазе тоса ванфнесь конфета мархта сюлмоня уноконзонды. Кодама жа оцю работа тинь тиеде!»

 

Патриархть радня ломанензон старандамаснон мархта кудти мрдафтфтольхть семьять афкуксонь паршиенза. Етксост—сире шкайликонясь, конань Святейшайсь сявозе атянц кудста куломдонза меле, а стане жа бабанц, Параскева Ивановнань, библиотекаста А.П.Чеховонь произведениянь оцю сборникоц, нолдаф 1946 кизоня.

 

Кудти ремонтонь тиемста строительхне мусть тайник—18 веконь прьхчещандаманди церковнай утварень набор.

 

«Тя ся, мезть атязе ванфтозе инь пелькс пинкнень»,—стакаста куфкстазь мярьгсь Патриархсь. Питни муфкссь максови Москувонь Свято-Даниловскяй монастыри.

 

Патриархть раднянза, конат састь Саранскяйста и Санкт-Петербургста, пуромсть родной кудозост шрать перьф. И ламос лятфнесть, лятфнесть…

 

Патриархсь васетькшнесь аф аньцек эсь раднянзон, но и велеряйхнень мархта, конат пуромсть Василий Гундяевонь кудонц ваксс.

 

«Тейне паваз—сашендомс тяза,—мярьгсь Рузонь православнай церькавть Предстоятелец.—Мялезе азомс спасибамань валхт республикань Оцюняти Владимир Волковонди и владыкати Зиновиенди, и сембонди сятненди, кие путсь лама вийда атязень кудонц петеманкса. Сембось тиф лямбе седиса, добрай кядьса. Сембонди азондан спасиба».

 

Святейшай Патриархсь бславазень Мордовиянь сембе эряйхнень, башка азомок: «Мяленте улемс павазукс—ванфтость Шкайти верондамать и старандада эрямс сонь закононзон коряс. Эста сембось кармай лац. Мзярда ломанць тя законть колсесы, эста и ушеткшнихть стакатне-сталмотне, кода и семьянь эряфса, стане и иттнень мархта. Эряда Шкайть закононзон коряс—и блага теенть кармай, и ламос карматада эряма».

 


«ТЕЙНЕ ОЦЮ ПАВАЗ—САШЕНДОМС ТЯЗА»
09.08.2019 №
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин