Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Рузаевский район: высокоскоростной интернет в каждую школу

МОРОТНЕНДИ КЕЛЬГОМАСЬ ЭВОНДАСЬ ЭСОНЗА МОКШЕНЬ ЮВНЯ ВЕЛЕСА

Анастасия Даниловна и Фёдор Петрович Ратникофне трудонь кельги ломаттельхть, шобдаваста шоподемс работасть колхозса. Кудъётконь и перень-паксянь тефненди тонафтозь колма идьснон: кафта цёраснон и стирьснон. Мокшень тя семьясь эрясь ульцяса, конанди велеса мярьгольхть Идловка. Анна Фёдоровнань лятфнеманзон коряс, Идловкаса пяк ламоль шабада, шиньберьф ульцяса кайгсть синь вайгяльсна.

 

«Эрь кудса ветень, котонь, сисемонь, кафксонь, кемонень идель, аньцек минь колмонектолеме. Ялгань келеса якаме утому сёронь, тишень и сенажень урядама. Илять улендеме велень клубса. Мокшень Ювняса сембе кельгозь мокшэрзянь моронь морсемаснон. Клубсовок синь кайгсть пяк сидеста. Ужяль, тяни пинкне полафтсть. Велеса ламоц куттне шавот. Эряфкшу ломаттне тушендыхть эряфста, а оттне—ошу или нинге козовок работама, да тозк и ляткшнихть»,—мярьгсь А.П. Петрова (Ратникова).

 

Тяфта лиссь и эсь мархтонза. 1982 кизоста сявомок Анна Петровна эряй и работай Москуса. Но седисонза фалу эряй ёмла родинати—Мордовияти, Мокшень Ювняти лажадомась. Велеста тусть и кафта брадонза. Альнякац—Саранскяи, дуганоц—Киржач ошу.

 

Аф ваномок ширеса эрямать и сянь лангс, што аш шисот тядясна и алясна, Анна Петровна и брадонза аф юкснесазь Мокшень Ювнять. Родной кудсна тянемс ащи вастсонза, сяс ули коза самс ваймама шитнень. Фалу сувсихть велеса эряй радняснон ширес, сятка кельгсазь Ратникофнень тядянь-алянь кудсост улендемаснон.

 

Мокшавась работай лавкаса. Кассь идец—стирец Анастасия. Овонц лемоц Владислав. Анна Петровна учи, мзярда синь казихть теенза унокт.

 

Анна Петровна ашезе юкста мокшень кяльть. Меколанкт, эсонза аньцек вииясь теенза кельгомась. Мокшень щапне-каряпне, мокшэрзянь моротне, культураньке занцихть башка васта эряфсонза.

 

«Пяк кельгса кштимазень и морамазень. Фалу лятфнеса, кода инголи морсельхть тядяньке. Сидеста якань кулхцондомост. Меле ялгань келеса морсеме ульцяса и велень клубса. Тяни морсян «Баяраваня» Москувонь межэтническяй фольклорнай ансамбльса. Сембоц эздонк кемнилие ломань. Морсетяма мокшень, рузонь, эрзянь, казаконь, украинецонь морот. Морсетяма аньцек  акапельнайста»,—азозе тячиень героиняньке.

 

—А коста сявость мокшень щапнень-каряпнень?

 

—Ускоськ шачема-касома велеста сятнень, конат лядсть тядяньконь и бабаньконь-щаваньконь эзда. Мокшень од панархнень и сапонятнень стафнесаськ—«Баяраваняса» улихть машты кядь мокшават. Кепотьксонди, Татьяна Владимировна Шукшина, Нина Дмитриевна Куфтинова.

 

—Анна Петровна, тейть, кода и «Баяраваня» марнек коллективти сашендови улендемс ламоц пуромкснень—концерттнень, фестивальхнень, лия праздникнень эса. Кодама мяльса васьфнетядязь ваныхне?

 

—Кода ни азыне, сембе моротнень морсесаськ акапельнайста. Лиякс азомс, инструменттнень, музыкать тевс аф нолясаськ. Сидеста выступлениядонк меле ваныхнень сельмостост тушендыхть сельмоветть. Тя корхтай сянь колга, што мороньке пачкодсть ваймозост, ашезь када озадонь седихть ащема. Сяс, арьсян, «Баяраванять» концертонза тушендыхть ламотнень мяльс. Куленттяма кядень кайги цяпамат—тя арси тейнек оцю казнекс.

 

—Аф ваномок Москуса эрямать лангс, тон—родной кялень, культурань, коень-обуцянь афкуксонь патриотат. Улема, ванат сянь мельге, кодама цебярь полафткст тиендевихть Мордовияса, тяконь лувксса и Саранскяйса мекольдень кизотнень?

 

—Ужяль, Саранскяйса пцтай аф улендян, мекольце сашендомдон меле ётась пяк лама киза. Но республикать столицанц колга сидеста пачфнихть ялгане. Тя, кле, тяниень пингонь пяк мазы ош и Мордовиянь сембе эряйхненди ули кода марямс тянкса гордость! Мялезе самс и семботь ваномс. Надиян, тя тейне удалай.

 

—Национальнай кодама ярхцамбяльса каванякшнесайть содафнень и ялгатнень?

 

—Васенце вастса ульсть и ляткшнихть мокшень пачатне. Мзярда тернесамазь кодамовок пуромксс, национальнай морода башка, ширденк вешихть мокшень пачат. Штоба щамонте улельхть мокшеннет и пачантевок—тянь сидеста кулендьсаськ организаторхнень и комиссиятнень эзда.

 

—Спасиба, Анна Петровна, мялень салай интервьюнкса! Сембе цебярть Тейть!

 

Т.АЛЬШИНА.

 


08.08.2019 №31
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин