Велесь эряви ванфтомс и виияфнемс

Тя сембось пяк пара. Но аф сатомшка мяль, койсон, шарфтф фкя инь главнайти—велеряйхненди аш эрь шинь работа эсь велесост, штоба щамс-трямс пряснон, семьяснон.

Производствать машфтомац велеса «панезень» ломаттнень шачема уженястост шири, и сяс лядсть тоза аньцек сире ломатть, конатненди аш коза тумс. Тя эвондафтсь тага фкя прябала—оржаста ащи демографическяй кизефкссь. Тянь сюнеда аф кржа веле срадсь-каладсь ни, кой-конат ащихть юмама-арама лангса. Пяк кржа лядсь тячи вели од ломаньда, а одфтома аш кинди кирдемс жуватат. Велеста тяни аф муви «кяскав» ярмактонга постуф. Сире ломанти вдь пикс вельде жуватась аф кирдеви-вятеви. Да и кудонь нармоттневок аф трявихть—пяк питнияфтозь велеряйти сероть. Тага фкясь—аш кие озафтомс тракторть и машинать руленц ваксс. Койсон, съездонь делегаттненди, республикань и райононь оцюнятненди эряви, васендакиге, корхтамс велень тя инь оцю пичефксть колга и вешемс кит-ятт сонь решандаманксонза.

Азса сяньге: пяк пара куля сась тячи вели, кона кеняртьфтезень сире велеряйхнень. Россиянь Госдумась примась закон: кие велеса работась 40-да лама киза велень хозяйствань тевса, сянь пенсияц касфтови 25 процентта.

Арьсян, кда ванды велеса эвондальхть рабочай вастт, пяк лама ошеряй мрдаль эсь шачема велезонза эряма.

Штоба ванфтомс велетнень, васендакиге решандамат тяса уликс прябалатне. А эздост аф кржа. Но азома сявок, што кой-конат синь эздост решандафт ни. Кепотьксонди, селгондозь емла школатнень—тяни синь тонафниснон усксесазь автобусса лия школава. Сёлгозь участковай больницятнень—кармась вели арнема «скорай помощсь» и сашендыхть тяза райцентраста врачне.

Койсон, съездонь делегаттненди эряволь корхтамс и культурать колга. Тячи лама вастова сёлкфт библиотекатне, аф муят лувомс книга аф аньцек иттненди, но и эряфкшуфненди. Кизонда велетне пяшкотькшнихть ломаньда. Пяк лама вели сашенды ошень идьта, конатненди тонафтысна макссихть «кизонь лувомань» заданият. Лисенди стане, штоба лувомс книга, молема шабра велень библиотекав, коса аф содаф ломаненди книга аф максыхть.

Кие ульсь Ковылкина ошень паркса, ся няезе Ленинонь памятниконц ваксса путф оцю книга мархта шкафть, коса серматф: «Сявк книгать, лувомдонза меле путк меки вастозонза. Кда тонь улихть аф эрявикс книгатне—кандыть синь тяза». Велеса аш паркт, театрат, стадиотт, но улихть цебярь клупт. Мес аф путомс тяфтама шкафт тоза?

Монь кельгома Ёжка велесон шачсть-кассть Мордовиянь Народнай писательсь-фронтовиксь М.Сайгин, Мордовиянь Заслуженнай поэттне В.Корчеганов, П.Алешина и лия содаф ломаттне. Но синь произведениясна шачема велестостка аф мувихть. Кие муворусь тянкса—минь аф содасаськ.

Аф лама пингта ляткшни странаньконь инь оцю праздниконцты—Великай Победать 75 кизонь топодеманцты. Пелькстонга пелькс тя тюремась мзярдовок аф нардави мялямста. Тя оцю илати анокламась странасонк мольфтеви сембе ошнень и велетнень эзга. Ёжка велеса аф юкснесазь Родинаньконь аралаензон. Троцянь велень администрациять лезксонц вельде одкстоптф войнаса шавфненди обелисксь-памятниксь, золотань букваса серматфт синь лемсна стелати, велеряйхнень лезксснон вельде перяфт и архтфт памятникне и перяфкссь, лац урядафт кафцьке велень калмаланкне.

Ёжкэряйхнень П.Аданькинонь и Н.Сайгинонь трудснон вельде строяфт кафта часовнят калмаланкненди, а предпринимательсь А.Веряскин строяфтсь калмалангу молемс асфальтонь ки. Но монь вов мезсь пичефтьсамань: мес лама велева юкстафт кулоф фронтовикне, конат войнать сюнеда арасть инвалидкс-калекакс, пяк сярятькшнесть войнада меле и ранакиге тусть эряфста, а теест тянемс апак путт военнай памятникт или хуш марстонь стела—мемориальнай доска, кода войнань участниконди калмалангу.

Пеняцяйхть и ся веленянь семьятне и велеряйхне, коса ефси юкстафт и войнаса шавфневок, и вели калмафневок, тянемс апак путт синь лемозост обелискт-памятникт аф велеснон кучкас, аф марстонь стела-мемориал калмалангозост. Лисенди стане: конат сатозь войнать пенц—сят войнань участникт, а конат воявасть эсь прянь аф ужяльдезь, ранендафт, арасть калекакс, мрдасть синнефста-тапафста войнаста, ламос сярятькшнесть войнада меле, няендсть нужат и рана кулость—юкстафт. Арьсян, съездса тянь колгавок эряви корхтамс. Пяк пара, што минь Троця велень администрациянь оцюняньке В.И.Мельников надияфтсь Победань шити стяфтомс-путомс калмалангозонк марстонь стела велеса калмаф войнань участникненди, коза улихть серматфт синь фамилиясна, лемсна и отчествасна.

Аф эряви юкстамс фкявок воин, конат аралазь аф аньцек Родинаньконь, но и казсть тейнек валда эряф.

Сембе содасаськ: велеряйсь тячи обжаф лама ширде: «нелькфт» праванза эсь велесонза работамс, тонафнемс, «синнема» пряц, коза мима лишняй модамарец, сиволец, алонза, перень серонза-мезенза. Тянь колга стане жа эряви арьсемс минь вятиеньконди. Койсон, велесь эреклай аньцек эста, мзярда велетнень и велеряйхнень шири шарфтови сяда оцю мяль государстваньконь ширде.

Надиян, мзярда машфтовихть минь странасонк велень ня прябалатне, меки пяшкодихть веленьке ломаньда и тага касы мокшетнень и эрзятнень лувкссна, аф «кулыхть» минь республикасонк национальнай велетне, кармай кайгома родной кяльсь, ванфтовихть койхне-илатне. Кода няйсасть, луви ялгат, VII Мокшэрзянь съездонь делегаттненди ули мезень лангса арьсемс. Кода ня кизефксне решандавихть съездса—няфтьсы пингсь.

Ковылкинскяй районць.