Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Тема дня

САРАНСКЯЙСЬ АРСЕСЬ СЕМЬЯНЬ И ИДЕНЬ ПИНГОНЬ СТОЛИЦАКС

 «Вернуть детство» окружной фестивальсь ётафтфоль идень куттнень ширеснон кирдемаснон и тядянь-алянь заботафтома лятф шабатнень социальнай тонадомаснон инкса. Пингстонза иттне примасть участия «Звезды ДЕТСТВА» идень творчествань конкурсть «Вокал», «Танец», «Художественное слово», «Оригинальный жанр» номинациянзон эса. Ёмла мастерхненди аноклафоль «МастерОК» идень прикладной творчествань выставка, «Спортивный Олимп Приволжья» спартакиада, «Звезды детства» Гала-концерт и лия пуромкст.

 

Меля «Успешная семья Приволжья-2018» конкурсса тя титулть сатозь Саратовскяй областьста Руднефне. Мордовияста Висюлькиттнень семьясна лиссь сяськикс «Родительская слава» номинацияса. Тядде республиканьконь эзда участия примась Саранскяйста Галочкиттнень семьясна.

 

20 сентябрьста Саранскяйса Культурань республиканскяй Дворецса ётась «Вернуть детство» фестивальть и «Успешная семья Приволжья-2019» конкурсть финалонц торжественнай панжемасна.

 

Пуромфнень инголе корхтась Российскяй Федерациянь Президентть Приволжскяй федеральнай округса Полномочнай представителенц Аппаратонц Общественнай проекттнень эряфс ётафтомаснон коряс Департаментть начальникоц Д.Е.Соловьев.

 

—Полномочнай представительть Аппаратонц лемста поздравляндатядязь фкя инь оцю и мяляфтови событиять мархта! «Вернуть детство» проектть инь крхка историяц Приволжскяй федеральнай округонь общественнай сембе проекттнень ёткса. Сон эряфс ётафневи 2009 кизоста сявомок и 20 тёжяньда лама стирня и цёраня ётась пялькстоманзон, развивающай программанзон, мастер-классонзон пачк. Оцю аськолксокс арась фкя площадкаса «Успешная семья Приволжья» конкурсть и «Вернуть детство» проектть марс поладомасна.

 

Сяда тов сценати тертьфоль Мордовия Республикань Правительствать Председателенц заместителец Г.А.Лотванова.

 

Галина Алексеевна Мордовия Республикань Оцюнять В.Д.Волковонь лемста азсь седиста моли лямбе валхт фестивалень и конкурсонь участникненди, конат састь Саранскяи Приволжскяй федеральнай округонь сембе региоттнень эзда. Синь примамасна тейнек—оцю честь и ответственность. И минь тиендьсаськ тянь омбоце кизось мельцек. Тядде участникнень лувкссна кассь 76 ломаньда мелять коряс. Тя корхтай сянь колга, што конкурссь и фестивальсь кочксихть вийхть, тушендыхть мяльс и арсихть тонатфокс.

 

Г.А.Лотвановать валонзон коряс, миньцонк пяк лама тиендеви шабатнень инкса: стройсевихть идень сатт, школат, театрат, ули идень технопарконьке.

 

Шить омбоце пялестонза рузонь Государственнай драматическяй театраса ётась «Успешная семья Приволжья-2019» конкурсть финалоц.

 

Семьятненди-участникненди и сембе пуромфненди приветствиянь валхт азсь конкурсонь жюрить председаталец, Российскяй Федерациянь Федеральнай Собраниянь Федерациянь Советса Мордовия Республикань государственнай властень исполнительнай органть эзда представительсь, Федерациянь Советть Международнай тефнень коряс комитетть председателенц васенце заместителец С.И.Кисляк.

 

—Омбоце кизось мельцек тя сценать лангса ётни семьянь конкурссь, лиякс азомс—ляпе седиень, цебярь ломанень, конат макссесазь эсь пингснон и седиень лямбоснон иттненди, праздниксь. Мезе стамсь семьясь? Тя ся, мезсь эряфса васенце вастса, государствать основац. И минь, ваномок ня семьятнень лангс, нинге весть няйсаськ, што Россиясь—вии, шумбра государства,—мярьгсь сон.

 

Сценати лисендсть семьят Приволжскяй федеральнай округть сембе региононзон эзда. Эрсь маладсь тя конкурсти творческяй ширде, няфтезе кштимаса-морамаса, стихотворениянь лувомаса, сценкань няфтемаса асувонц. Тяконь лувксса и Саранскяйста Галочкиттнень семьясна.

 

Пцтай сембе семьятне-участникне лама иденнетольхть. Ламоц тядятне-алятне эсь идьтост башка касфтыхть приёмнай, опека алу сявф шабат. И сембе ня оцю семьятнень эса азорондайхть трудти, спортти, эряфонь шумбра койхненди кельгомась, фкя-фкянь шарьхкодемась, фкя-фкянди и лиятненди лездомась, стакада-сталмода аф пелемась.

 

21 сентябрьста, ёткшиста, Саранскяйса Культурань республиканскяй Дворецса шумордавсь «Вернуть детство» окружной фестивальсь и  азфоль «Успешная семья Приволжья-2019» конкурсса сяськи семьясь. Тя лемть сатозе Удмуртияста Русскихнень лама идень семьясна. Омбоце вастса Оренбургскяй областьста Дудникофнень, колмоцеса—Пензенскяй областьста Бурцефнень семьясна. Мордовияста Галочкиттне сатозь зрительскяй симпатиянь призть и арасть инь цебярькс «Доброе сердце» номинацияса.

 

Пуромфнень инголе корхтасть Российскяй Федерациянь Президентть Приволжскяй федеральнай округса Полномочнай представителенц заместителец О.А.Машковцев, Российскяй Федерациянь Федеральнай Собраниянь Федерациянь Советса Мордовия Республикань государственнай властень исполнительнай органть эзда представительсь, Федерациянь Советть Международнай тефнень коряс комитетть председателенц васенце заместителец С.И.Кисляк, Мордовия Республикань Правительствать Председателец В.Ф.Сушков.

 

Т.АЛЬШИНА.

 

Фототне Н.КАРАНОВОНЬ.

 


26.09.2019 №38
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин