Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Национальная тематика

«ШУМБРАТ, ПОДМОСКОВЬЕ!» ФЕСТИВАЛЬСЬ ТУСЬ СЕМБОНЬ МЯЛЬС

Эсонза примасть участия Пушкино ошень округонь эряйхне, Ялгаксшинь кудть активистонза, областной и районнай властень органонь представительхть, ошень эряйхть, инжихть.

 

Фестивальть организаторонза—Московскяй областень Мокшэрзянь национально-культурнай автономиясь (председателец Д.И.Макайкин), Московскяй областень Пушкинскяй райононь Ивантеевка, Красноармейск и Королёв ошнень эса  Мокшэрзянь национально-культурнай автономиясь (председателец Н.С.Леванов).

 

Пуромксть панжезе Пушкинскяй муниципальнай райононь оцюнять аф лама пингс тевонзон тиендисна А.В.Тимошин.

 

—Нинге кунара лама нациянь оцюдонга оцю Россиясонк марса трудендасть и ваймосесть разнай народонь представительхть. Аньцек марса, фкя-фкянди лездозь, тейнек ули кода сатомс Подмосковьяньконь, Россияньконь панжемаснон и цебярь эряфснон,—мярьгсь Алексей Викторович.

 

Сон азсь благодарностень валхт фестивалень инжихненди, конат састь Подмосковьять ламоц уженянзон эзда. Сяда тов вал максфоль Московскяй областень Пушкинскяй райононь Ивантеевка, Красноармейск и Королёв ошнень эса  Мокшэрзянь национально-культурнай автономиять  Правлениянц председателенцты, мокшаляти Н.С. Левановонди.

 

—Оцю мяльса васьфттядязь инжиень примай пушкинскяй модать лангса «Шумбрат, Подмосковье!» национальнай культуратнень Московскяй областень III фестивальсост. «Шумбрат» валсь мокшень и эрзянь кяльхнень эзда ётафтови кода «здравствуйте»! Тя фестивальсь лувондови кельгома Подмосковьяньконь народонь ялгаксшинь праздникокс! Эрьда мярьктяма фкя-фкянди: «Шумбрат, Подмосковье!»—мярьгсь пуромфненди Н.С.Леванов.

 

Николай Семёновичень валонзон коряс, Пушкинскяй районца Мокшэрзятнень землячествасна эвондась 15 кизода инголе. Активистонза примсихть участия марнек Подмосковьянь пуромкснень эса и, эрямок тяса, аф юкснихть родной кяльть, койхнень-обуцятнень и культурать колга. Синь, кода и Российскяй Федерациянь сембе граждаттне, эряйхть ялгаксшиса, марса.

 

Тя шиня «Берёзовая роща» паркть площадканц лангса пуромфне содафтовсть мокшэрзятнень ремесласнон: шуфтть лангса керсемать, ёмла ожнаста мокшэрзянь мазомтоматнень кодамаснон мархта. Тяса ульсть книгат эрзятнень и мокшетнень, Мордовиять историянц и культуранц колга. Ярмаркаса мишендевсть мокшэрзянь масторса тиф ярхцамбяльхть, национальнай сувенирхт.

 

Идень площадкаса аниматорхне шабатнень мархта налхксесть национальнай налхкомаса: «Руцяняса», «Кругса», а стане жа—«Кяскавса тюремаса».

 

Пуромфнень инголе корхтасть Московскяй областень Мокшэрзянь национально-культурнай автономиять председателец Д.И.Макайкин, Мордовскяй (мокшень и эрзянь) народть Межрегиональнай общественнай организациянц ответственнай секретарец О.В.Дулкин, Моску ошень Мокшэрзянь землячествать исполнительнай директороц О.В.Ишуткин, лиятне.

 

Сембонь мяльс пяк тусь концертсь. Пингстонза кштисть-морасть Российскяй Федерациянь Президентть видеса Мордовия Республикать Постояннай представительстванц «Азорава» фольклорнай коллективоц, «Мировые таланты» конкурсонь дипломантсь, I степенень лауреатсь «Баяраваня» межэтническяй ансамбльсь, Московскяй областень Мокшэрзянь национально-культурнай автономиять солисткац, мокшавась Мария Шумкина, Мытищи ошень «Валдоня» идень хореографическяй группась, «Эх, мордовочка!» фольклорнай ансамбльсь, «Эрзянь вайгель» фольклорнай коллективсь, лиятне.

 

«Шумбрат, Подмосковье!» Московскяй областень национальнай культуратнень III фестивальсна ётась 21 сентябрьста. Тя шиня эрь кизоня уленди православнай пяк оцю праздник—Пресвятой Богородицать Шачемац. Пушкинскяй райононь церькафнень благочиннайсна, протоиерейсь Иоанн Монаршек эсь поздравлениясонза шарфтсь мяль сянди, што мокшэрзянь модась максозень Россияти пяк содаф ламоц ломаттнень, спортсметтнень. Сяда тов протоиерейсь Иоанн Монаршек казсь Н.С.Левановонди Спасительть и Божией Матерть образснон мархта складень.

 

Шумордавсь фестивальсь сиде моронятнень и гармониять коряс кштиматнень мархта.

 

Т.АЛЬШИНА.

 


03.10.2019 №39
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин