Поиск по сайту: 
 

Архив
 октябрь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Национальная тематика

ЛЯТФНЕМАТ В.М.ШУКШИНОНЬ КОЛГА

Нинге ВГИК-са тонафнемста налхкозе главнай рольть «Два Федора» кинофильмаса. 35 кизоса сонць ушедозе снимандамонза васенце полнометражнай фильмать, кона тусь ваныхнень мяльс. Пингонь етазь лиссть сонь содафтонга содаф «Печки-лавочки», «Калина красная» фильманза, коса сон сонць налхкозень главнай рольхнень. Седиень токайхть ульсть и лия фильманза.

 

Василий Макарович, кода корхнихть, пильгонек-прянек  патриотоль, родной масторонь, народонь ломанель. Нинге ВГИК-у поступамда инголе етась эсь лацонь университет—работась колхозса, стройкаса, служась флотса, ульсь учителькс, комсомолонь  райкомонь секретарькс.

 

Кинорежиссерсь А.Митта азонды: «ВГИК-са экзаменца  Ромм корхтай Шукшинонди: «Ну, азонтк, кода марязе прянц Пьер Безухов Бородинскяй сраженияса». Шукшин отвечай: «Тянь мон ашине лувонда. Пяк эчке  книжкась». Ромм дивандазевсь: «Тон мезе, эчке книжкат ефси аф лувондат?» Шукшин отвечай: «Аф, фкя лувонь. «Мартин  Иден». Ромм мярьгсь: «Кодама тон школань директорат? Тон аф культурнай ломанят». И тяса апак учентт Шукшин кармась сонь лангозонза юватькшнема: «А тон содасак, кие стамсь школань директорсь? Васенда пенгат тялонди председательть кядьста анак, меле ускить и лазондыть. Учебникт добувак, партатнень петить… Кодама ни тоса книжкань лувондома!» Ромм кулхцондсь-кулхцондсь и корхтай: «Аньцек пяк талантливай ломанць может тяфта ваномс эряфть лангс. Мон теенза путан вете».

 

В.М.Шукшин снимандавсь 20 киноса. Но народть еткса теенза видексонь кельгомась сась аньцек куломдонза инголе, мзярда экранца эвондась «Калина красная» фильмась.

 

Василий Макарович кулось «Они сражались за Родину» кинофильмать снимандамста, кулось одста, сон пяшксель творческяй вийда.

 

Сяс мес Шукшинонь ульсь фкя и сяка «РСФСР-нь искусствань заслуженнай деятель» званияц, калмалезь сон Введенскяй калмотненди, но Сергей Бондарчук якась приемс Косыгинонди.

 

В.М.Шукшинонь калмазь Новодевичьяй калмотненди.

 

Минь, мокшетнень и эрзятнень, таколфтсамазь ся, китольхть Василий Макаровичень тядянза-алянза. И тя аф стак. Улихть стама мяльхть, што Шукшинонь аф аньцек фамилияц мокшэрзянь, но и веронц кой-конашка талекац. Щятяц Сергей Федорович Попов, кле, мордвиноль. Кие содасы, пади, тя афкукс тяфта?

 


03.10.2019 №39
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин