Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Наши мокшанские сыновья и дочери

ПАВАЗ И ШУМБРАШИ ТЕЙТЬ, ФЁДОР АНДРЕЕВИЧ!

Ф.А.Гавриловонь лемоц лац содаф лувиеньконди. Но, арьсетяма, аф эльбяттяма, кда юбилейстонза нинге весть лятфтасаськ: коса шачсь и кассь, эряфонь и трудовой кодама ки етась.

 

Федор Андреевич шачсь-кассь 1949 кизоня Ковылкинскяй райононь Од Толку велеса мокшень простой семьяса. Тонафнесь велень школаса. Эряви азомс, тонафнесь цебярьста. Сидеста сонь можналь няемс велень библиотекаста. Нинге шабакс пяк кельгозе родной кяльса книгань, газетань и журналонь лувондоманц и ульсь оцю мялец варжамс эсь творческяй виензон. Школаса тонафнемстокивок ушедсь васенцеда «районкав», а сяльде республиканскяй газетатненди серматкшнема. Няелесте, конашкава кенярдезь сон васьфнезень газетань ся номерхнень, коса печатлафтольхть аф оцю заметканянза.

 

Тя ульсь теенза цебярь школакс: тонадсь сяда келиста ванома эряфть лангс, сяда марямонза родной кяльть-валть таньфонц, сяда лац шарьхкодемонза эсь народоньконь ваймонц.

 

Средняй школать аделамда меле од церась сай Саранскяи и поступай тонафнема Мордовскяй госуниверситетонь историко-филологическяй факультету. Тонафнесь кепотьф мяльса, старандась сяда ламоне содамс и сяда крхкаста. Сон эстокиге ни содазе, мезе ерай сатомс эряфса.

 

Вузть шумордамдонза меле аф кржа киза седикс-ваймокс покодсь васенда «Трудовая правда» старошайговскяй районнай газетаса, а сяльде—«Мордовия» государственнай телевизионнай и радиовещательнай компанияса.

 

Тейнек тячи пара азомс, што Фёдор Андреевич 17 киза эсь эряфстонза макссь «Мокшень правда» газетаньконди. Нльне стака лувомска, мзяра тя пингста казьф мокшень лувихненди сонь вийсонза аноклаф седиень токай статьяда, репортажда, зарисовкада, очеркта, интервьюда, лия жанрань материалда! И эздост кажнайти сон путозе эсь седиень пяльксканц, Шкайть мархта  максф талантонц. Эздост няеви пефтома кельгомась мокшэрзянь краеньконди, ломанти.

 

Нильгемоньда лама киза Ф.А.Гаврилов вярьгак, гордостень марязь кандозе журналистонь лемть. Тя пингста сатсь оцю уважения и авторитет кода республикань журналисттнень, стане и лувихнень еткса.

 

Эрь ломанть улихть сельмос пови эсь лацонь тяштьксонза, конат тиендьсазь приметавикс лиятнень еткса. Кда кизефтельхть, мезсь васендакиге шарфни мяль Фёдор Андреевичень эса, ламоц содаенза азолезь: пара ваймокс улемась. Сон мзярдонга аф уленди оцюлгофникс, прянь няикс. Корхнят мархтонза—юксневихть сембе стакатне-сталмотне, арси теждя ваймозт. Сяс сонь лама ялгадонза, седишкава кельгидонза.

 

Минь тячи эсь мокшень газетаньконь вельде седи ваксста поздравляндатядязь тонь, кельгома Фёдор Андреевич, 70 кизонь юбилейцень мархта и азонттама тейть тяфтама валхт:

 

Эряк, кельгома ялганьке, тазаняста, ламоняс и кельгозь!

 

«Мокшень правдаса»

 

покоди ялгатне.

 


03.10.2019 №39
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин