Поиск по сайту: 
 

Архив
 октябрь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Юмор и сатира

УРМА

Ёжу алясь счетоводоньке. Мяляфкшу. Апак эльбятть азсы, мзяра каруда лиенди кабинетса. Кда вальмава сувси кемонцесь или комозцесь, Лёля кулевиста калтадьсы счётонь нинге фкя шарынять. И тага мзярошкаска сютями вастозонза.

 

Рабочай шить аделамда меле Лёля вастстонза стякшни сяшкава аф мяль вельде, мярьгат, срхкай аф куду, а поликлиникав пеень таргафтома.

 

Тячивок куфцезь-ляксезь пачкодсь куду. Ярхцась-тись и озась кельгома вастозонза—телевизорть инголи. А экранца минь хоккеистоньке налхкихть чехнень мархта. Миннетне шайбать сувафтозь чехнень ортас. Трибунатненди озсефне цяпайхть кятть, ктморяйхть фкя-фкянь. А Лёлянь улоц педсь мяштезонза—крфоц алять. Кельгсыне сон спортивнай передачатнень. Синь ванондомстост, кле, сяда курок матодоват.

 

Веть сргозсь Лёля.

 

—Санда!—пешкодсь рьванцты шапама вайгяльса.

 

—Мезе?—комотсь ся вастстонза эвотьфста и няезе киякс кучкаса ащи мирденц.

 

Ватта пекозе конашка.

 

—Тьфу! Мон арьсень мезе. А сон пекоц. Деряй аф таргозят, кда шинь-шинь апак шерьхк ащекшнят. Омбоце недялясь ни кошяряте лазондомс пенгятнень, а тон ся шири афи кулят.

 

Санда—коськана, отькорь аванясь—ушедондяряй изгордома— валхне кургстонза синць лиихть.

 

—Пенгятнень тяникиге лазондсайне,—пшкядсь Леля.— Коса узерсь?

 

—Ожу, ожу,—абондсь Санда.—Коза молят веньгучкать. Ва валдашкоды, эста и кярьмотть тевс.

 

—Аф. Тяникиге!

 

Лёля тага весть эвотьфста варжакстсь эсь кувалмованза—ёразень няемс пильге  лапанзон—да пеконц эшксста синь исть няев.

 

Рьвац ванць лангозонза дивандазь: кодама пуром пупазе мирденц?

 

А мирдец аньцек тяни няйсь он. Бта ащи телевизорть инголе. Экранца акша халатса ава луви лекция, кода спортсь и трудсь кемокснесазь ломанть шумбрашинц. Сяльде экранцта лиссь равжа сакал аля, кядьсонза пеель. Маладсь Лёлянди, токафтозе пееленц сянь пекс, мярьгсь:

 

—Архт лазондыть пенгятнень, ату пекцень лазса.

 

Лёля сргозсь. Арьсекшнесь-тись. И юпадсь вастстонза.

 

Да, тяфтама онць аф стак. Афкукс, теенза шукадема куяняц.

 

Ульсь шобда ве. Велесь удось. А Лёля кудбоксонза яфиесь узерьса. Лазондсь пенгат.

 

Михаил МОИСЕЕВ.

 


03.10.2019 №39
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин