Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

НАЦИОНАЛЬНАЙТЬ ВАНФТОМАНЦТЫ—БАШКА МЯЛЬ

Залу пуромкшнесть республикань инь отькорь, эрьгав, инголи аф пелезь моли мокшень и эрзянь од ломаттне. Етксост артистт, музыкантт, журналистт, студентт. Синь—мокшэрзянь народть сай пингоц. Эрь шиня ня стирьхне-цератне эсь примерснон вельде няфнесазь, кода эряви ванфтомс, касфнемс-виияфнемс этнокультурнай козяшить.

 

Пуромксса примасть участия Мордовия Республикань культурань, национальнай политикань и архивнай тевонь министрть васенце заместителец А.И.Карьгин, Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин, организациять Исполкомонц председателец А.С.Лузгин и лият.

 

Форумть пингста ванфоль аф кржа кизефкс. Васенцесь еткстост—пуроптомс Мордовияса мокшэрзянь од ломаттнень организацияснон. Форумонь участникне фкя мяльса кирдезь тя пара тевть ширенц. Примафоль решения Мордовскяй (мокшень и эрзянь) народть Межрегиональнай общественнай организациять видеса пуроптомс Мокшэрзянь од ломанень совет. Тя арай васенце аськолксокс мокшэрзянь од ломаттнень общественнай организацияснон пуроптоманцты. Ю.А.Мишанин азозе, кие сувась Советти, а стане жа китькстазе, што кенкшне тяза панжадот сембонди, кинь ули мялец сувамс организацияти. Учендовихть од ломаттне, конатнень аф кадондсыне озадонь седихть ащекшнема культурать виияфнемац, кяльть ванфтомац.

 

Пуромксса оцю мяльса кулхцонтфоль МР-нь культурань Заслуженнай работникть, «Литова» эрзявань союзть председателенц Р.Б.Щанкинать докладоц, коса сон азондсь, кода тонафнезе эсь родонь-плямань историянц, кошардозень од ломаттнень мяляфтомс эсь юрснон колга, вдь, кода мярьгсь Раиса Борисовна, ётай пингфтома аф ули сай пингоньке.

 

 Ламоль таколдозь корхтамада сянь колга, што тяниень пингть од ломаттне аф фалу корхнихть эсь родной кяльсост, юкснесазь сонь. Лоткафтомс тянь ули кода, кда тиемс кяльть тяниень пингоннекс, виияфнемс сонь интернетса. Тянь квалма пуромфнень инголе корхтась Саранскяень 13№ средняй общеобразовательнай школать директороц А.А.Учеваткин.

 

Форумса корхтафоль аф аньцек од ломанень политикать, но и лингвистикать колга. Тядде мокшэрзянь васенце грамматикати топодсь 180 киза. Аноклазе и нолдазе сонь профессорсь-лингвистсь П.П.Орнатов.

 

О.Евдокимова.

 


17.10.2019 №41
 
 
 

 
НОВОСТИ

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 
 
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин