Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Ю.М.ДЁМКИН: "Роднойти фалу лажадозь"

Аф фкя киза Юрий Михайлович вятьсы Тольятти ошень Мокшэрзянь культурнай центрать. Тяда башка, сон Тольятти ошень Ошень Думань культурань кизефкснень коряс Общественнай советть членоц, Тольятти ошень округонь оцюнять национальнай кизефкснень коряс советникоц,  Мордовскяй (мокшень и эрзянь) народть Межрегиональнай общественнай организациять Исполнительнай комитетонц членоц. Ю.М.Дёмкин вяти оцю тефт ширеса эрямста мокшень и эрзянь кяльхнень, культурать, койхнень-обуцятнень ванфнемаснон коряс.

 

Аф кунара Юрий Михайлович тага ульсь Мордовияса, сувсесь инжикс и минь редакциязонк. Корреспондентоньконди удалась  ламонь колга корхнемс мокшалять мархта. Тяконь лувксса макссь кизефкст Мордовскяй (мокшень и эрзянь) народть Межрегиональнай общественнай организациянц VII съездонц колга, кона маластонь шитнень етай Саранскяйса. Ю.М.Дёмкин сувси съездонь делегаттнень лувксс.

 

—Юрий Михайлович, кодамот мяльхне-арьсематне малаткшни пуромксть—Мордовскяй (мокшень и эрзянь) народть Межрегиональнай общественнай организациянц VII съездонц колга, мезе учендат эздонза и кодама кизефкст кеподят ваномс, кда тейть максови вал?

 

—Съездсь тага арай васедема вастокс странаньконь келес эряй мокшетненди и эрзятненди. Кажнайсь сай эсь сярятьфонц-пичефксонц мархта и надияй, што азфоц сявови мяльс. Съездсь, койсон, сянкса и арьсеф, штоба тейнек удалаль кулемс и шарьхкодемс фкя-фкянь.

 

Кода фалу, ули кепотьф лама таколфты кизефкс. Мезень колга  мялезе корхтамс? Лама мезть. Кода ванфтомс кяленьконь, культураньконь, кемокснемс соткснень ширеса эряй мокшэрзятнень мархта и стак тов. Корхталень и сянь колга, штоба общественно-политическяй эряфти водендакшневоль кода можна сяда лама од ломань. Синь—минь сай пингоньке, эздост ламода ащи ся, кармай-аф сяда тов ванфтовома национальнай козяшиньке. Тяда башка, койсон, сяда оцю мяль эряви шарфтомс семьять лангс, вераньконь ванфтоманцты.

 

—Тондедот башка, Тольятти ошста мзяра нинге делегат сай съездс?

 

—Тольяттиста карматама нилененк. Сембоц Самарскяй областьста сай 21 делегат. Лия региоттнень еткста Самарань делегациясь ули инь оцюкс.

 

—Юрий Михайлович, пара улель, кда азондолеть Тольятти ошень Мокшэрзянь культурнай центрать тевонзон-заботанзон колга.

 

—Центрати тядде топодсь комсь киза. Мон арань теенза вятикс 2013 кизоня. Тяниень пингть организациязонк сувси ниле тежяньда лама ломань. Тя сят, кинь седисна палозь палы сембе минценнеть инкса, кит Мордовиять эзда сядот вайгяльбень вастса эрямстовок аф юкснихть эсь унксснон колга. Ётксонк лама од стирьда-церада.

 

Эрь кизоня Центраньке етафни нильгемоньда лама мероприятия, конат водендафт аф аньцек кяльть, национальнай койхнень-обуцятнень ванфнеманкса, но и межнациональнай согласиять кемокснеманкса. Тольяттиса эряйхть 130-да лама национальностень представительхть и етксост фалу ванфневи ялгаксшись. Тянди ламода лезни «Мы вместе—Россия» проектсь.

 

Мокшэрзянь культурнай центрась мольфти марстонь тефт образованиянь и культурань ошень учреждениятнень мархта. Ладяфт кеме соткст Мордовия Республикань Культурань, национальнай политикань и архивнай тевонь министерствать, Финно-угорскяй народонь культурань Поволжскяй центрать, Мордовскяй (мокшень и эрзянь) народть Межрегиональнай общественнай организациянц мархта.

 

Кода ни азыне, организацияньке ётафни лама мероприятияда, конатнень еткса васедемат, «круглай шрат», конференцият. Сидеста примсетяма участия ошень илатнень эса. Центрать видеса пуроптф «Лайме порась» мокшэрзянь фольклорнай коллективсь. Мазы вайгяль аватне, стирьхне, алятне кеняртьфнесазь Тольяттинь эряйхнень рузонь, мокшень и эрзянь мороса. Эрь пуромксс ансамблень морсихне наряжакшнихть национальнай щамса.

 

Центрась оцю мяль шарфни спортти. Улихть од ломанень и эряфкшувонь футбольнай команданьке. Эрь кодама пялькстомаса выступандакшнетяма Мордовиянь флагть ала.

 

2013 кизоня Мокшэрзянь культурнай центрать видеса пуроптфтольхть мокшень и эрзянь кяльхнень тонафнемаснон коряс курст. Тольятти ошень эряйхнень ёткса мувсь аф кржа ломань, конатнень оцюволь мяльсна тонафнемс родной кяльснон. Урокне лихневсть организацияньконь сайтозонза, синь ульсь кода ваномс сембонди, кинь мялец. Занятиятнень лангс мяль шарфтсть аф аньцек Самарскяй, но и Пензенскяй, Ульяновскяй областтнень эса, Екатеринбургса, Нижняй Новгородса, Москуса, Санкт-Петербургса и нльне омба масторса: Эстонияса, Финляндияса, Японияса.

 

Тяниень пингть курсне аф вятевихть, сяс мес аш тонафтыхть. Кда мувольхть синь, минь оцю мяльса эреклафтолеськ тя пара тевть.

 

—Юрий Михайлович, азонтк, кода эряфонь китне-яттне пачфтедязь Тольятти ошу?

 

—Одста тунь Тольяттив тонафнема, меле лядонь работама, пуроптонь семья. Комозьда лама киза ни эрян тя ошса.

 

—Тонць пяк лац корхтат мокшекс, а иттне содасазь мокшень кяльть?

 

—Содасазь. Мзярда улендихть Атерьса бабаснон ширеса, пара мяльса корхнихть мокшекс.

 

—Ёмла родинасот сидеста улендят?

 

—Атери старандан сашендомс эрь ковня. Тяса эряй тядязе, лама раднядон и ялгадон. Атери фалу уски седиезе.

 

—Спасиба, Юрий Михайлович!

 

О.КОЛЕДИНОва.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022