Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Национальная тематика

МОКШЭРЗЯНЬ КРАЙТЬ МАЗЫ ВАЙГЯЛЬ ЦЁФКСОЦ

—Галина Николаевна, пара улель содамс, коса шачеть-касоть, китольхть тядятне-алятне?

 

—Ёмла родиназе Старошайговскяй райононь Красная Уржа поселкась. Касонь простой рабочаень семьяса. Алязе, Николай Яковлевич, эряфоньберьф трудендась колхозса, ульсь фермань заведующайкс. Тядязе, Валентина Ивановна, работцесь дояркакс. Родительне шачфтсть-трясть сисем итть, мон ёткстост сембода оцюсь. Эзрайть эзда, шарьхкотьф, вешфксське сяда оцюволь: мон и кудонь, и перень тевса васенце лездыселень, и емла сазоронь-дуганонь ванниелень. Уржаса  аделайне начальнай школать, а меле тонафнень Краснай поселкаса. 9-10    класснень шумордайне Вертелимса. Велесь эздонк ащесь кемонь вайгяльбень вастса. Цебярь погодаста ялгань келеса пачкотькшнеме велосипедса, а мзярда ушеткшнесть сёксень пизепне-рдасне, а меле—тялонь фальхне, эряме интернатса.

 

—Тяни улендят шачема велесот?

 

—Пяк ужяль, но Уржась срадсь-каладсь нинге лама кизода инголе. Тядязень мархта алязе 1985 кизоста сявомок ни эряйхть Саранскяйса. Лацост стане жа тушендсть кие коза и лия велеряйхне. Инголи веленьке пяк оцюволь, тяса ульсь вии хозяйства. А кодама мазы вастса ащесь сон, перьфпяле туста вирьхть, кели  паксят. Тя мазышись тячемс шоворькшни онозон. Сяс, улема, и касонь вирень кельги ломанькс.

 

Тячи пачкодемс Уржав пяк стака. Ки ефси аш. Но седиезе сембе сяка уски эсон тя аймаку. Мон сидеста улендян Старошайговскяй райононь Сарга велеса, коса шачсть-кассть ялгане, сашендан ширезост инжикс.

 

—Тячи тон содаф артисткат. Кинь лаца туть тяфтама вайгялюкс?

 

—Родсонк-плямасонк аф кржаль морайда. Морсесть щавазе, бабазе, мазы вайгялец алязень. Эздост, улема, и етась тейне морамань асусь. Школаса фалу морсекшнень ётафневи пуромкснень, илатнень эса.

 

—Тяддень кизось тейть юбилейнай: 40 киза топодсь ся пингста, кода ушедоть морсема «Келу» ансамбльса. Кода повоть тя коллективу?

 

—Эста мон аньцек-аньцек шумордайне школать. Ся пингть мокшэрзянь содаф композиторсь Г.И.Сураев-Королев сась мяльс пуроптомс профессиональнай коллектив («Келу» самодеятельнай ансамбльсь пуроптфоль нинге 1963 кизоня), коса морсикс мялецоль няемс велень простой ломаттнень. Георгий Иванович якась велетнень эзга, кочксесь морсихть. Кулхцонтфолень монга, вайгялезе тусь мялезонза и мон примафолень коллективу. Тя ульсь тейне аф азовомшка оцю кеняртьксокс. «Келуть» творчестванц колга содань тяда инголе ни. Артисттне улендсть велесонк, морамаснон сидеста кулендине радиоса. Повомс еткозост ульсь оцюдонга оцю и, тяка пингть, аф верондафты павазкс. «Деряй, сафтови тейне синь лацост?»—арьсень. Но тевозе лиссь, и тячи «Келусь» тейне кода омбоце семьязе.

 

—Коллективть мархта васенце командировкацевок, пади, тячемс мялямсот?

 

—Афкукс тяфта. Пуроптомдонк меле пяле киза анокламе концертнай программа, меле няфтеськ сонь Темниковскяй райононь эряйхнень инголе. Выступленияньке ётась лац. Тя тейне бта пацят макссь.

 

—Гастрольхть, командировкат… эздост тя пингста, улема,  ульсь пяк лама, тяконь лувксса омба масторсовок?

 

—Виде.  Улеме Германияса, Швейцарияса, Францияса, Финляндияса, Швецияса, Эстонияса. Ётаськ пцтай сембе российскяй ошнень. Омба масторса фалу примсемазь пяк лямбоста. Тостонь эряйхне кельгсазь национальнай культурать, живой морамать. Салсесы мяльснон мокшэрзянь лама вайгялень пентатоникась, дивандафнесазь щамоньке-карямоньке. Ламос мяляфтовикс лядондыхть ширеса эряй мокшень и эрзянь ломаттнень мархта васедематне. Синь хуш тусть Мордовияста лама кизода инголе, шачема масторснон колга аф юкснихть, мяльсна сяда ламоня содамс кода эряй республикась, сонь сатфксонзон колга.

 

—Галина Николаевна, азонтт аф лама семьяцень колга.

 

—Монь кафта идне, кафта уноконе. Стирезе, Елена, работай идень садса воспитателькс. Тевоц салсесы мяленц, сяс мес сон пяк кельгсыне шабанятнень. Лена аделась мокшэрзянь курст. Садикса ётафни аф кржа национальнай ила, сонць пуроптсь мокшэрзянь культурань уженя. Церазе, Игорь, работай ресторанца поваркс.

 

—Лисенди, иттне ашесть ту тонь лацот творческяй киге.

 

—Идне кафцьке аделасть музыкальнай школа, а сяда тов эряфсна музыкать мархта ашезь сотнев. Маша уноконязень пяк мазы вайгялец, арьсян, хуш сон поладсы тевозень.

 

—Ётка пингста мезьса занцят пря?

 

—Кода ни азыне тяда инголе, пяк кельгса вирть, афи лисенделень тоста. Нльне урмане-сярятьфоне сетьмосихть шуфтонятнень ёткова якамста. Пара мяльса кочксян панкт, имошт. Меле эздост тиендян лама мезе танцтиня, каванякшнесайне семьязень, ялганень.

 

—Саранскяйса улихть кельгома васттне?

 

—Тячи республиканьконь столицац шарфты европейскяй ошень лангс. Нльне стака азомс башка мазы васта, Саранскяйть эрь уженяц салай сельмованф. Тушенды мялезон, мес ошсонк лама вастта, коса ули кода ваймосемс, ётафтомс пингть шабатнень мархта. Монць пара мяльса якан театрав.

 

—Галина Николаевна, тон лама киза лувондсак и сёрматфнесак «Мокшень правда» газетать. Кодамот мяльхне-арьсематне изданиять колга?

 

—Азолине тяфта: газетась удалаф сембе ширде и мезьсовок аф лядонды фталу рузонь изданиятнень эзда, а кой-мезьса, шять, и инголясыне синь. Аньцек лиси газетать эрь номероц, эзк лувса сонь васенце страницаста сявомок мекольцети молемс. Тушендыхть мялезон анекдоттне. Лувсайне кудса, а омбоце шиня азонкшнесайне работай ялганенди. Пара, мес «Мокшень правдаса» макссеви лама советта кода шумбрашинь кемокстаманкса, стане и перень, куд пирьфонь тевса. Оцю мяльса лувондсайне велень ломаттнень колга зарисовкатнень, кулятнень.

 

Мялезе кошардомс серматфтомс «Мокшень правда» сембонь, кие нинге ашезе тие тянь. Кие, кда аф минць, мокшетне, сёрматфтсаськ и лувондсаськ родной кяльса-валса лисенди изданиять?!

 

—Спасиба, Галина Николаевна! Творческяй сатфкст тейть!

 

О.ЕВДОКИМОВА.

 


17.10.2019 №41
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин