М.С.Моисеевонь шачема шиста 80 кизонь топодемати

Сире Пяцерань школать аделамда меле Михаил Моисеев тушендсь Казахстанонь целинав. Сяльде покотькшнесь стройкаса, сахаронь тии заводса. 1962 кизоня сай Саранскяи. Кармай тонафнема Мордовскяй госуниверситетса. Няемок мокшень цёрать сёрмадомаса оцю асувонц, сявови работама «Мокшень правдав». Ульсь тяса литературнай сотрудникокс, корреспондентокс, отделонь заведующайкс.

Михаил Степанович пяк кельгозе сингоряманц-рахсеманц. Тя лац приметневсь сембонди, кие васьфнесь мархтонза. Фталга сонь мокшень журналисттне и писательхне лемнезь—Кячказ. И тя васендакиге сяс, мес «Мокшень правдаса» работамстонза М.С.Моисеев аноклакшнезе сингорямань и пеетькшнемань «Кячказ» уженять, коса сидеста печатлакшневсть сонцень юмористическяй азксонза, фельетононза, юморесканза. «Кячказть» ульсь сонцень мороняц: «Кячказ лемозе, няи сельмозе, кули пилезе, оржа кялезе. Кальдявть эряфста машфтомс мялезе».

—Ну и промоз,—корхнесть колганза.—Афи фатят, кода каяфтсы кедцень и тага кати-коза кяшсы шотонц.

Кячказсь виде кити мрдафнесь лама эрьготьфта. Сон фатнезе кядьта магазинцта продавецть, кона срхксесь килька вастс лувомс суронзон сталмоснон. Кятавгофнезень ирецтотнень, таргафнесь столбатнень прява электричествань канды провотт, штоба велеста теенза сёрмань тяштихненди илятевок улель валда. Тиендевсть лия тефт.

Кячказть портфеленц кандомаса Михаил Степановиченди лезнесть велень корреспонденттне Я.Тюрькин—Сомазляйста, И.Гуляйкин—Зайцяста, И.Сергушкин—Сире Пяцераста, В.Резепов—Вирь Келгужеста, а тяфта жа мокшень писательхне М.Бебан, М.Сайгин, А.Тяпаев и лиятне.

Сяльде, 1972 кизоня, Мордовскяй книжнай издательстваса нолдафоль пеетьфти азксонь книганяц. Лемоц—«Кячказ». Тя книганясь арась васенцекс писателень творчествасонза, кона меле козякофтовсь ламоса лияса. Лувись лямбоста примазень «Атёкшень шонгарям», «Куцемат и сюцемат», «Колма горенцят», «Пяльди вармат» книганзон.

Тусь лувихнень мяльс Михаил Моисеевонь стихонь и поэмань «Кельгомань пинге» сборникоц. 1977 кизоня сонь лиссь «Оду аф няйсамасть» сборникоц.

«Мокшень правдаста» М.С.Моисеев ётай Мордовскяй книжнай издательствав, кармай покодема тоса редакторкс. Аноклакшнезень мокшень писательхнень и      поэттнень книгаснон печатьс. Тияк сонцьке лама тяшнесь. Михаил Степанович лама пачфтсь-азондсь эсь земляконц, содаф мокшень ломанть, Советскяй Союзонь Геройть, легендарнай лётчикть Михаил Петрович Девятаевонь колга. Сон аф весть якась мархтонза республикань велеванк и ошеванк. Ня якаматнень пингста Моисеев лац кармась содамонза Девятаевонь марнек эряфонц, сяс и лездсь теенза анокламс «Побег из ада» книганц, лац-ряц азондомс лувихненди, кода тюрсь лётчиконьке фашисттнень каршес, кода ворьгодсь ялганзон мархта врагонь самолётса Родиназонза, кода вятсь военно-патриотическяй работа од ломаттнень ёткса войнада меле.

Книжнай издательствада меле, Михаил Степанович тага аф кржа пинге покодсь «Мокшень правдаса».

Кулось М.С.Моисеев 2012 кизонь мартста ламос сярядемда меле 73-це кизонц лангса.

«Мокшень правдаса» покоди ялганза.