Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Наши мокшанские сыновья и дочери

СЕРГЕЕВ? АФ, КОРОЛЁВ

Кунароль ся... Эста, мзярда Девятаев ворьгодсь концлагерьста, косоль вермахтть «Пенемюнде» ракетнай центрац, и «хейнкельса» валгсь советскяй войскаса заняф модать лангс, миннетне няезь: самолетсь од конструкциянне. И кармасть ванондомонза-тонафнемонза врагть военнай од техниканц. А фкя полковниксь—Сергееволь фамилияц—Девятаевонь кизефнезе и кизефнезе. Кода кеподевсь, кода увнась мотороц, мезе няйсь-кульсь фашисттнень машинаснон колга лийкстама вастса. Ворьготьф узниксь азондсь, азондсь. А Сергеев тиендсь тяштьфкст блокнотозонза. Сонць Девятаевонь лангс ванць ужяльдезь. «Тяшкава муцяф, осалня... Кода ваймоц кирдсь?» Сяльде Сергеев люпштазе Девятаевонь кяденц, вадердазе лафтус:

 

—Спасиба тейть. Мон карман мяляфтомот...

 

И вага ся Сергеевсь тага инголенза. Экранца. Бта мархтонза шумбраксни и кизефни: «Ну кода, орёл, тефне?»

 

Сергеевонь маласа лямбоста мзолды миронь васенце космонавтсь Юрий      Алексеевич Гагарин. Космодромста, толонь пулонь кадозь, вяри куцезевсь космический ракета...

 

Телепередачась стаки моли. Дикторсь азонды советскяй ракетнай техникать касомань-вииямань кинзон колга. Но... Сергеевонь кати-мес лемнесы Королевкс, главнай конструкторкс, академикокс.

 

И шарьхкодсь Девятаев. Эста «хейнкельть» и «Пенемюндеть» колга сонь кизефнезе тя главнай конструкторсь, академиксь Королев. А Сергеевкс лемнезь сяс, мес ашель кода азонкшнемс афкуксонь фамилиянц. Ся военнай тайналь.

 

1987 кизонь октябрень фкя шиня Девятаев тейне звонясь Казаньцта:

 

—Тячи илять Всесоюзнай телевидениясь няфти од фильма. «Риск» лемоц. Ванка.

 

Фильмась ушедсь советскяй и США-нь правительстватнень оцюняснон Рейкьявикса васетькшнемаснон эзда, сянь эзда, конашкава важна самс кафцьке ширетненди фкя мяльс-кяльс—аф пачфтемс тевть модань шаронь машфты войнас.

 

Няфневсть васенце ракетатнень «нюрямнясна», «Пенемюнде» фашистскяй ракетнай центрась, Вернер фон Браунонь лабораториянза.

 

Фильмаса лама геройда. Синь ётксост и академиксь Сергей Павлович Королев и Девятаев. Тозк азондови: бльшем, Девятаевонди Советскяй Союзонь Героень лемонь максфтомать колга хлопоцясь сонць Королев. Тянь кемокснесы и «Комсомольская правда» газетать 1987 кизонь 25 октябрень номерсонза «Риск» фильмать режиссероцка Дмитрий Барщевский, кона ванондсь теманц коряс лама архивнай материал, лац содазе Королевонь, лама корхнесь сонь раднянзон, мала ломанензон мархта.

 

Да, тяни содафокс араф советскяй ракетчикть, академикть Сергей Павлович Королевонь оцю тевса, космосу васенце спутникнень нолдафтомаса, кой-конашка лезкскя макссь Торбеевань мокшеське—Девятаев. И ся, няк, валонц кирдезе—ашезе юкста.

 

Михаил МОИСЕЕВ.

 

 


17.10.2019 №41
 
 
 

 
НОВОСТИ

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 
 
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин