Поиск по сайту: 
 

Архив
 январь 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Тема дня

МОРДОВИЯСЬ ПУРОПТОЗЕНЬ ЭСЬ ЦЁРАНЗОН И СТИРЕНЗОН

Мокшэрзянь народсь эсь оцю пуромкссонза тага весть няфтьсы Россиянь лия сембе нароттненди эсь ответственностенц Россиять судьбанц инкса, нинге весть кемокстасы, што минь васендакиге россияттама, а сяльде—мокшетама и эрзятама.

 

 

Съездса вановихть национальнай вельмофтемань тевса ламоц таколфты кизефксне. Оцю корхтама тяса кармай мольфтевома национальнай образованиять и культурать, национальнай печатть и книгань нолдамать, странань разнай региоттнень эса мордовскяй национальнай, культурнай автономиятнень и центратнень работаснон колга. Эрявикс мяль, конешна, шарфтови межнациональнай и межэтническяй отношениятнень одкстоптомаснон коряс кизефксненди, демографияти, 2020 кизоня ётафтови Всероссийскяй переписти.

 

 

Аф ули лишнайкс лятфтамс съездонь делегаттненди и инжихненди сянь колга, кода молихть мокшэрзянь крайсонк тевоньке.

 

 

Мордовиясь—аф оцю регионць. Но тяса ули сембось! И оцю технологият, и цебярьста вииякшни велень хозяйства, и эффективнай строительнай отрасля, и конкурентоспособнай пищевой промышленность. Минь лама и вишкста строятама кутт, кит, школат, больницят, идень садикт, тифт сембе условиятне массовай спортса занятиянь ётафнемс. 2018 кизоня республикаса эряйхне марса сембе странать мархта примасть участия футболть коряс Миронь чемпионатть ётафтомаса. Тя чемпионатсь, конань ниле матченза ульсть Саранскяйса, официальнайста лувф инь цебярькс сембе пингонь историясонза.

 

 

И ня пара тефнень, пара сатфкснень колга азондомать можна поладомс. И сембось тя ламода сатф сянь вельде, мес мокшэрзянь крайсонк цебярь общественно-политическяй климатсь, республикасонк эряй сембе национальностень ломаттне фкя-фкянь мархта эряйхть ладязь, фкя-фкянь шарьхкодезь и фкя-фкянди лездозь.

 

 

Шарьхкотьф, сембось тя сонць эсьотям аф сашенды. Тя корхтай сянь колга, што лама нациянь республикасонк лац-ряц арьсезь мольфтеви национальнай политикась. Кепотьксонди, Мордовияса и ширдень областтнень и республикатнень эса эряй         мокшэрзятнень ёткса ётафневи аф ёмла работа кяленьконь, коеньконь, культураньконь ванфтомаснон и виияфтомаснон коряс. Кода результат, сяда сргозькшни национальнай самосознанияньке, сяда ламотне ушеткшнихть аф виздема родной кяльса корхтамаснон, аф сёпондсазь эсь национальностьснон.

 

 

Но стакада-сталмода, прябалада тя тевса нинге лама и синь решандамаснон кадондомс одувонди аш кода, кда мяленьке аф аньцек ванфтомс, но и эреклафтомс, максомс од вайме кяльхненди, национальнай культурати.

 

 

Минь сембе учтама и надиятама, што мокшэрзянь народть васенце съездсонза, кона ётась 1992 кизоня, крьвястьф толнясь сядонга касы-виияй, няфтьсы кодама киге-янга молема сяда тов. Арьсетяма делегаттненди и инжихненди оцю работа, творческяй сатфкст и сембе цебярть эряфса.

 

 


24.10.2019 №
 
 
 

 
НОВОСТИ
 
 
 
 

Од ломаттненди азонтфоль РФ-нь Конституциять колга

12 декабрьста Мордовия Республикань Государственнай Собранияса ётась пуромкс, кона лемтьфоль Российскяй Федерациянь Конституциять шинцты. Госсобранияв сашендсть Саранск ошень 23№ гимназиянь и Рузаевкань 9№ школань тонафнихне. Тяса теест ётафтфоль экскурсия зданиять эзга, няфтьфоль Госсобраниянь музейсь, азонтфоль закононь нолни органть работанц колга. Тяда меле школьникне пуромкшнесть Оцю залса, коса синь мархтост васетькшнесь МР-нь Госсобраниять Председателец, «Единая Россия» партиять Мордовскяй региональнай отделениянц Секретарец В.В.Чибиркин. Владимир Васильевич пачфтсь од ломаттненди кода и мезенди примафоль Конституциясь, азондсь республикаса властень системать колга.

—Странаньконь фкя инь васенце законоц—Конституциясь примафоль аф тёждя пингста синцень странань эряйхнень мяльснон коряс,—азозе В.В.Чибиркин.—Эсонза кемокстафт ломанть праванза и воляшинза.

 

Российскяй Федерациянь Конституциясь примафоль 1993 кизоня. Тядде теенза топодсь 25 киза.

 

В.В.Чибиркин кошардозень од ломаттнень улемс эсь странань афкуксонь гражданинкс, кельгомс шачема масторснон. Тинь эздонт, мярьгсь Владимир Васильевич, ащи Россиять сай пингоц.

 

Сяда тов Российскяй Федерациянь Конституциять колга лекция школань тонафнихненди лувсь «Молодая гвардия «Единой России» ВОО-ть МРО-ц вятиенц тевонзон тиендисна И.А.Заугольнов.

 

О.ЕВДОКИМОВА.

 

 

 

13.12.2019
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин