Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

—Тяддень съездсь лувксс коре кармай сисемцекс. Тон, Александра Николаевна, фалу примсят эсост участия. Кодамот мяльхне-арьсематне ня пуромкснень колга?

 

—Койсон, тиендеви пара тев, мес мокшетне и эрзятне пуропневихть тяфтама форумс. Минь народоньке, кода содаф, эряй марнек масторть келес. Съезттне арсихть теест фкя-фкянь мархта васедема вастокс. Республикать эзда шири туф мокшэрзятненди тя тага фкя возможность самс эсь шачема-касома вастозост, сетьмофтемс кунардонь лажатфснон, няемс радняснон, ялгаснон, содафснон. Аш кода аф шарфтомс мяль сянди, што тяфтама пуромксне лезнихть касфнемс прямарямать. Съездста съездс няендьсаськ, кода касонды народоньконь гордостец эсь родонц-пляманц инкса. Лад арси седиезон, мзярда автобусса-коса кулендян аф виздезь мокшекс корхнемат.

 

Тага фкясь. Съезттне путсть ушеткс ламоц аф фкя лацонь мероприятиятненди, илатненди, конат маласькофнесамазь фкя-фкянди. Тяса мялезе лятфтамс «Волга—река мира. Диалог культур волжских народов» этнокультурнай экспедициять, коза пуромкшнихть странаньконь эрь кона уженясонза эряй мокшетне и эрзятне. Ётксост журналистт, ученайхть, артистт, художникт, писательхть и лият. Тяса минь сембе арсетяма фкя семья лаца, ламонь колга корхнетяма, тонафнетяма фкя-фкаста, латцетяма кеме соткст.

 

—Кода съездонь делегат, мезень колга кармат корхтама, кда тейть максови вал?

 

—Кода артистонь, монь, конешна, пичефтьсамань мокшэрзянь музыкальнай искусствать ванфтомац. Оцю мялезе, штоба концерттнень, илатнень пингста программати сувафневоль сяда лама мокшень и эрзянь мора. Арьсян, сядонга оцю мяль шарфнема «ёмла таланттнень»—шабатнень лангс. Асу итть улихть аф аньцек ошнень, но и ёмла велетнень эса. Пароль виензафтомс тяда ингольдень пара тевть, мзярда музыкальнай школатнень эзда ломаттне якальхть велетнень эзга и кочкселезь мазы вайгяль или тя или тона музыкальнай инструментса морамати венеми стирнятнень-цёранятнень, а меле тонафнелезь синь, виияфнелезь асуснон и маштомошиснон. Эста морамань культураньконь кармай сай пингоц.

 

Омбоцесь. Тейнек аф юкснема, што Мордовиясь сувси Российскяй Федерациянь субъекттнень ёткс. Тейнек эряма аф башка нациякс, а улема стама народкс, кона ладяй лиятнень мархта. Мушендома марстонь кяль, марстонь ширет. Республиканьке арси цебярь кепотьксокс, коса ладязь эряй 119 этнос. Фкя-фкянь шарьхкодемась и ширень кирдемась ванфтомат сяда товга.

 

—Александра Николаевна, тейть сидеста сашендови улендемс лия региоттнень эса, омба масторса. Мезе азолеть тоса эряй мокшэрзятнень колга?

 

—Васендакиге мялезе шнамс кяльс коре радняньконь и сюконямс пильгозост, мес лама киза ширеса эрямстовок синь лядондыхть мокшэрзянь стирькс и цёракс, аф юкснесазь родной кяльснон, ванфнесазь кунардонь пингонь койхнень-обуцятнень. Россиянь региоттнень эса лац работайхть национальнай общественнай движениятне, культурнай центратне. Аф кунара улень Татарстанца. Тоса пяк цебярь диаспораньке. Мокшетне и эрзятне ладязь эряйхть татархнень мархта. Республикань руководствась кирнесы мокшэрзянь организациять ширенц, максси финансовай лезкс национальнай праздникнень, пуромкснень ётафтоманкса.

 

Ширеса эряй мокшэрзятне пяк кеняртькшнихть Мордовияста артисттнень самаснонды. Пара мяльса кулхцонкшнесазь родной кяльсост кайги моротнень. А концертта меле малаткшнихть, лама кизефнихть республикать колга, кодама полафткст эвондасть тяса, тернихть ширезост инжикс. Ня ломаттнень мархта меле нинге ламос кирнетяма соткст интернетть вельде, гайфнетяма фкя-фкянди телефонца. Моску аймаконь «Баярава» ансамблень пара вайме мокшаватне аф кунара кучсть тейне куртка. Тя, кле, Александра Николаевна, штоба концерттнень пингста афолеть эенда. Вов тяфтамот минь ломаненьке.

 

—Александра Николаевна, кода арьсят, республикасонк сатомшка мяль шарфневи национальнай кизефксненди?

 

—Койсон, миньцонк тянкса тиендеви аф кржа. Ётафневи аф кржа пуромкста, конат сувсихть историяти. Оцюняньке коль сяда сидеста кепсесазь национальнайть мархта сотф кизефкснень, кемоксневихть сотксне диаспоратнень мархта. Оцю мяль шарфневи родной кяльхнень тонафнемаснонды и стак тов.

 

—Мордовияса эрямась мялезт?

 

—Одста ламоксть эвондакшнесь возможность кадомс мокшэрзянь масторть. Тернемазь и Москуву, и лия ошу, но мон кочкайне Саранскяйть и тяни тянь колга ёфси аф ужяльдян. Республиканьконь столицац полафни сельминголе, стаки мазоми. Павазуван, мес эрян Мордовияса, вдь эсь родинасот ваймоське тарксеви сяда тёждяста.

 

—Александра Николаевна, мезьса арьсят кеняртьфтемс ваныть маластонь пингть?

 

—Аноклан патриотическяй диск, коза сувайхть эсь тяштьф мороне. Тяниень пингть, койсон, патриотизмати эряви шарфнемс башка оцю мяль. Тянь эсь выступлениянзон эса аф весть азонкшнезе странань Президентсь В.В.Путин.

 

—Спасиба, Александра Николаевна! Пяшкодевост сембе арьсематне!

 

О.ЕВДОКИМОВА.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022