ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

Эсь родонь-плямань содай ломань

А.А.Шумкинать (Акшаевать) атяц, Василий Васильевич Акшаев, ётась толу-качаму кафта войнат, казьф аф фкя медальса, ламоксть ранендафоль, Великай Отечественнай войнада меле мрдась куду инвалидкс и, мзярда теенза ульсь аньцек 56 киза, тусь эряфста ранатнень эзда. Бабац, Анастасия Мироновна, вятезень кудонь и пирьфонь тефнень и касфтозень сисем идензон, кафттне кулость войнань вачеда и стака кизотнень пингста. Анастасия Афанасьевнань аляц, Афанасий Васильевич Акшаев, инь ёмласель семьяса. Азонкшнесь идензонды ризфта пяшксе идькс пингонц колга, мзярда эрявсь покодемс эрь сускомть инкса. Лама киза работась колхозса механизаторкс. 14 кизода инголе тусь эряфста. Алянь ширде семьяса сембе алятне военнайхтельхть, а аватне—учительницатольхть. Героиняньконь атянц акац, Аксинья Васильевна Акшаева, кочксефоль делегатокс Учителень Всероссийскяй васенце съездти, кона ётась 1917 кизоня. Эряфоньберьф работась рузонь кялень учителькс. Алянц фкя сяка сестрац, Александра Васильевна Акшаева (Тузаева), марнек эряфонц максозе школати.

Анастасия Афанасьевнань щавац, Мария Алексеевна Челмакина (Моисеева), войнада ингольдень и мельдень кизотнень работась рузонь кялень учительницакс.

Анастасия Афанасьевнань тядяц, Пелагея Фёдоровна Челмакина (Акшаева), 38 киза работась школаса филологокс, шачфтсь и касфтсь кота итть. Эздост нилетне—высшай образования мархта специалистт, кафттнень среднеспециальнай образованиясна. Тяни Пелагея Фёдоровнань 9 уноктонза и 7 уноконь идьтонза.

Поладозь

филологонь тевть

И тага филолокт. Героиняньконь акац Мария—семьяса учителень-филологонь нилеце поколениясь. Но синь мзярдовок аф юкснесазь родной мокшень кяльть, сяс мес кельгсазь сонь. Кизоти несколькаксть пуромкшнихть тядяснон ширес. Шачфтысна эрь самстост пици-панци мокшень пачат, модамарень вареникт—«модамарень рецюнят», а нинге—офтонь мадят, конатнень сембе пяк кельгсазь. Конешна, корхнихть оцю шра   ваксса (да и фалу) аньцек мокшекс.

Тяни семьяснон ули кода лемдемс лама нацияннекс. Анастасия Афанасьевнань фкя брадоц рьвяяф белоруска, ёмлась—татарава лангс, лиятне музь эсь поласнон мокшень семьятнень эзда.

Пою велень койхне эряйхть тянемс

Тяниень пингть кивок аф веши, штоба тевс нолявольхть  койхне-обуцятне, но ломаттне тиендьсазь тянь эсь мяльснон коряс. А.А.Шумкинать (Акшаевать) валонзон коряс, Пою велеса тянемс ванфтовсь тяфтама обуцясь. Кой-кит вири якамста путнихть шуфтть алу сахар мархта кши или лия ламбамня, штоба каванямс Вирявать, сафтомс теенза. И сидеста мртцихть куду вирень казне мархта—кептерьсна и куймосна улендихть пяшксет иможда, панкта. А кизонда тядятне кадондыхть казнет Ведявати—ведень оцязоравати, штоба сон афолезень сала эшеляй иттнень, а максоль теест шумбраши. Аф юкснесазь и Кудавать—кудонь кирдить-ванфтыть.

Эряфонь кись пачфтезе Киржач ошу

Владимирскяй областень Киржач ошу Анастасия Афанасьевна ётась эряма аф стак. Мзярда тонафнесь Н.П.Огарёвонь лемса Мордовскяй госуниверситетса, сашендсь Киржач ошу инжикс аканцты. А дипломть получамдонза меле, 1998 кизоня, ётась тя ошу эряма. Киржачса кассть и получасть образования иденза. Оцю цёрац работай инженеркс ИЗТТ-са, а ёмлать эряфонь киц пачфтезе Казани.

Комозьда лама киза Анастасия Афанасьевна вяти рузонь кялень и литературань урокт. Васенда тянь тиендезе 55№ ПУ-са, а тяни—Киржачскяй машиностроительнай техникумса.

Ширеса эрямста

ванфтсазь национальнайть

Киржачса мокшавась содафтсь мокшень лия семьятнень мархта, кирди мархтост соткст лама киза, марса ётафнесазь шачема шитнень и престольнай праздникнень. Щашендыхть мокшень щапт-каряпт, аноклакшнихть национальнай ярхцамбяльхть и, конешна, морсихть мокшэрзянь морот, сиде моронят.

«Мокшень семьятнень эса «наследствас» коре ётнихть национальнай щапне—эсь кядьса стаф панархне, конат алува мазоптьфт сюреса сёрмадомаса. Кой-кона панархненди уленди сядода ламонь киза. Костюмти сембе мазоптоматне тифт эсь кядьса—ламотнень лангса васьфневихть пунят и монетат, конат канневихть оцязоронь пинкненди. Монистаса и кайги пайгоняса мазоптьф карксне тиендьсазь щамть сядовок козякс, мазыкс. Киржачень эрь мокшавать, конань содаса, ули тяфтама щамоц»,—азозе Анастасия Афанасьевна.

Владимирскяй областень мокшетнень колга

кулендсть ламотне

Меля, Владимирскяй областьса эряй Россиянь ёмла нароттнень колга специальнай проектть мяльса кирдезь, Киржачень мокшетнень колга тиендсь телепередача киржачскяй телевидениясь. Съёмкатне мольфтевсть Илькина велень клубса, коса тифоль мокшень кунардонь щамонь, кудъётконь предметонь выставка, а стане жа пидефтольхть-паньфтольхть национальнай ярхцамбяльхть. Штоба няфтемс, кода эряйхть мокшетне лия вастса, Анастасия Афанасьевна тердезень раднянзон Москуста. Фкясь эздост—Мария аканц мирденц сестрац Анна Фёдоровна Ратникова. Сон аф аньцек кочкси, пуропни мокшень щапт, но и морси мокшень морот Моску ошень «Баяраваня» фольклорнай ансамбльса. Выступленияснон, концертснон вельде Россияса эряйхне сотцихть мокшэрзятнень, синь культураснон, койснон-обуцяснон колга.

Т.АЛЬШИНА.