Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Тема дня

МОКШЭРЗЯНЬ МАСТОРУ САШЕНДСТЬ ИНЖИХТЬ РОССИЯНЬ 33 СУБЪЕКТСТА

Съездти анокламась ушетфоль кунара, башка мяль пингстонза шарфтфоль делегаттнень кочкамаснонды. Тифоль сембось, штоба Мордовияв пуромольхть кяльснон, нацияснон, культураснон инкса пичеди ломатть. Сят, кит виень аф ужяльдезь, маштозь, оцю ответственностень марязь, лиянь лангс аф надиязь тиендьсазь национальнайть ванфтоманц мархта сотф тевснон.

 

24 октябрьста, Саранскяйса, мокшэрзянь Государственнай филармонияса—Культурань республиканскяй Дворецса кайгсть мокшень и эрзянь морот. Сембе весялатольхть, шумбракснесть фкя-фкянь мархта тядянь-алянь кяльса. Кой-кит васьфтезь ялгаснон, конатнень мекольцеда няезь Мокшэрзянь народть VI cъездонц пингста. Работась лама выставка—книгань, аудио- и видеодисконь, национальнай изданиянь, декоративно-прикладной творчествань, ульсть мастер-класст.

 

Пленарнай заседаниять ушедомста няфтьфоль фильма, конань эса пачфневсь мокшэрзянь масторть образованияса, строительстваса, велень хозяйстваса, промышленностьса, инновационнай ширеса, лама лия тевса мекольдень кизонь сатфксонзон квалма.

 

Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин азсь приветствия сембе пуромфненди. Валонзон коряс, съездти анокламста ётась 300 лама собрания и конференция. Кочкафоль 380 делегат, 77 наблюдатель. Сембоц работасонза примасть участия представительхть Российскяй Федерациянь 33 субъектста.

 

Сяда тов Ю.А.Мишанин тердезень сценати Мордовия Республикань Оцюнять В.Д.Волковонь и съездть президиумонц членонзон. Вайгялень максомда меле съездсь ушедозе эсь работанц. Кайгсь Российскяй Федерациянь Гимнась.

 

Съездонь рабочай оргаттнень пуроптомдост меле корхтась Мордовия Республикань Оцюнясь В.Д.Волков. Кода сон азозе, республиказонк съездти мокшетне и эрзятне састь марнек странаста: Приморскяй крайста сявомок Калининградскяй областти молемс и Мурманск ошста сявомок Крымти молемс.

 

—Минь благодарнайхтяма теенть историческяй ушетксоньконди и национальнай койхненди вернайкс улеманкса. Спасиба сянкса, што мархтонк таколттада мокшэрзянь крайть судьбанц инкса, явондсасть мархтонк кенярдеманьконь и надияманьконь, пичефксоньконь и сяськоманьконь. Арьсян, няесть кода полафтсь Саранскяйсь мекольдень съездта меле. Тянди ламода лездсь футболть коряс Миронь чемпионатти анокламась. Эряви азомс, эздонт ламотнень мархта васьфнеме мундиалень матчнень и Россиянь Сборнайть налхкоманц пингста, кона тядде ульсь Саранскяйса. Чемпионатсь арась од аськолксокс Мордовиять касомаса-вииямаса.

 

В.Д.Волков лятфтась уникальнай ся объекттнень колга, конат строяфтольхть чемпионатть вельде и сянь квалма, што Мордовиясь странань региоттнень эзда лувфоль инь инжиень примай и аф пелькс регионкс.

 

Республикань Оцюнясь содафтозень инжихнень регионца экономическяй тефнень мархта:
 
 

—Экономиканьке касы стабильнайста и тевонь содазь. Мекольдень вете кизотнень  валовай региональнай продуктсь и промышленнай производствань объёмсь кассть пцтай нилецекс пялькста. Эряфс ётафтф 100 малава инвестиционнай оцю проект, панчфт од завотт и кемотть тёжятть рабочай од васта. И тядде, аф ваномок финансовай кой-кона стакатнень-сталмотнень лангс, тага ули касома экономикаса. Промышленностьса учтама 10 процентта лама касома, велень  хозяйстваса—5 процентта лама, строительствась сай ся объёмтненди, кодапт ульсть футболть коряс Миронь чемпионатти анокламста. Хозяйствань сембе отраслятнень учсыне динамическяй касома.

 

Съездса В.Д.Волков лама корхтась культурнай и национальнай ширетнень колга.

 

—Российскяй опытсь лама ширде уникальнай,—китькстазе Владимир Дмитриевич.—Минь лама нациянь обществатама, но марстонь нароттама. Ломаненьке сюлмафт культурнай, цивилизационнай кодса, конань юрса—народть эсь лацонь коензон кельгомасна. Странаньконь тя эсь лацонь шиц лезни тейнек лац кирдемс ширде эвфнематнень  и мирса глобализациянь вииякшни процесснень каршес. Странань Президентсь Владимир Путин Государственнай национальнай политикань Стратегияса лац-ряц няфтезень российскяй нациять единстванц и этнокультурнай лама ширденненц ванфтомаснон коряс аськолкснень.

 

Вете кизоста, конат ётасть vi-це съездта меле, лама тиф мокшэрзянь народть историческяй наследиянц тонафнеманц и пропаганданц коряс. Башка васта тяса занясь Мордовскяй (мокшень и эрзянь) народть Межрегиональнай общественнай организацияц, кона заняф мокшэрзянь диаспорать и финно-угорскяй сообществать мархта соткснень виияфтомаса.

 

Республикань Оцюнясь азозе, што тячи башка мяль шарфневи мокшень и эрзянь кяльхнень тонафнемаснонды. Тяса пяк ламось ащи школать эзда. 73 школаса 1-11 клас-снень эса тядятнень-алятнень заявленияснон коряс мокшень и эрзянь кяльхне тонафневихть кода родной,  лядыкс 218 эса—кода государственнай кяль. 5 класста сявомок 9 классти молемс сувафневи «История и культура мордовского края» дисциплинась.

 

Владимир Дмитриевич азсь мяль эряфс ётафнемс «Открой Мордовию» условнай лем ала проект, конанди участникокс аральхть лия региоттнень эса эряй мокшетне и эрзятне. Вельденза эрь мокшети или эрзяти ули кода повомс историческяй родиназонза. Тяфта касы Мордовияв сай     турист-тнень лувкссна, виияй землячествась, кемокстайхть межрегиональнай сотксне.

 

Тя шиня республикань Оцюнять кядьста ламотне получасть оцю казнет. Тяфта, Славань III степенень орденца казьфоль Мордовскяй (мокшень и эрзянь) народть Межрегиональнай общественнай организациянц председателец, Мордовия Республикань Правительствать видеса Гуманитарнай наукань Научно-исследовательскяй институтть директоронц заместителец Ю.А.Мишанин, «Мордовия Республикать инголе заслуганкса» медальса казьфтольхть «Мокша» журналть поэзиянь отделонц редактороц, содаф поэтсь Р.К.Орлова, Мордовскяй (мокшень и эрзянь) народть Межрегиональнай общественнай организациянц членоц Н.М.Кадерова, «Умарина» моронь и кштимань мокшэрзянь Государственнай ансамбльть художественнай руководителец  В.И.Четыркин, лиятне. Мордовия Республикань  Народнай художниконь Почётнай лемть сатозе содаф художниксь А.Н.Баргов, Мордовия Республикань Заслуженнай художниконь лемть—П.В.Рябов.

 

Содаф мокшавась, Г.И.Сураевонь-Королёвонь лемса «Келу» ансамблень солисткась-вокалисткась Г.Н.Макшева арась Мордовия Республикань Оцюнять Премиянц лауреатокс. Казьфтольхть Мордовия Республикань Почётнай грамотат.

 

Меле Российскяй Федерациянь Президентть  Приволжскяй федеральнай округса Полномочнай представителенц И.А.Комаровонь приветствиянц морафтозе Мордовия Республикать эзга Главнай федеральнай инспекторсь М.С.Сезганов.

 

Российскяй Федерациянь Федеральнай Собраниянь Федерациянь Советть эзда корхтась Федерациянь Советонь членць В.В.Литюшкин. Тяда башка, сон лувозе Российскяй Федерациянь Федеральнай Собраниянь Федерациянь Советть Председателенц В.И. Матвиенкоть приветствиянц.

 

Приветствиянь валхт азсть Национальносттнень тевснон коряс Федеральнай агентствать руководителенц заместителец М.Н.Мишин, Саранскяй и Мордовскяй Митрополитсь Зиновий.

 

Кирдемок мяльса съездть регламентонц, съездти сяда тов вятикс азфоль Мордовскяй (мокшень и эрзянь) народть Межрегиональнай общественнай организациянц Исполкомонц членоц, съездонь делегатсь П.Н.Тултаев.

 

Мордовскяй (мокшень и эрзянь) народть Межрегиональнай общественнай организациянц  работанц колга отчётнай доклад тись тя организациять председателец Ю.А.Мишанин. Юрий Александрович тись итокт вете кизонь работати и азозе, мезе сатома маластонь вете кизотнень. 

 

Тяда ингольдень шить ётась организациять Исполкомонц заседанияц, конань эса сембе фкя мяльса азозь Ю.А.Мишанинонь кандидатуранц, штоба тага кочкамс сонь Мордовскяй (мокшень и эрзянь) народть Межрегиональнай общественнай организациянцты председателькс.  VII съездса сембе кирдезь тя мяльть ширенц и максозь вайгяльснон Ю.А.Мишанинонь кандидатуранц инкса.

 

Выступления тись Саранск ошень округонь оцюнясь, Россиянь Финно-угорскяй нароттнень Ассоциацияснон председателец П.Н.Тултаев. Пётр Николаевич шарфтсь мяль сянди, што мокшетненди и эрзятненди кельгомат эсь кяльсна. Содамат, корхтама вельдест. И аф аньцек съезттнень пингста, а эрь шиня. Ванфтомаснон мархта сотф кизефксне, кле, ламода ащихть эсь эздонк.

 

Тя шиня тифоль пяк лама выступления. И сембонь эса кепсевсть тячиень инь таколфты кизефксне.

 

Т.АЛЬШИНА.

 

Снимкатнень эса: съездть работама

 

                                                                                                          пингстонза.

 


31.10.2019 №43
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин