Поиск по сайту: 
 

Архив
 февраль 
 2020 
пн вт ср чт пт сб вс
     12
3456789
10111213141516
17181920212223
242526272829 

 
 

 

Юмор и сатира

МОН, МОНЬ ОВОЗЕ И ТЕЛЕФОНОЗЕ

—Алё, тейне Парчайкинонь номеронц, пожалняста,—корхтан справочнаень стирняти.

 

—Кода лемоц и коса эряй?—кулян трубкаста казяма вайгяль.

 

Азыне кунардонь ялгазень лемонц, алянц лемонц, адресонц, да нинге лятфтайне—марса касоськ сереньконь, войнавга сявондемазь фкя шиня.

 

—Три-пять-нацать-днацать,—бта автоматонь очередь лакшторгодсь пилесон и—«путк, путк, путк»—циннязевсь трубкаса.

 

Путыне. Ушедонь телефононь щарамканять шарфнема: три-пять-нацать-днацать. Кувака месть марявихть, ученаень кяльса зуммер мярьгихть теест.

 

—Алё! Шумбрат!.. Лац маряван?.. Ага... Путсть телефон квартиразон...  да-да, тячи путозь... Сисем кизот учсень и, ияйсак, учевсь... Тяни туй тевоньке! Ага... Кие?.. Кодама прокурор? Мон звонян Парчайкинонди, войнань и трудонь ветеран ялгазти...

 

—Ну н звоняк Парчайкинонди!..—кульса трубкаста и сияк—бяц!—мольсь пилесон.

 

Абондонь аф ламос, мес повонь аф тоза, коза эряволь. Но курок ётась ся и тага кочкайне ноль девятть.

 

—Алё, стирняй-матаняй, тейне прокурорть телефононц...

 

Ёралексонь мярьгомс «максыть, а эряви Парчайкиноннесь», да ашень кенере, справочнаень стирнясь инголдамань:

 

—Три-пять-нацать-вацать!..

 

Арьсезевонь: кати кочкамс, кати аф, вдруг тага пован прокурорти,—аф лад ули машнефтемс ломанть, нинге мярьги: юксондыть сельмотнень да лацкас кочксить номерхнень. Ожу, мярьгонь, щаян и молян «Союзпечатень» киоску,—сон кудоньконь эзда аф ичкозе—раман абонентонь книжка и... И цингоргодсь телефонозе ёфси апак учсек. Кенярдень! Кеподине трубкать:

 

—Алё!

 

А тоста:

 

—Слушай-ка, друг, как нафчот Агафья, родился—нет?

 

Кульса: мокша корхтай, кялец бта цемара шаронды курга потмосонза. Кизефнеса сонцень:

 

—Какая Агафья? Куда вы звоните?

 

А трубкаста:

 

—Как какой? Вчерась привизли, нонче должен родиться... вот и узнавать, решилси: родился или нет и чаво родился—ребёнок ли дефка?

 

Эрька, арьсян, мокшекс пшкядян, вдь корхтай ялгазе—кядезень максса керомс!—мокша. И пшкядень:

 

—Ожу, цёрай, пяк тят пешкода. Азка, коза звонят?

 

—Роддому!

 

—Ах роддому?! Шачфтома куду, рьвяцти  што ли?

 

—Да, рьвязти... Тя тон што ли, батькай? Кода тоза угадятъ? Эх, мать чеснай!..

 

Мон и тяфта, и стане аралан пря, корхтан, аш овозе, стирезевок аш, най цёранят шачендсть. А сон сонцень:

 

—Кода аш овце, а мон киян?... Батькай, учемак, мон—сичас... пяле литразевок ули... учемак, тят тушенда ковга.

 

—А коза пряфтопненди туян,—ашень кирде, лаподине валозень мялень ваномга,—аньцек вага абонентонь книжканкса молян.

 

—Кодама абонентонь?

 

—Чяй, тейне телефон ётафтсть, сисем кизот учсень...

 

—Ну-у-у!.. Штасаськ унокценьге, телефонценьге... Кодама номероц?

 

—Кодама кочкать,—сякось номероцка.

 

Батькань рольть хуш и маштонь налхкомонза, корхнень бта афкуксонь ов мархта, но седиезон аф пароль, и мон бяцадине трубкать вастозонза. Эряздоне щань и лисень ульцяв, кати-мес вдруг пелезевонь «батькай» и «учемак» валхнень эзда. Да и «Союзпечатень» киоскувок эрявсь молемс абонентонь книжканкса.

 

Рамань книжка и меки—куду. Панжине кенкшезень и кульса: дзи-и-инь!—телефонозе, дзи-и-нь!—кайги. Кеподине трубкать.

 

—Алё!..

 

А тоста вайгяль:

 

—Тя—роддомсь?..

 

Эводень и апак отвечак путыне трубкать вастозонза, пелень—тага «овозе» пови. Аньцек путыне, оду-ряд: дзи-и-нь!.. дзи-и-нь!.. Месендема? Савсь кеподемс.

 

—Алё!—эчколгофтыне вайгялезень, штоба афолемань шарьхкоде «овозе», да поладыне сядонга эчкста:—Я вас слушаю...

 

А трубкаста авань вайгяльня:

 

—Срочна пачфтесть, мзяра шабанте шачсь од кизонь васенце шиста сявомок...

 

—Алё!—пешкодан.—Кие корхтайсь?

 

—Тя—горздравста... Башка сёрмадость: мзяра цёраняда и мзяра стирняда, кодама ковня и кодама шиня шачсть...

 

—Алё! Алё!..—пешкоткшнян, но каршезон нюрьхкяня сигналхт: путк, путк, путк...

 

Колавсь мялезе, а сембе сяка вешине абонентонь книжкаста ветеран ялгазень телефононь номеронц, и аньцек ёрань кочкамс сонь,—дзи-и-нь! Дзи-и-нь!..—квартиразень келес. Савсь кеподемс трубкать.

 

—Алё.!. Роддом слушает!—ювадян мезе ули вайгяльхть.

 

Трубкаса васенда марявсь стакаста куфкстома, сяльде—кулырецтонь сюрду-сярду вайгяль:

 

—Гак-ак... нафчот... А-э-ге-афья?

 

Вай, да тя «овозе» кенерсь ни штамс иденц! Отвечань кода маштонь:

 

—Агафья родилси ребенок и дефка...

 

Трубкаса—и-ик!—кулевсь и оду кашт ашезь моле.

 

А ветеран ялгазти всётьки звонявонь. Азондыне—тейне путсть телефон, да мес-бди номероц... роддомонь, што ли най тейне повихть тоза  гайфнихне.

 

—Э-э,—мярьгсь ялгазе,—роддомсь—ся ни пара, веть хуш каттядязь удома. А тейне, козк путсть телефон, шинек-венек гайфнесть, коль кизефнемазь—кодама частста ётай станциява тя или тона поездсь, да улихть или аш билетт. Тонаткшнень, тонга тонадат...

 

А вдь, виде, сави тонадомс, мезевок аф тият!

 

Илья ДЕВИН.

 


31.10.2019 №43
 
 
 

 
НОВОСТИ
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин