Поиск по сайту: 
 

Архив
 февраль 
 2020 
пн вт ср чт пт сб вс
     12
3456789
10111213141516
17181920212223
242526272829 

 
 

 

Национальная тематика

ВАСЕНЦЕТНЕНЬ ЭЗДА ФКЯСЬ

И.Г.Черапкинонь шачема шиста 135 кизонь топодемати
Мокшэрзянь кялень наукать ушедыензон эзда фкясь, мокшэрзянь содаф лингвистсь Иосиф Григорьевич Черапкин шачсь 1884 кизонь 2 ноябрьста Пензенскяй губерниянь Инсарскяй уездонь Исапря велеса (тяни Мордовия Республикань Инсарскяй районць) мокшень семьяса. 1896 кизоня сон аделазе начальнай школать, 1906 кизоня макссь экзамен кафта классонь школань учителень лемонкса и кармась работама эсь шачема-касома велесонза. 1911 кизоня политическяй мяльхнень-арьсематнень инкса сон паньфоль вастстонза и аф фкя киза теенза савсь работамс Дальняй Востоконь школатнень эса. Ся пингть Иосиф Григорьевич Черапкин кирдезень экзаметтнень Владивостокса гимназиянь сембе курснень эса и кармась тонафнема Москувонь университетса (историко-филологическяй факультетса), коса кулхцондозень ся пингонь содаф учёнайхнень (лингвисттнень-филолокнень) В.К.Поржезинскяень, Ф.Ф.Фортунатовонь, Д.Н. Ушаковонь лекцияснон и седи ваксстонь валснон.
Московскяй университетса тонафнемста сон маладсь передовой профессорхненди и студенттненди, конатнень мяльсна-арьсемасна ся пингть аф пяк шнакшневсть. Савсь теенза тумс омба мастору, коста сон мрдась 1915 кизоня. Самда меле сонь колганза кармасть курокста содама жандарматне и прважафоль рядовой солдатокс русско-германскяй фронту.
Октябрьскяй революциянь васенце кизотнень И.Г.Черапкин работась Инсарскяй уездонь земельнай управлениянь председателькс, крестьянскяй солдатскяй депутатонь Советонь уезднай исполкомонь продовольственнай коллегиянь членкс.
1918 кизоня тусь Якстерь Армияв, тюрсь гражданскяй войнань разнай фронттнень эса васенда рядовой красноармеецокс, сяльде—батальононь командиркс. Гражданскяй войнада меле 1927 кизоня Иосиф Григорьевич покоди Пензенскяй педагогическяй техникумонь мордовскяй отделенияса преподавателькс, народнай образованиянь Пензенскяй губерниянь отделть видеса национальнай меньшинстватнень просвещенияснон коряс советонь председателькс, а сяда меле—«Од веле» газетаса ответственнай секретарькс.
1925 кизоня Пензенскяй губерниянь музейсь кочкась экспедиция мокшетнень культураснон кеподеманкса и касфтоманкса. Руководителькс путфоль И.Г.Черапкин. Экспедицияти работань итогокс арась фольклорнай, диалектологическяй, историческяй и этнографическяй пяк козя материалсь, конань коряс сёрматфтольхть мордовскяй кяльхнень коряс научнай работат и мокшень образовательнай школатненди учебникт. Тяда башка, экспедицияса улемась кемокстазе учёнайть мяленц сянь коряс, што мокшень литературнай кялькс можна лемдемс краснослободско-темниковскяй кялень кустонь кяльсь.
1927 кизоня И.Г.Черапкин тертьфоль работама мокшень кялень преподавателькс Саратовскяй госуниверситетонь мордовскяй кялень и культурань отделенияв. 1929 кизоня сон стане жа кармась вятемонза историко-этнографическяй и фольклорнай экспедициять Мордовскяй округса, и тага удалась кочкамс пяк козя материал.
1930 кизонь 10 январьста Мордовскяй автономнай областень тиевомда меле сон тертьфоль завучекс и мокшень кялень преподавателькс Саранскяй педагогическяй техникуму, тяка пингть работась Мордовскяй АССР-нь ЦИК-ть видеса культурань мордовскяй научно-исследовательскяй институтса.
Иосиф Григорьевич Черапкин примась активнай участия Мордовскяй     АССР-ть тиемаса. Сон пяк оцю мяль шарфнесь мокшень литературнай кяльть тиеманц и ладяманц лангс. М.Е.Евсевьевонь и И.Г.Черапкинонь предложенияснон коряс мокшень литературнай кяльти основакс сявфоль краснослободско-темниковскяй диалектсь. Учёнайсь няезе, што тяса сяда лама простой, сембонди содаф и шарьхкодеви валда, тя диалектса корхтай мокшеда сембода лама.
И.Г.Черапкин лувондови мокшень общеобразовательнай школатненди васенце учебниконь авторкс, кялень 1-це, 2-це и 3-це научнай конференциятненди организаторкс, коса ванондовсть мокшень и эрзянь кяльхненди нормань тиемаса кизефксне.
Эряви азомс, И.Г.Черапкин  марса З.Ф.Дорофеевонь и И.Х.Бондяковонь мархта вятсь оцю работа национальнай школатненди учебниконь, учебнай пособиянь и научно-популярнай литературань кочксемаса, нолдамаса.
Иосиф Григорьевичень грамматиканза—нят мокшень общеобразовательнай школатненди васенце учебникне, конат сёрматфт литературнай кяльса и научнай кеме основаса. Эряви азомс сявок, И.Г.Черапкин—мокшень васенце лексикографсь, 1933 кизоня сон нолдась Москуса «Мокша-мордовско-русскяй валкс». Словарьса ульсь кафксошка тёжянь вал.
Кулось Иосиф Григорьевич Черапкин 1935 кизонь 18 мартста. Сембе эряфоц сонь ульсь сотф эсь народонц культуранц касфтоманц и кемокстаманц мархта.

07.11.2019 №44
 
 
 

 
НОВОСТИ
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин