Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Национальная тематика

КЕЛЬГОЗЬ ШАЧЕМА-КАСОМА УЖЕНЯТИ И СЕМБЕ МИНЦЕННЕТИ

Лемдяй. Старошайговскяй райононь мокшень тя велесь содаф асу, ёню, коень-обуцянь ванфты, машты кядь, сюреса сёрмады, кштий-морай ломанензон мархта. Лемдяень мокшаватнень мазыдонга мазы национальнай щамснон-карямснон эзда сельмоце аф явфтови, ванондолеть и ванондолеть лангозост. И пара, што Лемдяйса минценнети, мокшеннети кельгомась ётни эряфкшуфнень эзда оттненди, поколенияста поколенияс. Мзярда арань содафокс тя велень мокшавать-баяравать Марина Борисовна Босинать мархта, нинге весть тянь шарьхкодине.
Тячиень героиняньке шачсь-кассь Лемдяйса мокшень семьяса. Сон оцюсь колма ит-тнень ёткста, нинге ули дуганоц и сазороц. Ёмла родинасонза велень школаса 9 класснень шумордамдост меле поступась Зубово-Полянскяй педагогическяй училищав, коса тонафнесь ниле кизот, мрдась Лемдяи. Ушедсь работама тя велень школаса кружковой работань педагогокс, а кафта кизода меле содамошинзон касфнема ушедсь Н.П.Огарёвонь лемса Мордовскяй государственнай университетть филологическяй факультетонц заочнай отделениясонза. Пингонь ётазь лиссь рьвакс Юрий Босинонди. Тяфта Лемдяй мокшень велеса эвондась нинге фкя од семья, коса тяни касыхть кафта цёрат. Оцюсь Станислав тонафни 10 класса, а ёмлась Тимофей тядде тусь школав, сон—1 классонь ученик.
Боситтне строясть Лемдяйса ипотечнай куд, конань эса эряйхть вов ни 7 кизот. Кудсь оцю, валда, эсонза сембось тиф тячиень шить вешфксонзон мяльса кирдезь.
Марина Борисовнань валонзон коряс, мзярдовок ашель мялец тумс шачема-касома велестонза шири. Нльне мзярда Саранскяйса ащесь очередьса эряма вастонь получамс, атказась очередть эзда. Вастозе, кле, тяса—Лемдяйса, радня ломаннень мархта.
«Тейне фалу содама, што тядязе и щавазе маласон, и што мзярда мялезе няйсайне синь, лездан теест. Тядязень и щавазень эсь кудсна, но эрь шиня синь улендихть ширесон, и мон, кода оцюсь иттнень ёткста, марян инксост оцю ответственность»,—мярьгсь мокшавась.
Мирдец Юрий Иванович тяни работай Москуса. Но кудсовок сидеста уленди. Касфтыхть-тряйхть Боситтне цёраснон эса, идьсна—тя эряфсна,  павазсна.
М.Б.Босина Лемдяень школати макссь 18 киза, а вов тяни кемонце кизось работай велень библиотекаса. Тевоц мялезонза. Библиотекась кирди кеме соткст культурань ширеть мархта, Лемдяй велень Культурань кудсь, коза сувси и библиотекась, лама тиенди мокшэрзянь койхнень-обуцятнень ванфтомаснон, поколенияста поколенияс мокшэрзянь фольклорть максоманц инкса.
«Няемс ломаттнень сельмоса кенярдема, паваз—тя ся, мезть инкса эряви работамс и эрямс велеса»,—азозе Марина Борисовна.
Мокшавась кунара морси Лемдяень «Синельга» народнай ансамбльса, сон пцтай фалу вятьсыне праздничнай концерттнень. Мокшень тя велеса келиста васьфневихть православнай праздникне—Масланцясь, Тройцясь, Покравсь. «Синельга» коллективть мархта эрь кизоня примси участия «Шумбрат, Мордовия!» Народнай творчествань фестивальса. Тяфта ульсь и тядде.
Марина Борисовнань кельгома тевонзон эзда фкясь—декоративно-прикладной искусствась. Лацонза ломаттнень колга корхнихть тяфта: фкя вастса аф ащеви, эрь тевть пачк сязьсы, сафтсы сембоса.
«Ётка пингозе аф уленди ёфси, фалу мезьсовок заняфан, сембось салсесы мялезень, ёран коль сяда лама содамс и тонадомс»,—мярьгсь М.Б.Босина.
Ванат мокшавать лангс и мялямозт сай рузонь содаф поэтть, классикть Н.А.Некрасовонь «Мороз, Красный нос» эпическяй поэманц васенце пяльксстонза пакшсь, коса корхтамась мольфтеви аватнень колга: «Ётай—бта шись валдопттанза! Варжаксты—цалковайса кастянза!» и, конешна, «Зиянца аф эводи—аралатанза».
Сембоса машты, сембоса лезды, сембоса сафтсы—тяфтама сон, Марина Борисовна Босина!
Тячи макссаськ рецептонзон эзда фкять.
Т.АЛЬШИНА.

07.11.2019 №44
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин