Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

«Ломатть, уледа Ломанькс!»

Тяддень 7 ноябрьста Мордовиянь национальнай драматическяй театрати топодсь 85
киза. Эсь юбилеенц театрась васьфтезе творческяй оцю сатфксса. Путфт од
спектакльхть, ётафтфт гастрольхть, Театрань Всероссийскяй фестивальхть и тиф
лама лия эрявикс тев, конат кеподезь мокшэрзянь театральнай культурать од и
няевикс вастс.
Юбилеень шиня Мордовиянь национальнай драматическяй театрась кеняртьфтезень
разнай национальностень зрителензон од спектакльса. Сонь, мокшэрзянь содаф
драматургть Валентина Мишанинать «Куйгорож» пьесанц-притчанц  коряс, путозе
Российскяй Федерациянь и Калмыкия Республикань искусствань Заслуженнай
деятельсь, режиссерсь Борис Манджиев. Декорациятнень спектакльти арьсезень-
тиезень Коми Республикань содаф художниксь Анна Репина, пластикать коряс
режиссеркс ульсь Башкортостан Республикань Заслуженнай артистсь Рамиза
Мухаметшина, музыкать спектакльти сёрмадозе Калмыкия Республикань искусствань
Заслуженнай деятельсь, композиторсь Аркадий  Манджиев, щапнень спектакльти
арьсезень-тиезень Мордовия Республикань содаф художниксь Елена Киреева.
Тяни аф лама спектакльть главнай героенц квалма. Куйгорожсь мокшэрзянь
мифологиянь персонаж, равжа вий.  Сонь нарваяфнесы (лихнесы) куень или корожонь
алста ломанць. Куйгорожти сембось вийс коре: козякофтомс ломанть и тиендемс
лама лия аф фкя лацонь тев. Сонь ули аньцек фкя лафчашиц—аф ащеви тевфтома. И
кулофтови сон аньцек эста, мзярда теенза сонь азороц максы стама тев, кона
теенза аф тиеви…
Сонцень «Куйгорож» спектакльть сюрекиц тяфта жа ёфксонь. Фкя велеса эрясть Пята
атясь (артистсь Дмитрий Мишечкин) и сонь рьвац Сюмерьге бабась-колдуньясь
(артисткась Елена Гудожникова). Идьсна ашельхть. Пятась эрь мезне апрякась
бабать эса: кле, ашеть шачфтов аф цера, аф стирь. Сяс тяни тейнек аш кинди
лездомс.
Мзярда Сюмерьгать мольсь мялец кулхцондомс ня апрякаматнень, сон кантфтсь атять
кядьста корожонь ал и сонць нарвась Куйгорож. Пята тянди пяк кенярдсь и ушедсь
макссема Куйгорожти  тефт, конат атять курокста тиезь инь козя ломанькс аф
аньцек велеса, но и марнек ся аймакса.
Но добуваф козяшись Пятанди паваз ашезь канда. Сон шарьхкодсь: Куйгорожсь сембе
ня козяшитнень-паршихнень норгондсыне лия ломаттнень кядьста и каннесыне
теенза. Аф аньцек велесь, но и марнек аймаксь ашуясть. Пята юмафтозень
ингольдень ялганзон, калафтозе-срафтозе Куйгорожть вельде шабрань стирнять
Уняжань (артисткась Евгения Акимова) эряфонц, мархтонза фкя велеса эряйхне
ушедсть пелема ётнемс кудонц вакска…
Пята, мзярда шарьхкодсь, мезькс сон арась, ушедсь ольксема-явсема и анама
прощения масторавать кядьста. Атять сргозсь совестец: и сон мярьгсь Куйгорожти
меки мрдафтомс ломаттненди кядьстост норкф козяшитнень-паршихнень. Аньцек
Куйгорожти тя тевть тиемс ульсь аф вийс коре, и сон кулось-юмась. Лисенди—
видешись сяськсь. Но Куйгорожть эзда ся пингс кенерсь ни пекиямс Уняшась, кона
пингта меле шачфтсь од куйгорошт…
Лиякс мярьгомс, «Куйгорож» спектакльса ломаттненди пачфневи кунардонь и тяниень
 пингонь, улема, инь смузю мяльсь: «Ломатть, уледа Ломанькс!» И, койсон,
национальнай театрань актерхненди тя спектакльть вельде, коса рольхть налхкихть
пцтай сембе артисттне, зрительхнень ваймос удалась пачфтемс педа-пес!
Спектакльть аделавомда меле Мордовия Республикань Оцюнять лемста Театрань
коллективть 85 кизонь юбилеенц мархта лямбоста поздравляндазе и арьсесь од
сатфкст республикань Правительствать Председателенц заместителец Г.А.Лотванова.
Республикань Государственнай Собраниять Председателенц лемста театрань 
коллективть 85 кизонь юбилеенц мархта поздравляндазе И.М.Маскаев.
Театральнай искусстваса сатфксонкса Мордовия Республикань Заслуженнай артистка
и артист почетнай лемса казьфтольхть национальнай театрань артисткась Людмила
Антипкина и актерсь Андрей Кипайкин. Мордовиянь Оцюнять «За личный вклад в
развитие Республики Мордовия» почетнай знакса казьфоль артисткась Елена
Гудожникова, «За заслуги перед Республикой Мордовия» медальса—республикань
Народнай артистсь Виктор Гудожников, Мордовия Республикань Оцюнять
Благодарностьса казьфоль артистсь Павел Михайлов и лия актерхне.
Мордовиянь Правительствань, Государственнай Собраниянь Почетнай грамотаса
казьфтольхть актрисась Галина Гришуткина, бухгалтерсь Елена Сонина, артистсь
Виктор Стороженко  и театрань лия работникне.
Ламотнень актерхнень и театрань лия сотрудникнень эзда Благодарностьса и
панчфса казезень Мокшэрзянь (мокшень и эрзянь) народонь Межрегиональнай
общественнай организациять председателец, профессорсь Ю.А.Мишанин.
В.Нестеров.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022