Поиск по сайту: 
 

Архив
 январь 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

Юбилейсь максоза од вийхть!

 «Баяраваня» ансамбльсь пуроптфоль Россиянь нароттнень культураснон ванфтоманц и содафокс тиеманц инкса 2009 кизоня, фкя пингть мокшэрзятнень НКА-нь Люберецкяй отделениять эвондаманц мархта. Сяка кизоня ётась межэтническяй коллективть васенце концертоц—районнай наркологическяй диспансерса. Тостонь «эряйхненди» «Баяраванять» участниконза пшкядсть тяфтама валса: «Симилат, саты симомс. Эрьда моратама!»

 

Кочксемок вийхть, ансамбльсь морсесь Москувонь и Московскяй областень ламоц инь цебярь площадкатнень лангса, аф весть сашендсь Мордовияв, ульсь Эстонияса, сон—региональнай ассамблеятнень и форупнень участниксна, мезень колга корхтайхть ламоц казненза: Почётнай грамотатне, Благодарственнай сёрматне, Диплопне, медальхне.

 

«Мировые таланты» Международнай конкурсть и лия конкурснень эса, конат ётнесть Москуса, участиянь примаманкса ансамбльсь казендевсь I, II и III степенень Диплопнень мархта.

 

«Баяраваня» коллективсь фалу примси участия Москувонь и Московскяй областень инвалиттненди, ветераттненди, пенсионерхненди благотворительнай концерттнень эса. Московскяй областьса национальнай, самодеятельнай тя фкя сяка коллективсь, кона ащи Люберецкяй районть бюджетса. Коллективса 15 ломань.

Ансамбльсь кемоста сувась Люберцы ошень округть культурнай эряфозонза. Сонь содасазь Красковаса, Малаховкаса, Октябрьскяйса, Томилинаса. Коллективсь примси участия ошса ётафневи пцтай сембе пуромкснень эса.

 

Художественнай руководителец Галина Дмитриевна Батадеева казьфоль «Люберцы ошень округть инголе заслуганкса», ансамбльть старостац Екатерина Ивановна Асташкина, солистоц Василий Петрович Фудин—«Эряфонь активнай позициянкса» знакнень мархта.

 

Люберцы ошень оцюнять Почётнай грамотанц мархта казьфтольхть ансамблень сембе участникне, а стане жа—мокшэрзятнень Люберецкяй отделенияснон правлениянц председателенц заместителец Галина Михайловна Куряева и поэтсь Николай Иванович Кочегаров. Почётнай знакнень, грамотатнень теест казезень Люберцы ошень округть оцюнянц заместителец Владимир Васильевич Григорьев.

 

Приветствиянь валхт азсь Российскяй Федерациянь Президентть видеса Мордовия Республикать Постояннай представительстванц Мокшэрзянь культурань центрать директороц Лидия Виссарионовна Круглова. Сон макссь оцю питне ансамбльти, сонь тевонзонды. Люберецкяй мокшэрзятнень ёткста ламоц активисттне получасть Почётнай грамотат Мокшэрзянь культурань центрать эзда.

 

Тя оцю пуромксса няфтьфоль декоративно-прикладной искусствань мялень салай, козя выставка. Инжихне каваняфтольхть пачаса и национальнай лия ярхцамбяльса.

 

Тя шиня «Баяраваня» ансамбльсь Люберецкяй мокшетнень и эрзятнень руководительснонды, содаф краеведти Илья Александрович Радовонди моразе сонь веленц Трофимовкать моронц-гимнанц. Эсонза улихть валрисьмот, конат няфнесазь поколениятнень ёткса и эсь юрхнень мархта соткснень: «Катк рузонь, мокшэрзянь мелодият кайгихть, тяса родиназень атянь-атясна мархтон корхтайхть».

 

Трофимовка велень эряйхнень атянь-атясна XIX векть ушетксста тусть тоза эряма Пензенскяй губерниянь Краснослободскяй уездста (тяни Мордовиянь Ковылкинскяй районць) и мусть эстеест васта Волга ляйть маласа (тяниень пингть Самарскяй областень Нефтегорскяй районць).

 

Тянь колга содаф краеведсь И.А.Радов келиста пачфни «Трофимовка, Дергановка, Росташи тож» книгасонза, кона нолдаф 2018 кизоня. Кой-мзяра экземпляр казьф Мордовиянь, Самарскяй областень библиотекатненди, Мордовиянь содаф ломаттненди, лия региононь мокшетненди и эрзятненди, краеветтненди.

 

 

 

06.12.2019 №
 
 
 

 
НОВОСТИ
 
 
 
 

Од ломаттненди азонтфоль РФ-нь Конституциять колга

12 декабрьста Мордовия Республикань Государственнай Собранияса ётась пуромкс, кона лемтьфоль Российскяй Федерациянь Конституциять шинцты. Госсобранияв сашендсть Саранск ошень 23№ гимназиянь и Рузаевкань 9№ школань тонафнихне. Тяса теест ётафтфоль экскурсия зданиять эзга, няфтьфоль Госсобраниянь музейсь, азонтфоль закононь нолни органть работанц колга. Тяда меле школьникне пуромкшнесть Оцю залса, коса синь мархтост васетькшнесь МР-нь Госсобраниять Председателец, «Единая Россия» партиять Мордовскяй региональнай отделениянц Секретарец В.В.Чибиркин. Владимир Васильевич пачфтсь од ломаттненди кода и мезенди примафоль Конституциясь, азондсь республикаса властень системать колга.

—Странаньконь фкя инь васенце законоц—Конституциясь примафоль аф тёждя пингста синцень странань эряйхнень мяльснон коряс,—азозе В.В.Чибиркин.—Эсонза кемокстафт ломанть праванза и воляшинза.

 

Российскяй Федерациянь Конституциясь примафоль 1993 кизоня. Тядде теенза топодсь 25 киза.

 

В.В.Чибиркин кошардозень од ломаттнень улемс эсь странань афкуксонь гражданинкс, кельгомс шачема масторснон. Тинь эздонт, мярьгсь Владимир Васильевич, ащи Россиять сай пингоц.

 

Сяда тов Российскяй Федерациянь Конституциять колга лекция школань тонафнихненди лувсь «Молодая гвардия «Единой России» ВОО-ть МРО-ц вятиенц тевонзон тиендисна И.А.Заугольнов.

 

О.ЕВДОКИМОВА.

 

 

 

13.12.2019
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин