Мокшэрзянь народть Межрегиональнай общественнай организациянц Исполкомонц заседанияста

СЪЕЗДТА МЕЛЬДЕНЬ  ТЕФНЕНДИ УШЕТКС тиФ!
17 декабрьста Мордовиянь А.С.Пушкинонь лемса Национальнай библиотекаса ётась    Мордовскяй (мокшень и эрзянь) народть Межрегиональнай общественнай организациянц одкстоптф Исполкомонц, кона кочкафоль VII съездса, васенце заседанияц.
Межрегиональнай форумса, коса, Исполкомонь членда башка, тяфта жа работасть республикань государственнай властень, культурань, образованиянь, наукань, лия народонь общественнай организациянь представительхть, ванондовсть вете кизефкст. Нят—Межрегиональнай организациянь Исполкомонь Президиумть кочкамац, VII съездонь Резолюциять вешфксонзон пяшкодемаснон коряс комиссиять пуроптомац-кочкамац, «Мялямсь Геройть колга кулома аф содай!» грантовай проектть, кона лемтьф М.П.Девятаевонди, эряфс ётафтомац, 2020 кизонь Всероссийскяй переписть ётафтомац и лия кизефкст.
Тяда башка, Исполкомть заседанияса ванондовсть 2020 кизонди Мордовскяй (мокшень и эрзянь) народть Межрегиональнай общественнай организациянц мероприятиянь планонза, конатнень коряс Организациясь и сонь Исполкомоц кармайхть мольфтема тевснон Мордовия Республикаса и Россиянь лия региоттнень эса, коса улихть Организациять отделениянза и компактнайста эряйхть мокшет и эрзят.
Сембе кизефкснень коряс Исполкомть заседанияса тись доклад Мордовскяй (мокшень и эрзянь) народть Межрегиональнай общественнай организациянц председателец, профессорсь Ю.А.Мишанин. Корхтамок Исполкомонь Президиумонь кочкамать квалма, Юрий Александрович мярьгсь,  кле, марнек Исполкомть, коса 55 ломань, сидеста пуропнемс заседанияс кармай сатомшка стака, а тефне эсонк учсема аф кармайхть. Сяс тейнек эряви кочкамс Исполкомонь Президиуму стама ломатть, конат эряйхть Саранск ошса, республикань райоттнень и Россиянь маластонь региоттнень эса, коста ули кода сяда курокста самс Президиумть заседанияс.
Лиякс мярьгомс, оперативнай сембе кизефксне арьсевихть пяшкотькшнемс Президиумть заседанияса. Но инь оцю и эрявикс кизефксне, конешна, кармайхть пяшкотькшневома Исполкомть заседанияса, коза тяфта жа кармайхть терневома национальнай активсь и Исполкомонь почётнай члеттне-ветераттне. Надиян, марстонь вийса тейнек пяшкодевихть сембе кизефксне и тиевихть сембе тефне.
Корхтамок VII съездонь Резолюциять пяшкодеманц квалма, Ю.А.Мишанин шарфтозе пуромфнень мяльснон тя документса Организациять инголе вете кизонди путф вешфкснень лангс. Сембе синь—оцюфт, крхкат и пяк эрявикст. Сяс мокшэрзянь народть этническяй и гражданскяй эсь прянь маряманц кемокстаманкса, национальнай культурань, литературань, массовай информациянь, мокшень и эрзянь кялень тонафнемань, семьянь и демографиянь сфераса работать виияфтоманкса Исполкомть видеса эрявихть кочкамс-пуроптомс профильнай комиссият. Кепотьксонди, государственнай властень оргаттнень и лия национальносттнень мархта сотрудничествать, национальнай культурать касфтоманц, национальнай литературать и массовай информациянь средстватнень виияфтомаснон, од ломанень политикать и проектнай тефнень, образованиять и наукать, семьянь и демографиянь кизефкснень коряс.
Эсь докладсонза Ю.А.Мишанин шарфтсь башка мяль «Геройть колга мялямсь кулома аф содай!» проектть и 2020 кизонь Всероссийскяй переписень мероприятиятнень эряфс ётафтомаснон лангс. Юрий Александровичень мяленц коряс, синь эрявихть ётафтомс келиста и мазыста кода Мордовия Республикаса, стане и Российскяй Федерациянь лия региоттнень эса, коса вятьсазь тевснон Мордовскяй  (мокшень и эрзянь) народть Межрегиональнай организациянц отделениянза.
Рабочай шинь повесткать ветеце кизефксонц коряс заседанияса тись выступления Мокшэрзянь организациять Исполкомонц председателец, профессорсь А.С.Лузгин. Сон пачфтезе пуромфненди: кле, 2020 кизоня арьсеви ётафтомс Исполкомонь и Президиумонь нилень заседания. Мярьктяма, Исполкомонь заседанияса ванови, кода работайхть Мокшэрзянь организациять Торбеевскяй местнай отделенияц и М.П.Девятаевонь лемса музейсь од поколениянь патриотическяй касфтомаса, и кодама работа вятихть Торбеевскяй и Зубово-Полянскяй муниципальнай райононь государственнай властень оргаттне Всероссийскяй переписьта инголе тоса эряй ломаттнень мархта.
Тяфтама жа оцю и эрявикс кизефкст вановихть Исполкомонь лия заседаниясовок.
Корхтамок Исполкомонь Президиумть заседаниянзон квалма, Александр Степанович мярьгсь, кле, колмотне синь эздост ётафтовихть Пензенскяй, Оренбургскяй и Саратовскяй областьса. Синь кармайхть лемтьфт тостонь мокшэрзятнень национальнай культураснон и кяльснон ванфтомаснонды и виияфтомаснонды, Мордовиянь национальнай газетатнень и журналхнень Россиянь тя и лия регионц пачфтемаснонды, 2020 кизонь Всероссийскяй переписень и лия оцю кизефксненди.
Выступлениянц аделамста А.С.Лузгин серьгядезень пуромфнень заседанияда меле нинге весть и лацкас ваномс организациять рабочай и мероприятиянь планонзон, конат марстонь вийса эрявихть пяшкодемс эсь пингстост и цебярьста.
Рабочай шинь повесткать, докладть и выступлениять коряс пренияса эсь мяльснон азозь Ульяновскяй областень мокшэрзянь национально-культурнай автономиять председателец В.А.Софонов, Чувашия Республикань Мокшэрзянь культурнай центрать председателец В.П.Седойкин, «Союз композиторов России» Всероссийскяй организациять Мордовскяй региональнай отделениянц председателец Н.В.Кошелева, Мордовиянь национальнай драматическяй театрань литературнай частень заведующайсь В.И.Мишанина и Исполкомонь лия члеттне.
Пренияда меле заседанияс пуромфне фкя мяльса кемокстазь сембе кизефкснень.
Тяда меле одкстоптф Исполкомонь члеттнень васенце заседанияснон мархта лямбоста поздравляндазень Мордовия Республикань культурань, национальнай политикань и архивнай тевонь министрть васенце заместителец А.И.Карьгин. Сяльде сон «За межнациональное согласие» медальса казезень Мордовиянь А.С. Пушкинонь лемса Национальнай библиотекань главнай библиотекарть В.И.Пронинать и Саранск ошень образованиянь Управленияса этнокультурнай образованиянь отделть руководителенц М.М.Вельмяйкинать.
Исполкомонь члеттнень васенце заседанияснон мархта лямбоста поздравляндазь мазы мороса Мордовиянь Заслуженнай артисткатне Галина Макшева, Любовь Князькова, Народнай артисткась Анна Атласова и Г.И.Сураев-Королёвонь лемса «Келу» ансамблень лия солисткатне.
В.НЕСТЕРОВ.