«Тейне 2019 кизось мяляфтови...…»

Курок туй историяв 2019 кизось. Кажнайсь эздонк варжаксни фталу, лятфнесы, мезе тиф кизоньберьф, арьси сай пингть колга. Кодамкс ульсь ётай кизось республикань эряйхненди? Корреспондентоньконь тя кизефксонц лангс отвечасть:
С.А.Видясова, Старошайговскяй райононь Сире Теризморга велень Национальнай культурань центрать директороц:
—Вишкста аськоляй пингсь. Фкя кизось полафнесы омбоцеть и кажнайть эздост сонцень цебярь ширенза. Тяфта ащесь тевсь и 2019 кизоть мархта. Аф ваномок сянь лангс, што финансовай ширде сон аф тёждяль, работаньке мольфтевсь сяда тов. Кода фалу Центраньке примась лама инжи аф аньцек Россиянь региоттнень эзда, но и омба масторста: Германияста, Китайста, Италияста и лия вастста. Ётафтоме лама мероприятия, творческяй илятть. Тяка пингть пара мялезонк, мес аф аньцек минць примаме инжихть, но и эстейнековок удалась лисемс лия шири. Лиякс мярьгомс, аф аньцек эсь пряньконь няфтеськ, но и лиятненьге ваноськ. Кизоньберьф ульсь кефкие выездной мероприятияньке. Улеме Саратовса, Чувашияса, Ульяновскяй областьса, Москуса и республикань ламоц райоттнень эса. Саратовса Сире Теризморгань народнай хороньке примась участия самодеятельнай творческяй коллективонь Всероссийскяй фестивальса-конкурсса, коса сатозе Лауреатонь I степенень дипломть. Аф кальдявста коллективоньке няфтезе прянц «Поволжская глубинка» национальнай культурань Всероссийскяй VII фестивальса, кона ульсь Ульяновскяй областьса. Тяда башка, Центрань мастерицаньконди удалась няфтемс маштомошиснон Чувашияса. Няфтьфтольхть мастер-класст сюреса сёрмадомать, карксонь кодамать, цифксонь тиемать коряс.
Од кизонь карша мялезе арьсемс республикань сембе эряйхненди кеме шумбраши, паваз. Катк шрантень лангса фалу ули кши и сал, а фкя-фкянь эзда куленттяма аньцек пара валхт.
С.И.Дорогайкина, Мокшэрзянь государственнай национальнай драматическяй театрать директороц:
—2019 кизось тейнек эсь лацонне, мяляфтовсь сон лама ширде. Васендакиге Россияса сон азфоль Театрань кизокс. Тянкса минь старандаме тиендемс работаньконь сядонга лац. Путоме цебярь спектакльхть—«Куйгорож», «Ромео и Джульетта», «Дочь некрещеного мордвина». Пара мялезонк, мес сембе постановкатнень ванома сашендсь лама ломань.
Козяль кизось гастролень ширде. Примаме участия национальнай театрань кафта фестивальса, фкясь ётась Татарстанца, омбоцесь—Крым Республикаса. Тяда башка, удалась улемс Ивановскяй и Самарскяй областьса.
2019 кизось Национальнай театрати юбилейнай. Тядде теенза топодсь 85 киза. Ётафтфоль тянди лемтьф оцю ила. Пингстонза театрань ниле артисттненди—Екатерина Исайчевати, Андрей Кипайкинонди, Людмила Антипкинати, Дмитрий Мишечкинонди максф «Мордовия Республикань Заслуженнай артист» почётнай лемсь.
Кеняртьфнесамазь и ся, мес тядде ширезонк работама састь кафта од ломатть. Нят Антон Саранкин и Татьяна Биушкина.
Малаткшни Од кизоть и Роштувать мархта, кельгома ялгат! Арьсян теенть улемс фалу шумбракс, эряфонь кельги ломанькс. Тясть юксне эсь шачема кялентень, корхнеда мокшекс и эрзякс. Сашендода Национальнай театрав.
В.А.Сидяева, Саранск ошень 28№ школань мокшень кялень тонафты:
—Пингсь, кодама сон тяза уле, ётни афи фатят кода. Аф тячи-ванды туй историяв и 2019 кизось. Кальдявкс лемдемс сонь аш кода. Оцю зиятт, павазонди, ашесть лисе, шумбрат-тазат мала ломаненьке—и тя сембода главнайсь.
Тейне 2019 кизось мяляфтови васендакиге сянь мархта, што республиканьконь столицаса ётась Мордовскяй (мокшень и эрзянь) народть Межрегиональнай общественнай организациянц VII съездоц, коса мон сувсень делегаттнень лувксс. Тага мокшэрзянь краи пуромкшнесть странать келес эряй кяльс коре радняньке. Кепотьфоль-ванфоль аф кржа кизефкс, конат сотфт кяленьконь, культураньконь ванфтомаснон мархта. Надиян семботь, мезень колга корхтафоль, удалай ётафтомс эряфс. Пяк мялезе, штоба башка мяль шарфтоволь школатнень эса мокшень и эрзянь кяльхнень тонафнемаснонды. Кода мокшень кялень учителень, пичефтьсамань, мес тя предметть тонафнеманкса максф аньцек фкя част. Тя, койсон, пяк кржа. Тядде школасонк ётафтфоль мокшень и эрзянь кяльхнень коряс олимпиадать муниципальнай этапоц. Ёмла классонь тонафнихне тиезь сонь лац, а вов оцю классонь школьникнень ёткста аф сембонди удалась сатомс мялень кеподи результатт. Туфталсь—аф сатомшка пинге максфоль олимпиадати анокламанкса. Надиян, сай кизоть родной кяльхнень тонафнемасна школатнень эса виияфтови.
Газетать лувиензонды и республикань сембе эряйхненди Од кизонь карша мялезе арьсемс шумбраши и паваз! Катк сембонь пяшкодевихть мяльсна-арьсемасна!