Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

Нина Спиркина: «Катк Од Кизось канды аньцек цебярь!»

Од кизось, улема, фкя инь кельгови илась кода ёмлатненди, стане и оцюфненди. Теенза аноклай эрь семьясь: куттнень эса наряжакшневихть паргана кузнят-пиченят, вальмятненди повфневихть разнай тюсонь гирляндат, аноклакшневихть казнет мала и радня ломаттненди. Сембе учендыхть илать эса од надияма мархта. Од кизонь карша  корреспондентоньконди удалась васедемс Мордовия Республикань Народнай артисткать, МР-нь Государственнай премиянь лауреатть, Мордовия Республикань Оцюнять премиянц лауреатонц Нина Спиркинать мархта, кона лама киза ни кеняртьфнесыне ломаттнень седиень токай и ваймонь эжди моронзон мархта. Тянь-тонань колга корхнемста артисткась лятфтась, кода ушеткшнесь творческяй киц, азозень мялензон-арьсеманзон малаткшни праздникть колга и стак тов.
—Нина Васильевна, тячи тон содаф артисткат, творчестваце кельгови пяк ламотненди. Азк, пожалуйста, мзярда сргозсь эсот морамань асусь. Пади, шачеть мархтонза?
—Улемс артисткакс мялезель ёт шабакс, но морамазень мес-бди виздень. Тиендине тянь ваномать инголе, мзярда кудсонк кивок ашель. Аньцек оцю класса ушедонь морсема велень самодеятельностьса. Васенда дуэтса, колмоненк стирь ялганень мархта, а тоса кармань морсема ськамонга. Велеряйхне коль шнасть эсон. Нина, кле, тонь вастце аньцек сцена лангса. Тя, конешна, кепсезе мялезень.
—Лама пинге тон морсеть «Келу» фольклорнай ансамбльса. Кода повоть коллективу?
—Эста аньцек срхкань поступама Л.П.Кирюковонь лемса Саранскяень музыкальнай училищав. Экзаменонь максомста приметамань мокшэрзянь содаф фольклористсь, РСФСР-нь искусствань Заслуженнай деятельсь Г.И.Сураев-Королёв. Экзаменда меле маладсь тейне и азозе, што ёрай пуроптомс фольклорнай од ансамбль, а монь вайгялезе—ся, мезе теенза и эряви. Тердемань шоворемс «Келуть» коллективс. Васенда таколдонь, тейне, мярьгонь, тонафнемс эряви. Георгий Иванович сетьмофтемань, тя, кле, тонафнемацти перяфксокс аф арай, меколанкт, сядонга виияфтсы морамань асуцень, а тонафнема кармат заочнай отделенияса. Вов тяфта и арань «Келувонь» солисткакс. 16 киза морсень ансамбльса. А тоса тунь тонафнема Москуву Л.Маслюковонь лемса эстраднай искусствань Всероссийскяй творческяй мастерскои. Тонафнемать шумордамда меле мрдань Мордовияв, но «Келути» оду ашень шоворе. Мзярошка пингонь ётазь мирдезе,   МР-нь культурань Заслуженнай работниксь  Н.П.Спиркин пуроптозе «Арсема» эстраднай группать, конань мархта мон морсян тячемс.
—Малаткшни Од кизось. Тон, Нина Васильевна, кельгсак тя праздникть?
—Кельгса и учендса. Од кизось, койсон, сембонь  минь тиендьсамазь аф ламода шабакс, мрдафнесамазь идькс пингозонк. Родительне фалу старандасть тиемс тейнек, иттненди, афкуксонь праздник. Алязе инголенди каннесь вирьста кузня, сонць и наряжакшнезе. Кузнять алу аноклакшнель казнет, гостинецт. Кажнайсь эздонк Од кизоня получселезе сянь, мезень колга кунара арьсекшнесь. Монь лемозон аноклаф казнетнень ёткса най ульсть разнай тюсонь бантт. Шабакс пяк кувакатольхть шяярне, тядязе эрь шиня тиендсь аф фкя  лацонь причёскат, а сёралнень мазопнелезень бантса. Хуш эряме аф козяста, но тя праздникста шраньконь лангса мезе аньцек ашель. Сембода лияда башка пяк кельгоськ тядяньконь пидефонц-паньфонц: ляптонга ляпе цюкорнянзон, шуваня пачанянзон, калонь салатонц. Синь таньфсна тячемс кяльбрясон. Мзярда касоме, эвондасть минцень семьяньке, Од кизоти сембе сяка пуромкшнелеме тядяньконь-аляньконь шири. Мекольдень кафта кизотнень тядязе эрясь пялонк, сяс илать васьфнеськ Саранскяйса.
—Од кизоти примаф казендемс фкя-фкянди казнет. Тон, Нина Васильевна, сяда кельгсак казендемс или получсемс казнетнень?
—Кельгса казендемс. Пара мялезон, мзярда няендьса, што казнезе кеняртьфтезе ломанть, сяс фалу старандан кочкамс казненди аньцек эрявиксть.
—А ся казнетнень ёткста, конатнень казендезь эстейть, мезсь инь мяляфтовсь?
—Фкя Од кизонь карша максонь концерт, кда аф эльбятькшнян, Атюрьевскяй районца. Выступлениясь ульсь школаса. Концертта меле нажядсь тейне фкя стирнясь эсь тонафтыенц мархта и венептсь мокшекс щаф оцю няка. Сон тифоль эсь кядьса. Казнесь токазе седиезень, вдь мон пяк кельгсайне някатнень. А нинге мяляфтовсь фкя случайсь, мзярда фкя шабанясь концертта меле казезе тейне эсь налхкшканц. Тяфтама казнетне тейне пяк питнихть.
—Мезьса мяляфтовсь тейть 2019 кизось?
—Эрь кизось мезьса аф мезьса мяляфтови. Тяддевок аф кржаль событияда, финцне кеняртьфтихть, омбонцне мялень колайхть. Кирдемок мяльса творчествазень, 2019 кизось аф кальдяволь. Артисттнень эряфснон оцюшка пяльксоц сотф концерттнень, выступлениятнень мархта, но аньцек аф ламось ёткстост лядондыхть мялямса сембе пингс. Тейне и «Арсема» коллективти тяфтамокс тядде арась Башкортостан Республикаса улеманьке. Тя поездкась сяда шарфтсь радня ломань мархта васедеманди, стама лямбоста минь примафтолеме. Башкортостанца ётафтфтольхть кафта оцю мероприятият. 22 ноябрьста Уфа ошса финно-угорскяй нароттнень культураснон ванфнеманц коряс работать рамкаса ульсь оцю концерт, коса примасть участия Башкортостан Республикань и РФ-нь       субъекттнень эзда финно-угорскяй творческяй коллектифне. Пяк лац примафоль «Арсема» коллективоньконь выступленияц, ваныхнень ашель мяльсна нолдамс минь сценать лангста. Омбоце шиня, 23 ноябрьста, республикань Кармаскалинскяй райононь Ильтерякова велеса тейнек удалась примамс участия юбилейнай мероприятиятнень эса, конат лемтьфтольхть мокшэрзянь просветительть А.Ф.Юртовонь шачема шистонза 165 кизонь топодемати. Авксентий Филипповичень лемоц лац содаф. Историяв сон сувась кода мокшэрзянь народонь васенце представительсь, кона марнек эряфонц лемдезе национальнай просветительствати. Тяса тейнек няфтьфоль церькавсь, коса Юртов служась 25 кизода ламос. Ваноськ музеенц-усадьбанц, коса тяниень пингть эряй просветительть унокоц Анатолий Викторович. Ильтеряковаса мон максонь сольнай концерт. Мялезе азомс сюконямань валхт «Мордовский национально-культурный центр Республики Башкортостан» региональнай общественнай организациять председателенцты, Башкортостан Республикань Государственнай Собраниянь—Курултаень депутатти Ю.Н.Герасимовати, кона тердемазь ня пуромксненди и сявозень эсь лангозонза сембе карьхцнень.
—Мезе учендат сай кизоть эзда?
—Мялезе, штоба сон сембонди казель шумбраши и паваз. Надиян, што пяшкодевихть творческяй планоньке, конатнень арьсеськ. Од сёрмадыхненди  эняльдян кеняртьфтемс минь мокшень од стихса, конат кармайхть тяниень пингоннекс, лац ладявихть музыкать лангс. Сашендода ширезонк, каннесть ваномс эсь сёрматфонтень.
Катк Од кизось канды аньцек цебярь!
—Спасиба, Нина Васильевна! Творческяй од сатфкст тейть.
О.Евдокимова.

26.12.2019 №51
 
 
 

 
НОВОСТИ

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 
 
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин