МОКШАВАТЬ ЭРЯФОНЬ КИЦ ПАЧФТЕЗЕ КАРАЧАЕВО-ЧЕРКЕСИЯВ

Шачсь-кассь С.В.Маммаева Атерь велеса Сиркиттнень трудонь кельги семьяса. Семьясь фалу ульсь прянь шнафтома вастокс райцентраса. Аляц, Василий Максимович, содаф врач, краевед. Районнай больницяти макссь пцтай ведьгемонь киза. Тядяц, Анна Ивановна, старшай медсестраль инфекционнай отделенияса. Кельгома тевонцты лемдсь нильгемоньда лама киза. Светлана Васильевнань кафта брадонза. Михаил Васильевич—Главнай ветеринарнай врач Атюрьевскяй райононь ветстанцияса. Алексей Васильевич покоди связьса, цебярь специалист. Светлана Васильевна инь оцюсь семьяса. Пяк мялезонзоль родителень профессиясь. Но, штоба поступамс медицинскяй вузу, эстовок ульсь аф тёждя. Светлана Васильевна тонафнесь аньцек «ветес». Тянемс аньцек лямбе валса лятфнесыне васенце учителенц М.Т.Макаровать, класснай руководителенц А.С. Панфиловать, лиятнень лемснон. И вов школать аделамда меле Светлана Сиркинась, фкя класса тонафни ялганзон  Светлана Андреевать, Светлана Юдинать мархта арьсесть поступамс тонафнема медицинскяй училищав, мяльсноль арамс пеень пчкафты докторкс. Ялганза поступасть училищав, а Сиркинать каршек ащесь тядяц Анна Ивановна.

—Профессиясь, конешна, пара,—мярьгсь мокшавась.—Но кда ни ули мяльце арамс стоматологокс, эряви поступамс вузу.

Тяфта стирсь и тись. Кочказень кагодонзон и максозень Дагестанскяй Медицинскяй институту стоматологиянь отделенияв. Тонафнесь аф кальдявста.

—Куду сашендонь шуроста,—азонды Светлана Васильевна.—Кизоти весть-кафксть. Кизонь и лия каникулатнень ётафнине ялганень ширеса. Примсемазь Дагестанонь и лия семьятнень эса пяк лац. Народсь Дагестанца машты инжиень примама. Но кирдема мяльса сявок, кода маштат прянь вятема, мархтост фкя кялень мушендома. Синь пяк эсь  культурань, кялень, коень-обуцянь ванфты ломатть.

Светлана Васильевна няфнезе эсь прянц аньцек цебярь ширде. Сай пингонь мирденцка музе Дагестанонь Медицинскяй институтста. Наби Магомедовичень мархта кота кизот тонафнесь фкя группаса. Сон тяни содаф врач-стоматолог Карачаево-Черкесскяй республикаса.

—Лац примадязь семьясост? Каршек ашесть моле Набинь раднянза?—кизефнеса Светлана Васильевнань.—Синь, кода содаса, лия национальностень ломаттнень аф пяк нолдасазь семьязост.

—Васенда рьвяяманьконь колга кулять васьфтезь аф мяль вельде,—отвечась авась.—А пингонь ётазь оцю семьяса арань инь кельгома ломанькс. Примамазь пяк лац.

Светлана Васильевнань атявозец, Магомед Алиевич, войнань ветеран, кулось аф кунара. Авозец, Аминад Гасановна, тылонь труженица. Теенза 99 киза. Прянц марясы нинге отькорьста, старандай лездомс эсь семьянцты. А Маммаефнень семьясна—тя вете церасна  и кафта стирьсна. Тапарят унокнень лувомста. А мзяра уноконь идьсна. Уноконь иттненьге улихть ни идьсна. Светлана Васильевнань и Наби Магомедовичень колма идьсна. Цёраснонды, Зураб Набиевиченди, 31 киза. Сон Карачаево-Черкесияса аделась Юридическяй институт. Работай республиканскяй ФСБ-са. Стирьсна, Оксана Набиевна, стане жа арась юристокс. Работай «Светлана» ограниченнай ответственность мархта обществаса юристокс. Милана тонафни вейхксоце класса. Отличница. И сон арьсекшни школада меле поладомс тядянц и алянц тевснон. Касыхть уноконясна-кафтаськасна.

—Кодама кяльса корхтайхть шабатне?—кизефтине Светлана Васильевнань.

—Фкя-фкянь мархта корхнетяма рузкс,—отвечась сон.—Мирдезень родителенза—даргинецт. Тя кяльть содасы аньцек оцю цёразе. Сонь ваннекшнезе бабац, Аминад Гасановна. Минць то тонафнеме, то покодеме. Бабась, шарьхкотьф, кодама кяльса корхнесь мархтонза. Оксананьконь лемдеськ бабазень лемса.

—Каршек ащихть ашельхть?

—Аш, конешна. Кода мярьгонь, стане и лемдеськ. Овозе и рьвянязе—лезгинецт. Сяс тянь ширде аш кодамовок прябалат. Марстонь кяль мушенттама. Семьясонк азорондай кельгомась, ладямась, фкя-фкянь шарьхкодемась. Оттне путыхть честь сиретненди, сиретне старандайхть аф обжамс оттнень.

—А мокшекс корхнетяда?

—Корхнелеме да аш кинь мархта корхнемс. Гайфтихть Мордовияста, аф ваномок мезеньге лангс, отвечан мокшекс. Тя кяльсь монь, сон тейне родной.

—А иттне мокшекс шарьхкодихть?

—Мзяра-бди вал содайхть, аф ламня шарьхкодихть. Атери сашендсть и сашендыхть, а Атерьса аньцек мокшекс и корхтайхть.

—А Карачаево-Черкесияса мокшет улихть?

—Азса видеста, мокшэрзянь крайста ломань мархта васьфнян пяк шуроста. Пади, синь и улихть.

Но сембе сяка Светлана Васильевна васьфнесь Мордовияста ломань мархта. Лятфни нльне тяфтама пример. Рамась мирденцты картуз. Сась алясь илять куду картузфтома.

—Коза тиить картузцень?—кизефнесы Светлана Васильевна. Наби Магомедович и отвечай:

—Казине.

—Кинди?

—Васьфтине землякцень. Корхнеме Мордовиять колга. А казненди максыне картузозень.

Вов кодама ломанць Наби Магомедович. Кда ни кельгсы эсь рьванц, кельгсы и Мордовиять. Рьванц земляконза теенза раднят, кельгома ломатть. Сон максы аф аньцек медицинскяй лезкс, но и аф нолдасы казнефтома.

С.В.Маммаева Дагестанонь Медицинскяй институтть аделамдонза меле мирденц мархта прважафтольхть покодема Карачаево-Черкесияв. Кафцьке стоматолокт. 1990 кизоста сявомок Светлана Васильевна работай идень стоматологическяй поликлиникаса. Профессиянц кельгсы. Шнама ломань коллективса. Кельгсазь иттневок.

—Мон, штоба озафтомс шабать креслати, седикс-ваймокс корхнян, налхксян мархтонза,—мярьгсь Светлана Васильевна.—Шутендазь, васькафнезь кизефнеса, мезе лиссь пейнянц мархта. И кда сярядись анок, аньцек эста кярьмодян тевс.

С.В.Маммаева—Карачаево-Черкесскяй Республикань Заслуженнай врач, Российскяй Федерациянь стоматологонь Ассоциациянь отличник, высшай категориянь специалист. Мирдец, Наби Магомедович, Заслуженнай врач, республикаса Росздравнадзоронь сотрудник, кочкаф Карачаево-Черкесияса эряй Дагестанонь народонь диаспорати оцюнякс. Маммаефнень синцень медицинскяй центрасна, кона канни «Светлана» лем. Кельгома мирдец лемдезе кельгома рьванц лемса. Тя центраса пчкафтыхть пейхть.

Мокшавать оцю кудоц, кона вайси панчф и шуфтоня потмос. Тяса аф весть ульсть раднянза Мордовияста. Тяддевок арьсекшни тердемс ваймама тядянц, аканц. Аньцек фкясь кальдяв, раднянза сиренят ни. Ваймама молемс согласиндакшнихть аф мяль вельде. Кода корхтай тядяц, Анна Ивановна, пяк ни ичкозе. Да и кудценьге аф кадсак. Переце, куднармоттне. Синь мельгаст ванома.

Куватьс корхнеме С.В.Маммаевать мархта. Аф ваномок мезеньге лангс, сон ашезе юкста родной кяленц, кельгсы сонь. Мзярда сашенды Атери, сявонди тумстонза и «Мокшень правда», кона ламоксть сёрматкшнесь родителензон, брадонзон и лия раднянзон колга. Няфнесы газетать семьянцты, ялганзонды, мирдень ширдень раднянзонды. Мокшекс сёрматфть ётафнесы рузонь кяльс. И, кода виденцясь Светлана Васильевна, кда «Мокшень правдась» улель Россиянь Почтань каталогса, сёрматфтоль тядянь-алянь кяльса газета.

Илья Вешкин,

Россиянь Писателень союзонь член.

Снимкаса: С.В.Маммаева мирденц Наби Магомедовичень, идензон Зурабонь и Оксанать, мирденц родителензон, Магомед Алиевичень и Аминад Гасановнань мархта.