СТЕНЮШКИТТНЕНЬ СЕМЬЯСНА ПОЛУЧАЙ КАЗНЕ РОССИЯНЬ ПРЕЗИДЕНТТЬ КЯДЬСТА

Кода азозь Стенюшкиттне, синь афи надиясть, што сувайхть казьфнень лувксс, сяс мес сембе каготтнень кочкамдост меле ётась ни лама пинге. А тяса ёфси Од кизонь карша теест пачфтьфоль, што синьге улихть тертьфт Москуву, коса синь казьсыне странань Президентсь.

Лятфтасаськ, «Родительская слава» орденць макссеви родительхненди (усыновительхненди), конат касфтыхть сисем или сяда лама шаба и няфнихть тя тевса цебярь пример.

Стенюшкиттнень эзда афкукс ули мезьса тонафнемс. Полатне Роман и Наталья эряйхть марса комозьда лама киза. Кафцьке работайхть юристокс. Краснослободскяйса синь синцень оцю кудсна, коса фалу кайгихть шабань весяла вайгяльхне. Эздост Стенюшкиттнень вейхкса—кафта цёранят и сисем стирнят, сембе роднойхть. Оцюфне—кафтасне, тонафнихть Н.П.Огарёвонь лемса МГУ-са, а инь ёмланяти аньцек пяле кизоня. Эсь шабаснон колга мирттне-рьвятне корхтайхть гордостень марязь. Сембе синь лац тонафнихть школаса, университетса, кельгсазь творчествать: финцне якайхть «художкав», омбонцне шарфнихть мяль музыкати. Улихть и синцень обязанностьсна, кажнайсь вийс коре лезни тядяснонды-аляснонды кудонь, куд пирьфонь, перень тевса. Ёмлатне кудботма аруяфтыхть, кядьгот штайхть, сяда эзрайхне симдихть-андыхть жуватат, кочкихть панденят.

Улихть Стенюшкиттнень и синцень койсна-обуцясна: сембе марса отмечсесазь эрть шачема шинц, васьфнесазь Од кизоть. А нинге, мзярда эвондакшни пингсна, семьянек лисендихть природав, тялонда пара мяльса курькснихть соксса.

Корхтамок кеме и павазу семьянь секреттнень колга, полатне фкя мяльса азозь: васенцесь—кельгомась. Кда кармай сон, эста семьяса фалу ули шарьхкодема. Стенюшкиттне най ужяльдихть фкя-фкянь, пичедихть, кда кивок эздост урмаяй или лиси кодамовок лия зиян. Седиге кеняртькшнихть кажнайть сатфксонзонды. Семьясь аф кельгсы лама пингс явондомс фкя-фкянь мархта. Хуш оцюфне тяни студенткат, тонафнихть ошса, синь сидеста сашендыхть куду, коса теест пяк лажаткшнихть, учендсазь.

Тяниень пингть аф сидеста васьфтят семьят, коса касфтови ниле-вете шаба, а Стенюшкиттнень эздост вейхкса. Тняра идть касфтомац, шарьхкотьф, аф тёждя, но мирттнень-рьвятнень сталмотне аф эвфнесазь. Эрь шабась теест оцю кенярдема. Идьснон ёткса синь юкснихть сембе прябаласнон колга, марясазь пряснон павазудонга павазу ломанькс.

Эряви азомс, Стенюшкиттне Мордовияста аф васенце семьясь, кона сатозе фкя инь почётнай государственнай казнеть. 2018 кизоня, кепотьксонди, «Родительская слава» орденца казьфоль Зубово-Полянскяй райононь Ширингуши велеста Урсофнень семьясна.

                                                                                                О.ЕВДОКИМОВА.