Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

—Эрь кизоня Победань шись, аф ваномок сянь лангс, юбилейнай сон или аф, Мордовияса васьфневи-ётафневи пяк келиста. Пуропневсь «Победа» лем ала оргкомитет, кона вятезень  сембе анокламатнень. Тядде, кирдемок мяльса  илать оцю значениянц (улема, сон арай юбилейнай мекольце датакс, конань тейнек удалай васьфтемс марса нинге шиса лятф ветераттнень мархта), республикасонк пуроптф Победань шити анокламать коряс Дерекция. Сонь вятьсы МР-нь Правительствать Председателенц заместителец Г.А.Лотванова. Мялямонь и славань кизось ушедовсь «Блокадный хлеб» федеральнай проектть мархта. Пара койс коре, тяддевок ётафтовихть ломаттненди тонатф и кельгови тяфтама акциятне, кода «Георгиевская ленточка» и «Парта героя», а стане жа «Бессмертный полк» шествиясь.

Тяда башка, тевс нолдавихть кемотть од проект и акция. Аньцек минь музейсонк арьсекшневи ётафтомс сядода лама памятнай мероприятия, конатнень ёткса выставкат, лятфнемань илятть, историческяй квестт, мужествань урокт, ветераттнень мархта васедемат, фестивальхть и стак тов.

Лама тиеви Великай Отечественнай войнаса шавфненди лемтьф памятникнень и мемориалхнень петемаснон коряс.

—Мекольдень кизотнень Европань кой-кона странатнень эса тяряфневи, кода корхнихть, «одукс тяштемс историять», муворгофтомс Великай Отечественнай войнать ушедомаса аф гитлеровскяй Германиять, а Советскяй Союзть. Кодамот мяльхне-арьсематне тянь коряс, Николай Андреевич?

—Эряви верондамс аф шава валхненди, а документтненди. Азомс можна мезе мяльце, но, кда тя азфсь апак кемокстак кагодса, питнесна ня корхнематнень ёфси аш. Президентсь В.В.Путин Федеральнай Собранияти Посланиянц эса азозе, што тейнек эряви пуроптомс Великай Отечественнай войнать колга кинодокументонь и фотодокументонь козя архив, коста лац содави сембе видешись, штоба афоль удала «рдазыяфтомс» советскяй солдаттнень валда лемснон, кяшемс-сёпомс синь героическяй подвигснон, конат максозь эряфснон аф аньцек Советскяй Союзть и Россиять, но и Европать мирнай эряфонц инкса.

—Тяса, шарьхкотьф, аф ёмла васта занци од ломаттнень ёткса патриотическяй работань вятемась. Кодама тефт мольфти тянкса Мемориальнай музейсь?

—Патриотическяй работа музейса работайхне вятихть кода идень садонь воспитанникнень, стане и школьникнень, и студенттнень мархта. Дошкольникне эсь наставникснон мархта синць сашендыхть музеи, или, кда аш тяфтама возможностьсна, сотрудникне пуропнихть выездной выставкат «Музей в чемодане» акциять рамкаса. Стане жа сотрудниконьке весть ковти улендихть школатнень эса, коса лувондыхть тонафнихненди войнать колга лекцият.

Музейсонк вятеви оцю работа войнаса шавф земляконьконь лемснон сембе пингс мяляфтомаснон колга, народоньконь подвигонц келиста содафокс тиеманкса. Экспозициятне сидеста козякофневихть од даннайса, од геройса. Эрь кизоня эвондакшни 2-3 тёжянь экспонат. Тяниень пингть мемориальнай музейса ванфтови 60 тёжянь экспонат—тя казнет, фотографият и документт ветераттнень  личнай архивснон эзда, ордетт, медальхть, фронтовой сёрмат, стрелковай оружия. Сембось тя питнидонга питни реликвия, кона эряви ванфтомс сай пингонь поколениятненди. Музейса ванфтовихть даннайхть аф аньцек фронтовикнень, но и тылонь труженикнень колга, конатнень сяськомать  сатоманцты путкссна стане жа пяк оцю.

—Николай Андреевич, историять, Великай Отечественнай войнаса шавфнень лемснон мяляфтоманкса лама тиенди «Поиск» патриотическяй объединениясь. Азонтт пуроптоманц колга и кодама работа сон вяти тячи.

—Эсь историянц объединениясь вятьсы 1975 кизонь 25 мартста сявомок, мзярда Большеберезниковскяй райононь Гузынскяй школань «Сияжар» историко-краведческяй кружокть видеса панчфоль «Краснай следопыттнень» штабсна. 1983 кизоня сон лемтьфоль «Поиск» поисковай отрядкс. Школань тонафнихне, конат сувсесть отряду, тонафнезь шачема масторть историянц, кочксесть экспонатт, документт школьнай музеи, тяшнезь войнань ветераттнень лятфнемаснон, вешендезь синь фронтовик ялгаснон. Васенце экспедицияц «Поиск» отрядть ульсь 1988 кизоня. Смоленскяй областень Рославльскяй районца стирьхне-цёратне васенцеда няезь тюремань васттнень: окопнень, траншеятнень, воронкатнень, гильзатнень, осколкатнень. Ся пингста сявомок эрь кизоня отрядсь уленди тюремань васт-тнень эса.

Тячи «Поиск» объединенияти сувси 85 поисковай отряд, коса марса лувондови 1350 боец. Отряттне работайхть республикань школатнень, колледшнень и вуснень видеса. Сембе муниципальнай райоттнень эса улихть объединениять башка отделениянза.

35 кизоста республикань поисковай отряттнень эса мужествань и патриотизмань школа ётасть 7000-да лама стирь и цёра. Ульсь 258 поисковай экспедиция, конатнень пингста муф и почесть мархта калмаф Якстерь Армиянь 4897 и  омба масторонь  100 солдат, муф 468 солдатскяй медальон. Архивонь документтнень коряс содаф 8000 солдатонь судьба, конат  лувфтольхть куляфтома юмафокс.

Поисковай работась—тя аф модас коре мольфтеви тев. Од ломанць, самок отряду, марясы прянц сяда малакс Великай Отечественнай войнань геройхненди, синь судьбаснонды, шарьхкотькшнесыне ся кизонь сембе сталмотнень, ризфнень. Кеподемок окопста, траншеяста, блиндажста, воронкаста солдатть ловажанц, од стирсь или цёрась содасы, што сонь мяляфтсазь, учендсазь радня и мала ломаненза. Мумс боецть, содамс лемонц, достойнайста калмамс, пачфтемс муманц колга раднянзонды—вов мезенкса якайхть эрь кизоня тюремань  васттненди поисковикне. Тиендьсазь тянь аф ярмаконкса, казненкса, а куляфтома юмаф солдаттнень инкса, конат шавовсть  кельгома ломаньцнон, родинаснон инкса.

—Спасиба, Николай Андреевич! Сатфкст аф тёждя, но  пяк эрявикс тевсонт!

О.Евдокимова.