Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Культура

Мордовия Республикань А.С.Пушкинонь лемса Национальнай библиотекать директороц А.В.БАКУЛИНА: «ВАСЕНЦЕ АСЬКОЛКСНЕ ТИФТ НИ»

 «Цифровая экономика» национальнай проектть вешфксонзон коряс, тячиень шити библиотекасонк     тиф информационно-телекоммуникационнай цебярь инфраструктура, кона ноляви тевс лувихненди научнай и лия эрь кодама информациянь курокста максоманкса. Тяфта жа сонь вельденза библиотекасонк цифровой накопительса ванфтовихть шуроста васьфневи и лия книгатне, конатнень лувихненди ули кода мумс-лувомс интернетть ресурсонзон вельде. Сяс тячи тейне ули кода азомс: услугатнень лувкссна, конатнень библиотеканьке макссесыне Мордовиянь, Россиянь лия региононь и мянь омба масторонь лувихненди, меля няевиста кассь.

 

Инь оцю задачась, кона путф инголенк «Образование» национальнай проектса, ащи вов мезьса: касфтомс Россиянь образованиять конкурентоспособностенц мирса, сувафтомок странаньконь общай образованиять качестванц коряс миронь ведущай кемонь странатнень ёткс. И тянь минь тиендьсаськ, лездомок касфтомс общай образованиять Мордовия Республикаса цифровой технологиятнень тевс нолдамаснон вельде.

 

Кепотьксонди, ётай кизоня минь сувафтоськ республикань школьнай и высшай учебнай заведениятнень фкя-марстонь электроннай каталогс. Тяни  школаса тонафнити или студентти интернетонь ресурснень вельде ламода сяда тёждяста муви эрявикс книгась республикань любой библиотекаса. Курок тянь ули кода  тиемс странань или омба масторонь любой библиотекаса, сяс мес минь региональнай каталогоньке сувафтови Россиянь фкя-марстонь каталогс, а тона—омба мастороннес.

 

Тяфта жа меля минь тиеме-нолдаме Мордовия Республикань библиотекань лувиень электроннай фкя-марстонь билет. Сонь вельденза лувити ули кода сявомс куду книга Мордовиянь любой библиотекаста, аф ваномок сянь лангс, республикань кодама ошса или велеса сон эряй.

 

Шарьхкотьф, 2024 кизоть самс, мзярс странаса кармайхть мольфтевома национальнай проекттне, Мордовия Республикань А.С.Пушкинонь лемса Национальнай библиотекати сави тиемс нинге лама тев синь вешфксснон педа-пес пяшкодеманкса. Но васенце, няевомшка оцю аськолксне тифт ни. Сяс ули надияма: ня кафцьке национальнай проекттне тейнек ётафтовихть эряфс цебярьста и эсь пингстонза.

 

—Мекольдень пингть, Анастасия Владимировна, сидеста сашендови кулендемс тяфтама мяльсь: кле, электроннай книгась полафтсы ёфсикс тяфтамка книгать…

 

—Мзярда эвондась телевидениясь, эстовок ламонцне ломаттнень эзда корхнекшнесть, кле, тяни сон полафтсы киноть, театрать… Но, кода тячи няйсаськ, телевидениясь музе синь ётксост сонцень  вастонц. Сяс, койсон, тянь тячи ули кода азомс электроннай книгать и цифровой технологиянь лия ресурсненьге квалма.

 

Кда сявомс ётай кизонь статистикать, сон няфнесы: библиотеказонк книганкса сашендсь пцтай 20000 ломань. Тяфта жа лама ломань сашенды книгань лувома библиотекань залу. И, эряви азомс, тяниень пингонь од лувихне ингольденнетнень лаца тяфта жа кельгсазь рузонь, мокшэрзянь и омба масторонь литературань классикать.

 

Тякоть ули кода азомс электроннай книгань лувихненьге квалма.

 

—Анастасия Владимировна, кода тяниень пингть пяшкотькшневихть библиотекать книгань фондонза?

 

—Мордовия Республикань А.С.Пушкинонь лемса Национальнай библиотекась, 1958 кизоста сявомок, марса мольфти тефт региональнай Книжнай палатать мархта. Нюрьхкяняста азомс, вяти учёт республикаса ноляви-лисенди газетатнень, журналхнень и книгатнень государственнай регистрацияснон и библиографияснон мельге. Сяс ня изданиятнень  тифтень экземплярсна сувси минь фондозонк. Тяда башка, республиканскяй бюджетста кагодонь и электроннай книгань рамамс эрь кизоня тейнек ноляви  2 миллиотт цалковай. Тяфта жа библиотекати сидеста казендьсазь  эсь од книгаснон Мордовия Республикань и Россиянь поэттне, писательхне, наукань и искусствань деятельхне.

 

Сяс А.С.Пушкинонь лемса Национальнай библиотекать кагодонь и электроннай книгань, журналонь и газетань фондонза эрь кизоня няевиста пяшкотькшневихть. Тяниень пингс библиотекань сембе   фонттнень эса ванфневи аф фкя лацонь изданиянь миллионда лама экземпляр.

 

—Кода содасаськ, ётай кизоста сявомок, Мордовия Республикань А.С.Пушкинонь лемса Национальнай библиотекась няевиста келептезе-касфтозе услугань лувксть, конатнень сон макссесыне лувихненди.

 

—Тя афкукс тяфта. Но аф аньцек услугань лувксть тейнек удалась касфтомс. Тяфта жа няевиста кассь лувиень лувксське. И ня сатфкснень тейнек удалась сатомс «Цифровая экономика» и «Образование»    национальнай    проекттнень эряфс ётафтомаснон вельде.

 

Тячи библиотекасонк ули информационно-телекоммуникационнай инфраструктура. Сяс минь сембе мероприятияньконь тяни лувихненди ули кода ваномс интернетонь ресурснень вельде, кода Мордовия Республикаса, стане и Россиянь лия региоттнень эса и омба масторса. Сонь вельденза минь тяфта жа ётафнетяма онлайн-форматса Межрегиональнай мероприятият Россиянь лия региононь головной библиотекатнень мархта, конат каннихть лама цебярьда сембе участникненди.

 

Февраль ковста сявомок  минь карматама ётафнема онлайн-форматса Россиянь лия ведущай библиотекатнень мархта Межрегиональнай форупт, конат лемтьфт Великай Победать 75 кизонь юбилеенцты, Всероссийскяй переписень кизефксненди, федеральнай и региональнай лия оцю событиятненди.

 

Лиякс мярьгомс, национальнай проекттнень эряфс ётафтомасна панчсь Мордовия Республикань А.С.Пушкинонь лемса Национальнай библиотекати касомань-вииямань од кит. И ня китнень эзга молемок, содаса, библиотеканьке кеподи профессиональнай сяда оцю уровеньц.

 

—Удалаза арьсефонте, Анастасия Владимировна.

 

—Сюкпря. Минь карматама работама!

 

В.Нестеров.

 


30.01.2020 №3
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин