Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Здоровье

Китайса эвондась од вирус. Пелемс-аф эздонза Мордовиянь эряйхненди?

Мекольдень пингть телевидениясь и газетатне пачфнихть таколфты куля: Китайса эвондась тяда инголе аф содаф вирус, кона келемкшни лия странатнень эзгавок. Васенце симптомонзон мархта тяфта лемдеви коронавируссь шарфты кельмофтевома лангс, но кафта-колма шида меле ни срхксихть стака осложненият, конат вятихть куломати. Эпидемиолокне таколдыхть—урмаськотфнень лувкссна шиста шис коль касы, а вакцина, кона лоткафтолезе вирусть келемоманц, мзярс аш.
Урмась срхкась ётай кизонь декабрьста Китаень Ухань ошса. Васенце сярядихне ульсть оптовай рынкань мишендихть. Синь мишендсть сиволь и морепродуктат. Васенда специалисттне арьсесть, бта од вируссь сявовсь кодама-бди животнайть эзда, и ломанть эзда ломанти сон аф ётни. Оцю эпидемия апак ученттоль, а сяс туристтнендивок кись тя странав ашезь персев.
Учёнайхнень мяльснон коряс, туфталкс од урмати арасть коронавирусонь «сире» виттнень мутациясна. Ня мутациятненди, кле, ульсь кода тиевомс кой-кона животнайхнень организмаса. Тяса вируссь ламолготкшни, аф тиемок жуватати кодамовок зиян. А вов ломанти сон арась пяк пельксокс. Ломанть эзда ломанти  вируссь ётни кожфть эзга. Кода ни азоськ, васенда урмась няфнесы прянц кельмофтевомать лаца, ломанць ушеды кшняма, эвондакшни сузокстома. Пельксоц вирусть сянь эса, што сон курокста вятни тевлавонь воспаленияти (пневмония), и эста араламс ломанть эряфонц уленди стака.
Урмась келемкшни пяк курокста. Официальнай даннайхнень коряс, 29 январти Китайса урмаськотфнень  лувкссна ульсь кота тёжяньда лама ломань. Мезсь пичефти, тяниень пингти улихть ни од вирусса урмаськотфт Южнай Кореяса, Таиландса, США-са, Японияса, Францияса, Австралияса и кой-кона лия странатнень эса. Россияса од урмась мзярс апак мук. Странаса кемокстаф санитарно-карантиннай контрольсь. Сембе, кит сашендыхть омба масторста, башка Китайста сайхне, ётнихть анкетирования. Самолеттнень и аэропортонь учендомань залхнень эса ладяфт тепловизорхт, конат «няйсазь» кепотьф температура мархта ломаттнень.
Ули-аш пелькс, што коронавируссь пачкоди Мордовияв? Тя кизефксть максоськ Мордовия Республикань Роспотребнадзоронь Управлениянь эпидемиологическяй надзоронь отделонь вятити Ю.Матвеевати. Сонь валонзон коряс, ширезонк урмать пачкодеманц коряс пелькссь пяк и пяк ёмла. Васендакиге, аэропортсонк тяниень пингть аш пропусконь пункт. Сон сёлкф реконструкцияс, а сяс виде авиарейст республиканьконь и Китайть ёткса аф улендихть. Китайста сай сембе ломаттне ётайхть санитарно-карантиннай контроль оцю ошень пропусконь пункттнень эса. И, кда ётксост улихть сярядихть, синь мувихть тоса ни. Кода азфоль, Республиканскяй инфекционнай больницясь сембе сяка ащи анокста. Медработникне курокста ётасть тонафнема, тяса ули сембе эрявикс оборудованиясь сярядихненди лезксонь максоманкса.
Урмать эзда прянь араламанкса васенцесь, мезе мярьгондихть специалисттне, аф якамс Китаи, а сядонга пара мзярс атказамс и лия странав путешествиятнень эзда. Тяда башка, сяда сиденяста шташендомат кяттне, кода можна сяда шуроста улендема лама ломанень пуропни васттнень эса. Кда эвондайхть кельмофтевомань симптопт, эстокиге моледа враченди.
А мзярс республикань медучреждениятнень вийсна водендафт гриппть и ОРВИ-ть пчкафнеманкса. Январь ковть пенцты республикаса лувондовсь ОРВИ-са ниле тёжянть малава сяряди. Кода фалу, инь лама сярядида школань тонафнихнень и идень садонь воспитанникнень ёткса.      
    О.КОЛЕДИНОВА.

06.02.2020 №4
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин