СОН ФАЛУ КАРМАЙ ЭРЯМА ЁТКСОНК

Рузаевскяй райононь Левжа мокшень велеса ётасть республиканскяй участия мархта муниципальнай VIII Учватовскяй лувоматне
Левжа мокшень велесь содаф асу, эсь тевонь кельги, ёню ломанензон мархта, конатнень ёткса и Николай Иванович Учватов. Сон шачсь 1935 кизонь 1 январьста железнодорожниконь семьяса. Шумордазе Рузаевскяй средняй школать, 1957 кизоня—Мордовскяй государственнай педагогическяй институтть физико-математическяй факультетонц, 1963 кизоня—КПСС-нь ЦК-ть видеса высшай партийнай школать. Работцесь «Советская Мордовия», «Молодой ленинец» газетатнень редакцияснон эса. Но эряфстонза сембода лама киза макссь «Мокшень правда» изданияти, коса 1975 кизонь декабрьста сявомок 1986 кизонь августти молемс редактороль. Васенце стихонза лиссть 1956 кизоня «Мокша» журналса, 1962 кизоня рузонь кяльса стихонза нолдафтольхть «Люблю жизнь» Мордовиянь од поэттнень марстонь сборниксост. 1960 кизотнень кучкаста Н.И.Учватов шарфтсь мяль прозати, тяштсь азкст, повестть, роматт.
Николай Иванович Учватов мокшэрзянь писательхнень эзда фкя инь васенцесь, кона кярьмодсь фантастикань жанрати. Тя няеви «Сюра мархта шяйтан», «Взорванный остров» произведениянзон эзда.
1990 кизоста сявомок сон—СССР-нь Писателень союзонь член. Казьф медальса, Мордовскяй АССР-нь Верховнай Советть Президиумонц Почётнай Грамотанц мархта.
Вяре азфта башка, Н.И.Учватов лама тяштсь иттненди. Шабатне пара мяльса лувондсазь «Алят», «Шумбрат, шиня», «Кендиень пиза» книганзон, ламотнень мяльс тусь «Маркуз и Лундан» историко-приключенческяй романоц.
31 январьста Левжа велень клубу пуромкшнесть сят, кит мяляфтсазь Н.И.Учватовонь, кельгсазь сонь творчестванц. Аноклафоль «Журналист, писатель, редактор» лем ала выставка, конань эса няфтьфтольхть Николай Ивановичень книганза, фотографиянза, колганза тяштьф материалхне.  Тяддень 1 январьста топодсь 85 киза сонь шачема шистонза.
Республиканскяй участия мархта муниципальнай VIII Учватовскяй лувоматненди—творческяй илядьс пуромфненди седиста моли лямбе валхт азсть Левжа велень школать директороц Л.А.Рузманова, Рузаевскяй муниципальнай райононь образованиянь Управлениять начальникоц И.А.Винокурова, Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин, «Мокшень правда» газетать главнай редакторонц заместителец Н.М.Лобанов, Мордовия Республикань Заслуженнай поэтсь Р.К.Орлова, Россиянь Писателень союзонь членць Н.Б.Голенков, «Якстерь тяштеня» идень журналть главнай редактороц В.И.Брындина, Иттнень эстетическяй воспитандамань (национальнай культурань) «Тяштеня» центрать директороц А.И.Тишкина, Левжа велень поселениянь оцюнясь А.А.Рузманов, Саранскяйста и Рузаевкаста инжихне, ламотне лиятне. Корхтамаснон эса сембе макссть оцю питне Николай Иванович Учватовонь литературнай творчестванцты, аф весть лемнезь сонь оцю букваста Ломанькс.
Ули мяль, што мзярда ламотне пуромкшнихть и корхнихть тяфтама ломаттнень колга, тя сембе сяка, што синь эрясазь эряфонц. VIII Учватовскяй лувоматне нинге весть няфтезь: тя тяфта!  
Тядде Учватовскяй лувоматне работасть кафта секциява. Васенцесь каннесь «Эрь книгань лопанясь аф содай сиредема» лем,  омбоцесь ётась «Проба пера» творческяй блок лаца, кона лемтьфоль Великай Победать 75 кизонь топодеманцты. Тяда башка, тяддесь Россиянь Президентть Указонц коряс,  азф Мялямонь и славань кизокс, сяс Учватовскяй лувоматнень ули кода лемдемс юбилейнайкс. «Проба пера» секцияса участия примасть Рузаевскяй райононь ламоц школатнень эса тонафнихне. Итокт работаснонды тись жюрись. Левжа велень клубса ётась Георгиевскяй лентанять тиеманц коряс мастер-класс. Цебярь казнекс сембе инжихненди арасть эсь кядьса тиф мазы Георгиевскяй лентанятне.
Кайгсть морот, стихотвореният. Тя велесь кунара содаф кайги вайгялензон мархта. Лама кизода инголе тяса пуроптфоль «Ару лихтибря» народнай фольклорнай коллективсь, кона сидеста морси пуромкснень эса. Сонь руководителец Л.Г.Канаева. Мокшэрзянь мазы моротненди кельгомась ётни поколенияста-поколенияс. Кштимаснон-морамаснон кельгсазь школьникне. И оцю мяльса тиендьсазь тянь «Пайгонят» фольклорнай ансамбльса художественнай руководительть О.В.Сонаевать руководстванц ала. Тянивок пуромфне кулезь кафта коллектифнень выступленияснон.
Николай Иванович Учватовонь лемс васенце (и сяда мельдень) лувоматнень ётафтомаснон инкса лама тись, аф кржа вий путсь Левжань эряйсь, учительсь Е.Б.Ивлиева. Мзяра шнама, сюконяма вал азфоль лемозонза—газетать фкя лопац аф саты, кда тяштемс синь сембонь. Тяни Елена Борисовна пенсияса, но оцю мяльса примась участия творческяй илядьса. Вятезе пуромксть Левжань школань мокшень кялень и мокшэрзянь литературань учительсь Н.Я.Учватова, кона лямбе валонзон мархта мусь киня эрь инжить седис.
Рузаевскяй муниципальнай райононь Централизованнай библиотечнай системась нолдась Н.И.Учватовонь 85 кизонь топодеманцты лемтьф «Журналист, редактор, писатель» буклет. Сон казьфоль творческяй илядьс сайхненди.
Ужяль, мес Н.И.Учватов кунара аш шиса. Сон тусь эряфста 1990 кизонь 11 октябрьста, калмаф Левжав. Но эрь содаф ломанць эряй снярс, мзярс сонь мяляфтсазь и лятфнесазь. Николай Ивановичень колга мялямсь кармай эряма фалу.
Т.АЛЬШИНА.