Сонь стихонза морасазь шачема крайть мазышинц

Виктор Гадаев стихонь сёрмадома ушедсь нинге школаса тонафнемста. Васенце строчканза лемтьфтольхть шачема веленцты, ся мазы васттненди, коса сон ётафтозе идькс пингонц, морсезень шобдавань зарятнень, шить лисеманц. Новотроицк велесь ингольдень кизотнень каннесь слава эсь мишендема-рамсема куженц, базаронзон мархта  и тя темаське поэтть васенце стихонзон эса занцесь башка  васта.
—Минь земляконьконь, кельгома ломаненьконь, поэтоньконь Виктор Гадаевонь стихонза азондыхть и мрдафнесамазь ся пингти, мзярда эрясть, вятсть тефт, ётафнесть эрь-кодама илат минь тядяньке-аляньке, атяньке, бабаньке,—мярьгсь творческяй илядть панжемста поэтть кунардонь ялгац, «Новотроицкий» Агрохолдинг ООО-ть Генеральнай директороц, Мордовия Республикань Госсобраниянь депутатсь В.В.Руженков.—Минь марятама оцю гордость эсь велеряеньконь творчестванц инкса, сонь стихонза и прозаса сёрматф произведениянза лувить аф кадондсазь озадонь седихть ащема, меколанкт, мяльце лувондомс синь нинге и нинге весть.
Владимир Викторович Руженков азсь мяль содаф поэтть В.А.Гадаевонь лемс Новотроицк велеса эрь кизоня ётафнемс Гадаевскяй лувомат. Ня валхнень залса пуромфне васьфтезь кядень кайги цяпамаса, ломаттне кирдезь тя предложениять ширенц и пяк кенярдсть тянди. Кода тя сембе тиема официальнайкс,  сценать лангса корхтамста азозе Мордовия Республикань Писателень союзть председателенц тевонзон тиендисна Н.И.Ишуткин. Николай Иванович тяфта жа лама лямбе вал азсь поэтть творчестванц колга, кода марса синь работасть, кода шарьхкотькшнесть фкя-фкянь.
Поэтть Виктор Гадаевонь васенце стихонза лисендсть «Советская Мордовия» газетаса, «Литературная Мордовия» альманахса, лия печатнай изданиятнень эса. 1963 кизоня сон поступай тонафнема А.М. Горькаень лемса Литературнай институту, конань аделамдонза меле мрдась Саранскяи, нинге сяда лама кармась сёрмадома од стихт, поэмат, прозаса произведеният. 1969 кизоня Мордовскяй книжнай издательстваса «Вечная мельница» лем ала лиссь поэтть стихонь и поэмань васенце книгац. Пяк лямбоста сонь васьфтезь и лувихне, и литературнай критикне. Тяда меле лиссть поэтть «Праздники сердца», «Качка мёда», «Свет отчего края» сборниконза, конатнень эса няевсь писательть кельгомац шачема-касома ширети, сонь перьфпяленцты, ломанензонды.
Творческяй илядьса седиста моли валхт поэтть творческяй кинц, сонь сёрматфонц колга азсть учёнайхне Г.И.Горбунов и В.И.Рогачёв. Кафцьке синь ламоксть васьфнесть, кирдсть кеме соткст поэтть В.Гадаевонь мархта, сонь произведениянзон лангс сёрматкшнесть рецензият, статьят, лувондсть лекцият студенттненди. Лямбоста корхтась В.Гадаевонь колга мокшень поэтессась Рая Орлова, азондсь ся васедематнень колга, конат ётнесть кафта поэттнень ёткса, лувозень Рая Орловась и эсь стихонзон.
В.А.Гадаев лама сёрмадсь войнань темас, азондсь ся ломаттнень колга, конат аф пелезь стясть Родинать араламонза, маласькофтозь Победань шить. Аф стак тя шиня сценать лангса кайгсть поэтть войнати лемтьф стихонза, ся моротне, конат сёрматфт поэтть произведениянзон лангс, тяда башка, слайттне азондсть Виктор Гадаевонь эряфонь кинц колга. Илась тусь сембонь мяльс и мяляфтови лама пингс.
Н.АМАЕВ.
Фототне Н.Карановонь.