ТОНАФТСЫНЕ ШАБАТНЕНЬ КЕЛЬГОМА СЕМБЕ МИНЦЕННЕТЬ

«Мокшаваня» рубрикать вятьсаськ аф васенце кизось ни. Тя пингста содафтоськ лувить лама асу землячканьконь и нльне ширеса эряй мокшаватнень мархта. Ётксост кштий-морай ломатть, сюреса сёрмадыхть, пидемань-панемань тевса маштыхть, моронь, сиде моронянь латцихть и лият. Тячиень героиняньке Людмила Александровна Сланина. Сон—учитель, тонафты шабатненди мокшень и рузонь кяль. Тяда башка, Людмила Александровна вятьсы 7 классть, лиякс мярьгомс, лангсонзот класснай руководствань тефне. Эсь тевонц од мокшавась пяк кельгсы, сяс эрь шобдаваня работама срхкси кепотьф мяльса, а отпусконь пингста лажаткшни тонафниензонды.
Людмила Александровна эсь народонь-плямань кельги ломань. Оцю мялец, штоба ванфневоль кяленьке, козя культураньке, эсь лацонь коеньке-обуцяньке. Школаса Л.Сланина пуроптсь мокшэрзянь культурань уженя, конань коряс содафнесыне шабатнень мокшетнень сядынгольдень эряфснон-ащефснон мархта.
Ня шитнень удалась васетькшнемс Л.А.Сланинать мархта и максомс теенза кой-кодама кизефкст. Корхнеманьконь лувость алува.
—Людмила Александровна, улель пара, кда азондолеть нюрьхкяняста эсь колгат: коса шачеть-касоть, коса тонафнеть?
—Ёмла родиназе Инсарскяй райононь Заря посёлкась, тоста, кода корхнихть, и ушедовсь эряфонь сюре кизень орадомац. Касонь простой рабочаень семьяса. Алязе лама киза покодсь водителькс, тяни сон аф работай. Тядязе покоди лавкаса. Семьясонк мон омбоце шабась. Ули сестразе, кона оцю корязон фкя кизода. Эсь поселкасонк шумордань ниле класст, а меле содамошинкса якань Инсар ошень 1№ школав.
Школада меле поступань тонафнема М.Е.Евсевьевонь лемса МГПИ-в. Мзярда аделайне вузть, шачсь иднязе, кафта кизот ащень мархтонза декретнай отпускса. А сяльде лисень работама Саранскяень 3№ школав. Ниле кизот ни покодян тяса.
—Сидеста уленди стане, што арамс учителькс стирнятне арьсекшнихть нинге шабакс. А тонь мархтот кода лиссь, Людмила Александровна?
—Моньге мархтон тяфта ульсь. Ёмласта, мяляфтса, озафнелине няканень инголен и коль тонафтонь эсост. Кода афкуксонь школаса ульсть ётксост и «отличникт», и «кафтонь» получайхть. Стирня ялганень мархта налхксемстовок инь кельгине «тонафтыкс» налхксемать. Учителькс улендень най мон.
—Тонафтсак шабатненди мокшень кяльть. Тонцьке, улема, кельгсак родной кяльцень?
—Пяк кельгса. А кода аф кельгомс сонь, кда онценьге няйсак мокшекс. Тя, койсон, моли семьяста, тядятнень-алятнень эзда. Родительне стане жа кельгсазь родной кяльснон, а сяс миньге, иттнень, ашемазь тонафне, кода ламотне, корхтамс рузкс. Виде, мон ламос ашине сода литературнай кяльть. Мокшень кялень урокт ашесть вятев аф эсь поселкань школасонк, аф Инсарса. Тонафнемонза ушедонь аньцек пединститутса.
Тячи кеняртьфнесамань ся, мес мокшень кялень урокненди шабатне сашендыхть пара мяльса. Тя аф аньцек мокшень семьяса шачфне-касфне, но и лия национальностень иттне, кепотьксонди, русне и татархне. Аф прянь шнафтомга азса, учениконе фалу примсихть участия родной кяльхнень коряс олимпиадатнень, конкурснень эса, занцихть призовой вастт и нльне лисендихть сяськикс. Меля, кепотьксонди, ученицазе София Борисова сяськсь «Родной язык в моей семье» республиканскяй конкурсса. Эсь работанц инкса София получазе Мордовия Республикань Оцюнять премиянц. Аф кржа олимпиадаса сяськикс лисендсь мокшень стирнясь Олеся Осипова. Аф ваномок сянь лангс, што кассь сон Саранскяйса, васенце кялькс теенза ульсь мокшеннесь и аньцек сяльде тонадозе рузонь кяльть.
—Сувамок классу, сельмованфоньке эзк прась мокшэрзянь культурань уженять лангс. Азонтт тяса уликсть колга.
—Мзярда сань школав работама, ушеткссь тя музейти путфоль ни. Аноклафоль мокшень кудботма лангс шарфты макетсь, ульсть ни кой-кодама паршихть, но эздост аф ламоль. Тонафнихнень мархта ушедоме саворне козякофнемонза экспозициять. Тяса эряви азомс сюкпря шабатненди и синь родительснонды, конат пачфтсть велеста мокшень щапт, кядьгот, понань кштирдема лапа, кудъётконь сядынгольдень паршихть. Музееньке, арьсян, лиссь аф кальдяв. Меля классоньке сяськсь «Мордовскяй (мокшень, эрзянь) кялень инь цебярь кабинетсь» республиканскяй конкурсса.
—Россиянь Президентсь В.В.Путин Федеральнай Собранияти Посланиянц эса примась решения сувафтомс тевс выплатат классонь вятеманкса. Тон, Людмила Александровна, кода васьфтить тя кулять?
—Виденц азомс, мзярс аф верондаван. Кулясь, шарьхкотьф, пяк и пяк кеняртьфти. Зарплатаньке, содаф, аф конашкат, сяс ня выплататне арайхть тейнек оцю лезксокс. Классонь вятить работац аф тёждятнень эзда. Тейнек аф аньцек тонафтомат шабатне, но и старандама арамс теест омбоце тядякс, ужяльдемс, максомс эрявикс совет, ялгафтомс иттнень эсь ётковаст. Ладяф выплататне, арьсян, кошардсамазь работамс сядонга лац.
—Людмила Александровна, кода ётафнесак ётка пингцень?
—Семьянь келеса якатама соксса и конькаса курькснема. Тяда башка, кельгса книгань лувондомазень.
—Азонтт аф лама семьяцень колга.
—Мирдезе Саранск ошенне, национальностьс коре сон эрзя. Касы стирняньке—Вероника. Теенза кота кизот. Тядде моли васенце классу.
—Шачема велесот сидеста улендят?
—Аф содаса кода лиятнень, а монь седиезе фалу уски шачема уженязон. Кизонда отпускозень най ётафнеса велеса. Саян и бта шабакс пингозон мртцян. Ужяль, мес юмси-арси веленьке, тячи Заряса лядсь аньцек ветешка куд.
—Спасиба, Людмила Александровна, мес муть пинге корхнемс. Сатфкст тейть работаса и эряфса!
О.ЕВДОКИМОВА.