Седиец палсь сембонкса

…Мольсь 1929 кизось. Велень ульцятнень эзга порашась лов. Стане, кода уленди февралень шитнень. Учсевсь тундась, мзярда аф аньцек Сёзелка ляйсь арсесь лама веденнекс, но и Лейал ёмла ляйнясь шумнась-увнась ичкози кулевиста.
Варьхмотькшнесь. Ежовка велень эряйть Филипп Мажоровонь цёрац Алексей, кона ётась Гражданскяй войнать толонц пачк, урядазе кудонц перьфста ловть, тиезень кудберьфонь лия тефнень, шукадезе валенцянзон лангста ловть, сувась кудонголи, а сяльде—куду, коса пеки рьвац Мария пянакудть маласа аноклась завтрак. Ёмла стирнясна Иришка нинге удось. Мария каясь лакай ведь кизонда аноклаф пчкафты тишетнень лангс, конатнень велень эряйхне тевс нолязь чайть вастс. Кудботмоть пяшкодезь чайтишень, карубрянь, мятань шинетне.
Завтракта меле Мария тошкась кельгома мирденц пилес: «Леша, улема, курок шачфтан. Маряса тянь…» Алексей мезевок ашезь аза и ашкордазе рьванц.
25-26 февральста веть тостонь повитухась примазе Мажорофнень семьяста нинге фкя идть. Кудботмоть пяшкодезе аньцек шачф цёранять вайгялец. «Цёра шачсь, цёра!»—кеняртькшнесь Алексей Филиппович родонь поладыть эвондаманцты. Макссть теенза Дмитрий лем. Веленнекс Митя.
Нюрьхкяняста сонцень кудазорть Алексей Филиппович Мажоровонь колга
Шачсь и кассь Ежовка велеса. Серес аф пяк оцю, кеме ронга, шамапутксс коре мазы. Сетьме, лиятнень мархта машты марстонь кялень мума. Мзярда эрявксты, кемоста ащи видешить инкса. Кода ни азфоль, ётазе Гражданскяй войнать. Од властть инкса ламоц тюремада меле, мрдась родной вели. Но аф лама пингта меле оружия мархта тюрсь белофиттнень каршес, а сяльде эряфонь апак ужяльтть—немецко-фашистскяй захватчикнень каршес. Шудефтезе аф кржа веронц (сисемксть ранендафоль, арась инвалидкс). Оцю подвигонзон инкса мокшалясь А.Ф.Мажоров аф весть казьфоль военнай казнеса.
Войнада мельдень кизотнень, аф ваномок лафчемф шумбрашинц лангс, Отечествать аралаец старандась  улемс эрявиксокс аф аньцек эсь семьянцты, но и Родинати. Кирдсь мешт, кевордсь валенцят велень эряйхненди. Рьванц Мария Семеновнань мархта шачфтсть и касфтсть ниле итть—Иринать, Дмитриень, Федоронь и Владимиронь, а стане жа касфтозь-кеподезь уроз стирнять Татьянать. Сембонь водендазь виде кис. А Дмитрий цёрасна арась прянь шнама вастокс. Шабакскивок сон прафтсь тонафнемати. Аньцек «ветес» шумордазе сисем кизонь школать.
Содамошитненди венеми, ламоть лангс мялень шарфни цёранять эряфонь киц вятезе шабрань Троицк рузонь вели, конанди родной Ежовкаста ульсь сисем вайгяльбет. Тоса иттне получсесть средняй образования. И тясовок шумордазе тонафнемать вете оценкас.
1946 кизоня Дмитрий Мажоров поступась Краснослободскяй велень хозяйствань техникуму. И тонафнесь тоса колма кизот. «Якстерь» дипломсь кядьсонза ни. Но аф эстокиге удалась техникумса получаф содамошитнень тевс нолдамс практикаса. Од специалистть учендозе армиясь. Сявозь служама сонь Читинскяй области связень войскатненди. Казьфоль «Отличник Советской Армии» знакса и получась старшай сержантонь воинскяй и I классонь специалистонь лем.
Мрдамок куду, Дмитрий Мажоров поладозе тонафнеманц Саранскяйса. Тяса получаф содамошитнень практикаса тевс нолязень Ковылкинскяй райононь «Парапинский» совхозса, коса работась колма кизот. Од специалистсь нинге ульсь хозяйствань парторганизациянь секретарькс. Парапино велеса Дмитрий Алексеевич васьфтезе сай пингонь рьванц—Анна Даниловнань, конань мархта шачфтсть и касфтсть кота итть.
Но семьянь кой-кодама туфталонкса (алянц-инвалидть аф весть эняльтькшнеманц инкса) Дмитрий Алексеевич Мажоровонди савсь мрдамс Ежовка родной велезонза. Васенда работась колхозонь бригадиркс, меле сонь кочказь Ежовскяй велень Советонь председателькс. Тяда башка, Д.А.Мажоров руководителель тостонь партийнай организацияти. Нинге вятсь химиянь урокт Ежовскяй средняй школань оцю класснень эса (ашесть сатне педагокне).
Кода и марнек республикаса, стака пинкт эста кирдсть и Ежкяряйхне. Колхозонь труженикне апак лотксек трудендасть паксятнень лангса и ферматнень эса. Тянкса получсесть аф кодама зарплата. И сембе сяка велень эряфсь лаказь-лакась, ломаттне строясть, шачфнесть и касфнесть шабат. А лама идень семьяда эста пяк ламоль.
Дмитрий Алексеевич тиендезе семботь, штоба цебярьгофтомс ёмла родинасонза эряфть.
Азсаськ, што сонь пингстонза, сонь вельденза строяфтольхть школать, велень Советть зданиясна (мекольцесь ульсь библиотека и почтань отделения мархта), клуб. Путфоль обелиск велень эряйхненди-воиттненди, конат шавовсть 1941-1945 кизотнень Великай Отечественнай войнаса. Тяда башка, эвондась тяса лавка, медпункт.
Д.А.Мажоровонди ломаттне мольсть эсь эняльдемаснон мархта, советонь анама. Дмитрий Алексеевич работась отпускфтома. Сёронь видемать и урожайть урядаманц пингста «Гигант» колхозонь бригадирхнень В.Е.Лазаревонь и П.Н.Битейкинонь мархта шинек-венек ульсь хозяйствань паксятнень лангса.
Велень ламоц эряйхне нинге мяляфтсазь, конашкава стака ульсь Ежовкаста пачкотькшнемс Троицк велеть пачк ётни шоссейкати. Кизонда нинге кода аф кода. А вов сёксень пизепнень и тялонь бураттнень пингста сяшкава стака теест сашендовсь, хуш кулок. Ежовкань велень Советонь председательсь аф весть пшкятькшнесь оцюнятненди тяфтама эняльдема мархта: строямс асфальтонь ки. Хуш и удалась ушедомс кить строяманц, но тя объектсь арась ламос строявиксокс. Тевсь одукс ушетфоль Д.А.Мажоровонь эряфста тумдонза инголе.
…Дмитрий Алексеевич Мажоров тусь эряфста 1983 кизонь 18 ноябрьста, калмаф алянц, ветеранть-фронтовикть Алексей Филипповичень ваксс Ежкань калмотненди, конатненди перяфксть мзярда-бди тифтезе эсь ярмаконзон лангс.
Тяфтамоль эряфонь киц тя валда, оцю букваста Ломанть, ёмла родинать патриотонц.
В.ЛАЗАРЕВ.