Поиск по сайту: 
 

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Наши мокшанские сыновья и дочери

ФАШИСТТНЕНЬ ПЛЕНЦТА—ФАШИСТТНЕНЬ САМОЛЁТСА

Сонь подвигонц колга сёрматкшнеф и кармай сёрматкшневома нинге и нинге. Сяс мес историясь тяфтама подвиг аф содай и кати кармай содама, кати аф. Сяда пара, кда войнань сюнеда оду тяфта афоль уле мзярдовок.

 

Великай Победать 75 кизонц карша, лувиеньконь эняльдемаснон коряс, минь эсь газетасонк макстама несколька статья М.П.Девятаевонь колга, конатнень сёрмадозь мокшень содаф журналисттне и писательхне.

 

А тячи ушетксонди нинге весть нюрьхкяняста лятфтатама легендарнай лётчикть фронтовой и эряфонь кинзон-янонзон колга, сянь, мезе азсть сонь подвигонц квалма странасонк кой-кона содаф ломаттне.

 

М.П.Девятаев шачсь 1917 кизонь 8 июльста Мордовскяй АССР-нь Торбеева поселкаса крестьянонь оцю семьяса. Мокшень цёрась Михаил Девятаев, кона шабакскивок ёрась улемс лётчикокс, Великай Отечественнай войнань карша лац аделазе Оренбургскяй военнай авиационнай училищать и арась лётчикокс-истребителькс.

 

1941 кизонь 22 июнень толу шобдаваня сон, марса эскадрильяс коре ялганзон мархта, лиссь тюрема немецко-фашистскяй захватчикнень каршес. Могилёвть маласа менельса вишке бойса сон васенцеда лац няфтезе прянц. Истребительнай полксь, коса служась лётчиксь-мокшесь, тюрсь фашисттнень каршес эсь прянь аф ужяльдезь целай ков. Советскяй летчикне ветексть-котоксть кепсесть менели, тапамок врагть эса. Эздост инь цебярьхненди, тяконь лувксса и Михаил Девятаевонди, торжественнайста макссть Кремляса Якстерь Знамянь орден.

 

Москуть араламац, вишке бойхне Тулать маласа, Украинаса, госпитальхне, тага од бойхне Ржевть и Воронежть, Кишиневть и Львовть маласа—тяфтамот М.П.Девятаевонь аф тёждя фронтовой кинза-янонза. Лётчикть мяштенц мазоптозь Ленинонь орденоц, Якстерь Знамянь кафта ордеттне, Отечественнай войнань 1-це и 2-це степенень ордеттне, медальхне. Тя пингста сон сяда кафксогемоньда ламоксть кепсесь самолётса бойс менельти, прафтсь вражескяй 9 самолетт.

 

1944 кизонь июльста фкя бойть пингста М.П.Девятаевонь самолётоц прафтфоль. Летчиксь сась ёжес пленца. Ушедсть аф азовомшка стакатне-сталмотне. Аф лама пингта войнать аделавомда инголе М.П.Девятаев повсь, можна мярьгомс, аду—островса ащи концлагерьс, конань модать эзда явфнезе Балтийскяй морянь кели заливсь. 1945 кизонь 8 февральста М.П.Девятаев и нинге несколька ломань шавозь конвоирть и сявозь вражескяй самолетть. Штурвалть ваксс озась Девятаев. Курокста ётамок фронтонь линиять вельхкска, самолетсь валгсь эсь масторозонк.

 

Родинась оцю оценка макссь пелемань аф содай советскяй патриоттнень подвигснонды. Немецко-фашисткяй захватчикнень каршес тюремста няфтьф мужествать, аф пелемать и героизмать инкса старшай лейтенантти М.П.Девятаевонди СССР-нь Верховнай Советть Президиумонц 1957 кизонь 15 августонь Указонц коряс, максфоль Советскяй Союзонь Героень лем, а лядыксне, конат ворьгодсть мархтонза, получасть ордетт и медальхть. Мзярда аделавсь войнась, Михаил Петрович мрдась куду и кярьмодсь мирнай трудти.

 

Колмогемоньда лама киза пара сатфксонь сатнезь работась Казанень речной портса «Ракетань» и «Метеоронь» капитанкс, странаса фкя инь васенцекс тонадомок ведь алдонь паця мархта скоростной теплоходонь вятнема.

 

Пенсияса улемстонза ни М.П.Девятаев мольфтсь од ломаттнень героико-патриотическяй воспитанияснон коряс оцю работа. Мекольдень шинзон самс войнань геройсь кирдсь кеме соткст Мордовиять мархта, сидеста сашендсь Саранскяи, родной Торбеева посёлказонза, коса панчф сонь лемсонза Кудсь-музейсь.

 

М.П.Девятаев сёрмадозе «Побег из ада» книгать, кона аф весть нолявсь Саранскяйса, Казаньца и омба масторса.

 

Республикать и Отечествать инголе оцюдонга оцю заслуганзон инкса Мордовия Республикань Оцюнять 1997 кизонь 10 январень Указонц коряс, теенза максф «Мордовия Республикань Почетнай гражданин» лем.
 

 

Содаф ломаттне

 

корхтайхть

 

 

А.Покрышкин,

 

Советскяй Союзонь колмоксть герой, авиациянь маршал:

 

—Войнаса боевой эряфть обстоятельстванзон вельде можна повомс пленц, но аф арамс пленникокс. Афкуксонь патриотти пленць—тя Родинать воляшинц инкса тюремста аньцек эпизод.

 

Михаил Девятаев тянь няфтезе эсь героическяй подвигонц мархта.

 

О.Антонов,

 

Социалистическяй Трудонь Герой, Генеральнай конструктор:

 

—Мзярда мон корхтан мужествать и инициативать колга, эрь мезне лятфнеса земляконьконь М.П.Девятаевонь подвигонц. Теенза савсь работамс стакадонга стака обстановкаса, улемок пленца, работакшнесь гитлеровскяй ракетнай базаса (тя базаса работатнень пяшкодемда меле военнопленнайхне ляцендевсть). Сон эсь ялганзон мархта маштсь немецкяй аэродромста фатямс «Хенкель-111» немецкяй самолетть и ворьгодемс фашистскяй пленцта. Тя героическяй подвигса няфтьф сембось: Родинати кельгомась, аф пелемась, ёнюшись.

 

С.Ахромеев,

 

Советскяй Союзонь Маршал, СССР-нь Вооруженнай Виень Генеральнай штабть начальникоц—СССР-нь оборонань министрть васенце заместителец:

 

—Михаил Девятаев пяк кельгозе авиациять, лац содазе эсь тевонц. Повомок пленц, сон ашезе юмафне Отечествати верондаманц, няфтемок афкуксонь смелши, сатозе эсь целенц—ворьгодсь пленцта немецкяй самолётса.

 

Войнань кизотнень Девятаев крьвястсь вейхкса вражескяй самолётт—вейхксоцекс лувондса «Хенкель-111», кожфу кепсесь 180-ксть. Сонь пленцта ворьгодемац—мужествань, мастерствань и Родинати кельгомань подвиг.

 

Девятаевонь и сонь ялганзон подвигсна—афкуксонь пример од ломаттненди, тяниень пингонь поколенияти.

 

А.Беляков,

 

Советскяй Союзонь Герой, авиациянь генерал-лейтенант, профессор:

 

—1945 кизонь февральста фашистскяй самолетть-бомбардировщикть саламац и пленцта мархтонза ворьгодемась—советскяй ломаттнень фкя инь оцю подвигсна Родинать араламаса.

 

Лётчикть М.П.Девятаевонь стака условияса лиемац (лафча шумбрашись, аф содаф самолетса лиемась, погодань кальдяв условиятне) корхтайхть аф аньцек сонь мужестванц и отваганц колга, но и советскяй лётчикнень оцю мастерстваснон квалма.

 

 

 


05.03.2020 №8
 
 
 

 
НОВОСТИ

ПЕРЯМС КИТЬ КОРОНАВИРУСНАЙ ИНФЕКЦИЯТИ

20.03.2020
 
 

МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020
 

МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020  № 10
 
 
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин