Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

КОРОДОЗЬ ВАНФТСАСЬК РОДНОЙ КЯЛЬТИ И ЛИТЕРАТУРАТИ КЕЛЬГОМАНЬ ТОЛНЯТЬ

Сембода мялень салай секциясь, кода фалу, ульсь творческяйсь, коса иттне няфтезь эсь асушиснон родной кяльса стихонь, азксонь сёрмадомаса. Иттне щафтольхть-каряфтольхть национальнай мазы щамса, азондсть эсь колгаст, лувозь стихснон и азксснон, няфтсть презентацият. Жюриса ульсть «Якстерь тяштеня» и «Чилисема» идень журналхнень главнай редакторсна, а стане жа «Мокша» и «Сятко» изданиятнень эса покоди писательхне и поэттне.

 

Олимпиадаса участникненди, кода иттненди, стане и мархтост саф тонафтыхненди аноклафоль мялень салай программа. Кепотьксонди, учительхнень лемс ётафтфоль «Современные образовательные технологии обучения языку и литературе мордовского народа» научно-практическяй семинар и лия мероприятият. Стане жа участникне ульсть экскурсияса поэтть и публицистть Н.П.Огарёвонь музейсонза и университетть смотровой площадкасонза. Олимпиадань сяськихнень лемсна кармайхть содафт 16 апрельста, Мокшень и эрзянь кялень Всероссийскяй шиста.

 

Сяда тов нюрьхкяняста азонттама олимпиадань кой-кона участникнень колга.

 

Мазы национальнай щамса Саранскяи састь мокшень кяльть и мокшэрзянь литературать коряс содамошиснон няфтема Старошайговскяй райононь Сире Теризморга велень школань тонафнихне.

 

11-це классонь тонафнись Диана Сумина нинге начальнай класса ушедсь стихонь, нюрьхкяня азксонь сёрмадома. Валонзон коряс, щавац, Валентина Степановна, содай лама мокшень ёфкс. Кулхцонкшнемок синь, стирнясь сонць кярьмотькшни коряваст стихонь сёрмадома. Тяда башка, Дианать улихть стихонза войнать, мазы перьфпяльть, мала ломанензон колга. Мокшень кяльса и литератураса содамошинь пуроптомаса-кочкамаса лездсь теенза тонафтыец Светлана Александровна Видясова.

 

Сире Теризморгаса работай Национальнай культурань центра, коза стирнясь якай «Народная вышивка» кружокс. Тоса шабатнень тонафнесазь национальнай щамонь стама, сюреса панаронь сёрмадома.

 

Школада меле Дианать мялец тонафнемс вузса и арамс учителькс.

 

Сяда тов шарфттама мяль эсь азондомасонк 9-це классонь тонафнить Иван Волгаповонь лангс. Цёранясь сёрматкшни мокшень кяльса стихт, пьесат, статьят. Сёрматфонза печатлакшневсть «Якстерь тяштеня» идень журналса, «Трудовая правда» районнай газетаса. Инь удалаф стихонза—«Суронь пачат», «Сире щавазе», «Мокшень кяль», «Школаса». Иван оцю  мяльса примси участия школьнай спектакльхнень эса, кельгсыне рахафты рольхнень. Стане жа мяленц салсесы спортсь. Иванонь валонзон коряс, оцю кенярдемакс школаса тонафнихненди арась велесост эень площадкать панжемац. Тяни од ломаттненди ули коса налхксемс хоккейса, курькснемс конькаса.

 

Сире Теризморгаста Виктория Виляйкина пялькстомаса стане жа няфтезе стихонь сёрмадомаса маштомошинц. 5-це класста сявомок сон якай «Литературное творчество» кружокс, конань вятьсы Любовь Александровна Сокоровась. Инь удалаф стихонза—«Мокшаваня», «Тундась», «Од киза мархта!». Стирнясь кельгсы эсь родной кяленц. Сонь салсесазь мяленц мокшень сире валхне, койхне, моротне. «Литературное краеведение» кружоконь вятить Нина Николаевна Черновать мархта Национальнай культурань центрать архивстонза синь кочксихть лингво-краеведческяй материалхт. Тяда башка, Виктория морси «Лаймоня» фольклорнай идень ансамбльса. Стирнять мялец арамс журналистокс.

 

Сяда тов азондоманьконь поладсаськ мокшень стирть Любовь Ляшинать колга. Олимпиадав сон сась Зубово-Полянскяй райононь Булдыга велеста. Люба тонафни 9-це класса. Эряви азомс, сембе участникнень ёткста Люба няевсь афкуксонь мокшень баяравакс. Улема, фкявок сельмованф ашезь ёта сонь ваксканза. Стирнясь тонафни аньцек «ветес», якай «Мокшень кяль» кружокс, коса иттне аф аньцек козякофнесазь кяльть коряс содамошиснон, но и тонафнихть сюреса сёрмадома, бисерса кодама, мокшень суронь пачань пидема. Любать валонзон коряс, Булдыгань школаса фкявок мероприятия аф ётни танцти пачафтома, мокшень позафтома.

 

Люба машты морама, сценкаса налхкома. Мяленц салсесы книгань лувомась. Кельгома мокшень писателенза—Г.И.Пинясов и Н.Б.Голенков.

 

Стирнясь эсь мялензон-арьсеманзон сёрматкшнесыне кагод лангс. Олимпиадать творческяй секциясонза сон лувозе «Стака лятфнемат» азксонц, конань сёрмадозе щаванц алянц Никифор Платонович Панюшкинонь аф тёждя эряфонц колга. Школать аделамда меле Люба Ляшинать мялец тонафнемс врачекс.

 

Кадошкинскяй райононь Адаж велень школаса тонафнись Александр Шичинов тонафни    11-це класса. Примси участия школьникнень ёткса ётафневи эрь кодама конкурснень эса. Кепотьксонди, «Ученик года-2019», «Мисс и мистер района-2019», «Одаренные дети-2017» и лия пялькстоматнень эса. Олимпиадаса Александр няфтезень содамошинзон творческяй секцияса. А.Шичинов сёрматкшни стихт шачема масторть, кельгомать, мазы перьфпяльть колга. Цёранясь сувси «Надежда» волонтерскяй отряду, кона лезни эряфкшу ломаттненди, Великай Отечественнай войнань ветераттненди, тылонь труженикненди. Синь аруяфнесазь памятникнень перьфснон, примсихть участия «Георгиевская ленточка» общественнай акцияса и тиендихть лия пара тефт. Сай пингонь профессиянц Александр ёрай сотомс электроникать мархта. Сонь мялец эрямс Мордовияса и лездомс шачема веленцты.

 

                                                                                                                Т.ПЕТРОВА.

 

 


05.03.2020 №8
 
 
 

 
НОВОСТИ
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин