Поиск по сайту: 
 

Архив
 июль 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Юмор и сатира

КУЦЕМАТ

Красноярскяйста Лёшац нона кизотнень сашендсь вели васетькшнема. Тернезе тядянц эсь мархтонза: аде да аде. И тага бабась атказась. Ся Красноярскяйсь мянь кати-коса. Поездса ох-ох мзярс арнема. А самолётса пели лиемать. Вдь, кле, мянь туцятнень вельф ся лийфттянза. А кда бунтядят тоста?.. А сави ся Красноярскяйсост куломс-тиемс—шачема васту пакарьхненьге аф усксазь. И нинге... Тоса помидоратне аф касыхть. Кизоть лямбе пингоц нюрьхкяня. А Ягурясь пяк кельгсы переса капшсеманц. Сонь помидоранза велеса сембода удалафне эряйхть. И кда кептерь вятерьфти базару—ломаттне тюрезь-толхмиезь эцихть рамама. Аф эряви Ягуряти ся масторбесь.

 

Колмоце цёрац—Николай—сембода одсь. Аделазе медицинскяйть. Тяни врач. Аф кунара рьвяясь. Иднясна шачсь. Сери кудса квартира теест макссть. Николай маласа—Саранскяйса. Сонга терди пялонза эряма, шабань ваннема.

 

И Ягурясь срхкась Николаенди. Пяшкодезе кептеренц велень гостинецта и—станцияв. Электричкась пачфтезе ошу. Тяса бабась озась троллейбусс. Вдь корхнихть: кяльсь Киеву пачфттянза. Ягурятьке кялец аф цинзерса сотнеф. Пялес рузкс, пялес мокшекс кизефнесыне ломаттнень, кода мума ся-ся ульцясь, ся-ся кудсь. И кудть, коса эряй Коля цёрац, музе.

 

—Фкя, кафта, колма...—ушедсь бабась эташнень лувома,—сисем, кафкса, вейхкса...

 

Цёрац эряй сизьгемонце квартираса. Бабась сувась кептерень кандозь подъездонь кенкшка. Инголенза стясь эсь лацонза коськана, копорьготф бабаня.

 

—Шумбрат, баба ялгай,—пшкядсь Ягурясь мокшекс.

 

—Тонцькак шумбрат!—отвечась тонац эрзякс.—Косто истя сыть, мокшонь баба?

 

—Велеста. Цёразе тя кудса эряй. Сизьгемонце квартираса.

 

—А-а!—акстсь эрзянь бабась.—Верев куцема. Лифт ули, ды а роботы. Арась электрикесь.

 

Ягурясь ровнай киге хуш комсь вайгяльбе аськоляй—аф сизи, но, кда сави куцемс пандоняс—ваймоц пий, аф тяльги мяштезонза. А тяса цёрац, Николай, эряй мянь вейхксоце этажса—панда пряса. Но цёрац тяшнесь сёрмаса и тяфтаконга азонкшнезе: кудсост вярце эташненди ломаттнень куцьфнесыне лифтсь. Суват кабинав, люпштат кнопканя, вжж-жик—и тосат.

 

—А тон тястоконнят?—кизефтезе Ягурясь эрзянь бабать.

 

—Арась. Мон Ицялсто сынь. Тесэ эри тейтерькам. Ну и роботан тесэ лифтёршакс.

 

—Тон лифтёршат?—кенярдсь Ягурясь.—Эста лезтт ни монь вяри куцьфтемс.

 

—Мерян ведь—лифтось а роботы. Свет арась. Азё ялго.

 

Мезе тият? Сави ялга куцемс... гостинецта пяшксе кептеренц мархта. А кептерец аф тёждяня. Тоса и марень пярякат, и атёкш, и панденяста аньцек сязьф куярнят-месть. Ягурясь тусь куцеманятнень шири.

 

—Фкя, кафта, колма,—куцембачк ушедсь куцеманятнень лувондома. Синь кевоннет, крутат. Тескафтондярят—срадат пяльксонь пялькскя.—Кемготува, кемзисемге, кемгафксува...

 

Шаркс, тага шаркс. Ягурясь ваймонь стакаста тарксезь лонтядсь ступенька лангс. Ваймясь тись—тага кис.

 

—Сизьгемонь... сизьгемонь котува...

 

Пись бабать ваймоц. Шаракодсь пряц. Маштсть ёженза. Прась кядьстонза кептерец.

 

Мзярда Ягурясь панжезень сельмонзон, няезе: вельхкссонза акша поталак. Сонць акша вельхкс ала. Перьфканза акша щамса ломатть. Фкясь эздост пшкядсь:

 

—Тядяй!

 

Вай, тя вдь Коляц!

 

Больницяса Ягурять пчкафтозь. Тяни сон тага велеса. Помидорат касфни. Базару якай. Но оду ни ошу аф васькафтови кодамовок калацяса.

 

                                                                                             Михаил МОИСЕЕВ.

 

 


05.03.2020 №8
 
 
 

 
НОВОСТИ
 
 
 
 
 
 
 
 
 

ЭРЯВИ ЭРЯСКОДОМС

Кельгома ялгат! Тага весть лятфтасаськ: стаки моли 2020 кизоть омбоце пяленцты минь тинь мархтонт «Мокшень правданьконди» сёрматфтомась. Кода няеви подпискань даннайхнень эзда, ламоц мокшетне нинге ашесть тяштьфте родной кяльса лисенди газета. Сембода кальдявста тянь пяльде ащи тевсь Торбеевскяй, Темниковскяй, Ельниковскяй, Зубово-Полянскяй райоттнень эса и Саранскяйса. А тя корхтай сянь колга, што тястонь ламоц эряйхне могут лядомс мокшень газетафтома. Тя пичефти и таколфты. Сяс эряви эряскодомс. Аф лама пинге нинге ули.

 

 
«Мокшень правда» можна сёрматфтомс и интернетть вельде. Тянкса эряви сувамс «Почта России» сайтти тяфтама адресс коре: PODPISKA POCНТA.RU. Сяльде кочкама «Мокшень правда» газетать лемоц. Тяда меле тиема инструкциять коряс.

 

Пяле кизонди сёрматфтомать питнец 340 цалковай, колма ковонди—170 цалковай. Газетать индексоц П4719. Эрьда ульхтяма марса!

 

25.05.2020
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин