Тяштьфтеда мокшень газета 2020 кизоть омбоце пяленцты

1 апрельста ушедсь од подписной кампаниясь
Кельгома ялгат! Российскяй Федерацияса ноляви пяк лама разнай периодическяй изданияда. Но тейнек, мокшетненди, сембода  малакс и кельговикс ащи «Мокшень правда» газетась. Сон тяконясь-фкянясь марнек масторлангса. Лия газета мокшень кяльса косовок аф лисенди.
Сай кизоть минь тинь мархтонт «Мокшень правданьконди» топоди 100 киза. Вов пцтай тняра киза сон седикс-ваймокс служай эсь народоньконди, эсь республиканьконди.
 «Мокшень правдась» фалу ульсь и  кармай улема пшкядема-нажядема вастокс сембе мокшетненди. Минь, мокшень журналисттне, старандатама, штоба газетась лездоль мокшень ломаттненди сяда лац шарьхкодемс тяниень общественнай тефнень, сянь, мезе тяряфневи странасонк тиемс, лездомс кажнайти мумс эсь вастонц эряфса. Тяряфнетяма улемс сяда малакс ломанти, сонь тевонзонды и заботанзонды, корхтамс мархтонза седикс-ваймокс.
Аноклавихть материалхт мокшень содаф ломаттнень колга, конат ащихть тейнек прянь шнама вастокс, конатнень инкса марятама гордость. Кепотьксонди, тяни башка оцю мяль шарфневи Великай  Отечественнай войнаса Великай Победать 75 кизонь топодеманцты анокламати. И, шарьхкотьф, газетасонк келиста азондови ся геройхнень колга, конат аралазь Отечестваньконь фашисттнень эзда.
Оцю васта стане жа максови газетать лопанянзон лангса историянь, культурань, образованиянь, спортонь и лия кизефксненди.
Стаки кармайхть макссевома пара советт народнай средстваса эсь прянь пчкафтыхненди, переса и садса касыксонь мельге якайхненди, печатлатама  анекдотт. Эрь номерста мутада юморонь и сатирань уженя.
Катк «Мокшень правдась» кармай сувсема мокшень эрь кудти, мокшень эрь семьяти, каннема пара кулят. Эрьда ульхтяма марса тяниень аф тёждя пингть. Мяляфтость, кельгома ялгат, мокшень газетась минценне, тейнек марса колганза и заботендама. Сон лезды тейнек ванфтомс и виияфнемс родной кяленьконь, культураньконь, коеньконь-иланьконь.
Панттада аньцек 340 цалковай и пяле киза карматада получсема родной кяльса лисенди интереснай и аф питни газета. Колма ковонди сёрматфтомать питнец 170 цалковай. Сон кельгови сембонди, кие сёрматфнесы и лувондсы.
Газетать индексоц П4719.