Поиск по сайту: 
 

Архив
 сентябрь 
 2020 
пн вт ср чт пт сб вс
 123456
78910111213
14151617181920
21222324252627
282930    

 
 

 

Наши мокшанские сыновья и дочери

Лемоц лядсь валда тяштекс

Захар Фёдорович Дорофеевонь—мокшэрзянь письменнай художественнай литературать ушедыенц, содаф педагогть-просветительть, общественнай деятельть шачема шистонза 130 кизонь топодеманцты
З.Ф.Дорофеев шачсь 1890 кизонь 24 мартста Торбеевскяй райононь Салазгорь мокшень велеса, крестьянонь-середняконь оцю семьяса, коса кемоста ванфтовсть религиознай духовностень правилатне, мокшэрзянь койхне-обуцятне.
Захар Фёдоровичень аляц—Фёдор Михайлович, аф пяк грамотнаель, но шарьхкотькшнезе, што иденза эрявихть тонафтомс лувомати, сёрмадомати. Ся пингста Салазгорьса ульсть кафта школат: церковно-приходской и земской. Дорофе-евонь алянц оцюволь мялец, штоба шабанза тонафневольхть земской школаса. Мзярда Захаронди топодсь кафкса кизот, сонь прважазь тов. Тонафнесь лац. Аф стак сяльде максозь тонафнема Виндрейскяй кафта классонь церковно-приходской школав. Тонафнесь казеннай ярмак лангс. Тяса и эвондась литературати и поэзияти кельгомац. Тияк эряви азомс,  Захаронь поэтическяй асувонц виияфтоманцты лама лездсь сонь  тядяц, Екатерина Яковлевна, кона содась лама народнай морода, легендада, преданияда.
Училищать аделамдонза меле, учительхнень мярьгомаснон коряс, Захар Дорофеевонь прважазь Казани. Аляц согласиндась нолдамс цёранц тостонь иногородческяй учительскяй семинарияв. Мокшень цёрати тов поступамс лездсь мокшэрзянь содаф учёнайсь, просветительсь и педагогсь М.Е.Евсевьев.
Нинге семинарияса тонафнемста ушедсь стихонь тяштема. Тонафнеманц шумордамдонза меле кучеви работама Темниковскяй райононь (эста Тамбовскяй губерниянь Темниковскяй уездонь) Паксянь Ордаж мокшень вели. Сяка кизоня (1912) Москуса лиссь сонь стихонь васенце сборникоц «Песни и думы народного учителя». Тяка пингть тонафнесы мордовскяй народть историянц, мольфти этно-графическяй исследованият. Октябрьскяй революцияда меле работай народнай образованиянь оргаттнень эса, лама тиенди велетнень эса школань панчфтеманкса. Сонь руководстванц ала  миньцонк панжевсть сядот школа оцю и ёмла велетнень эса. Васендакиге мокшень и эрзянь велева.
З.Ф.Дорофеев тяштсь рузонь и мокшень кяльса кафта сядода лама стихотворения, комозть малава—прозаса произведеният и кафксогемоньда лама стихотворения, конатнень ётафтозень рузонь кяльс и меколанкт. Сембе литературнай деятельностенц Захар Фёдорович лемдезе видешить и народть павазонц инкса тюремати. Сонь творчествац фалу сотфоль эряфть мархта.
1919-1925 кизотнень работась Темниковскяй уездонь народнай образованиянь отделонь заведующайкс. Нинге 1918 кизоня Тамбовскяй губерниять эзда делегациять ёткса примась участия учителень васенце Всероссийскяй съездса.
1925 кизоня лиссь З.Ф.Дорофеевонь «Валда ян» мокшень васенце букварец. Кода педагог-просветитель, сон аноклазень «Пиже пакся», «Од веле», «Якстерь Тяште», «СССР-сь» и лия учебникнень. Сембоц сон аноклась 14 учебник, конатнень марстонь объемсна 150-шка малава печатнай лист и нолдафтольхть 170 тёжянь экземплярса. Захар Фёдоровичень книганзон коряс начальнай и сисем классонь образования получасть аф фкя поколения мокшэрзянь цёраня и стирня.
1925 кизоня З.Ф.Дорофеевонь кочказь РКП(б)-нь ЦК-нь мокшэрзянь секциянь ответственнай секретарькс. Кода Мокшэрзянь секциянь секретарь, сон участвовандась мокшэрзянь автономиять пуроптоманц коряс проектть анокламаса. МАССР-нь Советонь васенце съездса З.Ф.Дорофеев кочкафоль МАССР-нь   ЦИК-ть составс.
З.Ф.Дорофеев кельгозе эсь народонц, сонь культуранц. Сон старандась кочкамс семботь, мезсь ванфтови мокшетнень народнай творчестваса, культураса, иласа и щамса-карямса. Ня козя материалхнень кочказень и ёрась нолдамс нинге народонц историянц и культуранц колга. Но тя трудонц педа-пес аделамс ашезь кенере.
1941 кизоня ушедсь Великай Отечественнай войнась. Дорофеев эсь воля тусь фронту. Ульсь народнай ополченияса. Тяка кизонь сёксенда Смоленскяйть ала стакаста урмаськодсь. Лятфтасть эсь колгаст кунардонь рананза, да и кизодонзовок ламоль. Мрдась куду стакаста сярядезь. Аф ваномок стака урмать лангс, З.Ф.Дорофеев куломозонза лядондсь эряфонь кельги ломанькс. Ванць школаса тефнень, мордовскяй народть культуранц мельге. Сон верондась, урмась потай эздонза и мокшетненди мокшетнень колга сёрмады нинге аф кржа. Но надияманза шавотольхть. 1952 кизоня Захар Фёдорович Дорофеев кулось. Тусь эряфста пяк цебярь мокшень поэтсь, педагогсь-просветительсь и общественнай деятельсь, кона сембе эряфонц лемдезе мокшэрзянь народти, седикс-ваймокс служась теенза.
 

02.04.2020 №12
 
 
 

 
НОВОСТИ

КАСОМАНЬ И ВИИЯМАНЬ КИГЕ

25.09.2020
 
 
 
 

ТЯЧИ—МИНЬ ШАЧЕМА ШИНЬКЕ!

24.09.2020  № 37
 
 
 
 

ТЯФТАМА ВАСЬФНЕМАТНЕ ЭЖНЕСАЗЬ ВАЙМОТЬ

Ётась «Волга–река мира» Международнай этнокультурнай XIX-це фестивальсь-экспедициясь

 

 

Арась эсь лацонь койкс эрь кизоня етафнемс Поволжьянь ошнень эзга «Волга–река мира. Диалог культур волжских народов»  этнокультурнай фестивальть-экспедициять. Тядде международнай тя форумсь пуроптфоль кевейхксыецеда. Кода фалу сонь работасонза примасть участия региональнай властень, национально-культурнай общественнай организациянь представительхть, содаф ученайхть, артистт, писательхть, журналистт, конат сашендсть Россиянь 14 регионцта. Сембоц пуромкшнесь 80 ломань. Фестивальсь арась теест васедема, инь пичефтить-таколфтыть колга седикс-ваймокс корхнема вастокс. Ваномс кепотьфоль лама оржа кизефкс, конат, васендакиге, сотфтольхть национальнай культурать, кяльхнень ванфтомаснон мархта. Якстерь сюре кикс таргавсь фестивалень программать эса военнай тематикась, вдь тядде минь васьфтеськ Великай Победать 75 кизонц.

 

18.09.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин