УЛИ КИНЬ ЭЗДА СЯВОМС ПРИМЕР

Торбеевскяй райононь Краснополья велень эряйхнень Нина Николаевна и Юрий Николаевич Асташкиттнень семьясна ащи кепотьксокс сембе велети. 34 киза мирттне-рьвятне  эряйхть марса. И тя оцю пингста фкя-фкянди ашесть аза фкявок кальдяв вал. Кудсост азорондай кельгомась, фкя-фкянь шарьхкодемась.
Тя семьясь пуроптфоль Мокшень Ювняса. Стирсь и цёрась содасть фкя-фкянь идень садста сявомок.
—Тонафнеме кемонь кизот фкя школаса,—мярьгсь Нина Николаевна.—Ласькондеме фкя коридорга, якаме сяка илатненди. И вестевок мяльге прязон ашезь сашенда, што тя монь сай пингонь мирдезе, што карматама эряма фкя кудса, касфтома итть, унокт, кеняртькшнема синь сатфкс-снонды.
Колма шабат касфтсть Асташкиттне. Нина Николаевна и Юрий Николаевич теест сембоса ульсть цебярь примеркс. Азоравась сафнезе эсь тевсонза, а азорсь фалу кирнезе  рьванц, и меколанкт. Идьснонды макссть высшай образования, колмоцьке трудендайхть специальностьс коре. Надежда аделазе Н.П.Огарёвонь лемса Мордовскяй госуниверситетть, работай Москуса, ЖКХ-нь сфераса. Николай стане жа шумордазе МГУ-нь Медицинскяй институтть. Сон врач-реаниматолог Москуса Блохинонь лемса онкоцентраса. Рьвац, Наталья Викторовна, врач-гинеколог. Сон Дракина велеста. Синь кафта шабасна. Инь ёмла стирьсна, Светлана, аделазе Н.П.Огарёвонь лемса Мордовскяй госуниверситетонь иностраннай кялень факультетть. Работась Москуса. А ёфси аф кунара лиссь рьвакс и мирденц мархта ётасть эряма Краснодарскяй краи. Идьсна кельгсазь шачема-касома кудснон, сидеста сашендыхть. Аф кунара отмечазь аляснон шачема шинц. Юрий Николаевичень стихса и мороса поздравляндазь инь кельгома ломаненза.
Мезе афолеме корхта, сембе цебярь койхне-обуцятне молихть семьяста. Сонць Нина Николаевна шачсь и кассь Шукшиттнень оцю и трудонь кельги семьяса. Тядяц, Зинаида Ивановна, Салазгорьста, Коняшкиттнень родста-плямаста. 35 киза макссь Мокшень Ювнянь школати. Аляц, Николай Иванович, «Большевик» колхозонь почётнай колхозниколь. Ня шнама, трудонь кельги ломаттне касфтсть кота итть. Сембонди макссть цебярь образования.
Юрий Николаевич шачсь и кассь оцю семьяса, коса кемонь шабатольхть. Трудти кельгомась сась тядянь лофцть мархта.
Юрий Николаевич сембе эсь эряфонц лемдезе велень хозяйствати, покодсь Краснопольяса. Производствань передовик, ответственнай ломань. Нина Николаевна якстерь дипломса аделазе М.Е.Евсевьевонь лемса МГПИ-нь химико-биологическяй факультетть. Направленияс коре прважафоль работама Мокшень Ювнянь средняй общеобразовательнай школав. Налхксть свадьба. Эряма вастонди од семьясь кочказе Краснопольять. И вов ни 35 киза работай школаса. Кельгсазь сонь иттне. Оцю авторитетоц тонафты ялганзон ёткса. Максси лезкс тонафтомань и воспитандамань аф тёждя тевса оттненди. А учениконза сидеста занцихть васенце вастт химиять и биологиять коряс олимпиадатнень эса.
Тяни Асташкиттне эряйхть кафонест. Но ваймосемс аш мзярда. Синь оцю хозяйствасна, пересна. Куд путсть веле пети. Вастсь мазы. Перьфканза лама мода. Аньцек тят нолгада, трудендак. Эрь кизоня касфнихть перень сёронь оцю урожай. Тяфта и ётнихть фкя-фкянь мельге кизотне. Асташкиттне—павазу ломатть. Синь сембосна ули, мезеньге лангс аф пеняцяйхть. А инь оцю павазсна и козяшисна—тя колма идьсна и уноксна, конатнень синь пяк кельгсазь.
И.Вешкин.