Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

ВАЙМОЗЕНЬ АФ МАКССА

Рьвязе, Агапиясь, эрь шиня оржа валонзон мархта, кода пиланяса кргазень эса пилай:
—Эх, сире шайтан, грех поколь, вестенге церькаву аф молят, аф каендат. Мярьголеть церькавсь пяк ичкозе, сави молемс Атери или мянь Кацялаи. Тязк, Марфа бабань горенцяв пуромкшнихть, сонць отец Ануфрий святиндазе. Попське содаф ломань—Кушкань попть стирец—Лукериясь. Алянц сембе книганза теенза лядсть.
—Кодама тага грехт, Агапия, месть тон?—прянь нолдазь, пиле фталдонь ангорязь, аф макссян пря бабазти.
—Кодама грехт? Ваттаське, тага содайкска аф тиенди, визьксфтома шама кедь,—нинге сяда вишкста пешкоткшнесь и кеподезе модамарень тапаманц.
Мон потазня, потазня...
—Эка, сон аф содасы, кодама грехт! А Надять мархта путоть пилькт-прят? Путоть. Ольгинять мархта усксевоть? Усксевоть. Канорвять мархта пякснедязь утомозост? Пякснедязь...
И вишкомсь, и вишкомсь Агапия, кочксесь и кочксесь авань лепнень эса. Улема, попть марнек ава лемонь книганц морафтозе. Мон нюрьган, кашт аф молян, аньцек весть аф весть варжакснян модамарень тапаманц лангс. Аф лама пингс сетьмось, тапаманц путозе шрать лангс и кранцта пяшкодсь кельме ведь ведарка, путозе пильгонень ваксс и кяжда мярьгсь:
—На вага, архт листь садняв и лацкас эшеляк. Саят, максан акшет—и марш Марфа бабань пяли, азондыть грехнень Лукерияти. Кда хуш фкя сёпат—сяда оцю грехс суват и каендамацевок юмай.
—Ну тон вдь, Агапия, содасак, ёт мзярда ни ашель грехоньке,—ведь ведаркать лангс ванозь мярьгонь мон.
—А тон арьсят, ломатть ашедязь няе, кода Надю бабанди сувсеть? Няедязь, симдема-путома васта ломань, визьксце аф визневи.
—Да ся эста монь прязе сярядсь, прянь петемс стопканя анцень кядьстонза.
—А сон стак што ли венепти тейть стопканя? Кинь ёрат васькафнемс? Марш, мярьгонь штама!
Мезьге аф тият, савсь лисемс ведаркать мархта садняв. Лопафтыне галош прязень да сакалозень и шава ведаркаса мрдань меки куду.
—Мес-бди пяк курок?—ширептезе кургонц бабазе и кеподезе панарозень, капштазе пекозень—коське. Да эзк тага фатязе тапаманц, эсьморондась сакалозон:
—Лазса тикла пряцень нилева, аеркс!
Сельмоневок лисекшнесть. Сон тага пяшкодезе ведарканц и пешкодсь:
—Адека, монць эшелятя!
Лихтемань, кода сявать, сакалда. И коста сяшка вийсь! Кеподезе ведаркать прязень вельхксс и каязе лангозон. Мон, бта толса пидевонь, ёрань комотемс ласькозь, но аф комотят—сакалне коморсонзот. Станяк сакалда кудувонга сувафтомань.
—На, вага, полафтыть грехуфнень,—ёрдась инголен акша панархт-понкст.
Мон щань-карянь. Учан, мезе нинге указовай.
—Озонтт аф кода кудса, карувонь эвфнезь, а эряви вага кода,—и няфтезе. Тон приметак эсь лацот атя и ванк, кода сон озонды, стане озонтт тонга. Шарьхкодеть?
—Шарьхкодень,—куфкстозь мярьгонь,—и кудста лисень.
Марфа бабань кудоц пяшксель. Сембода ламотне—бабатольхть. Приметань, кода Агапиязе тонафтомань, фкя атя, аф ичкозе эздон. Сон озонды, монга ушедонь «грехонень эса пяярдема». Ся атясь озондсь, озондсь—сюконясь. Монга сюконянь. Ванан: сон арась плманжа лангс. Монга стане арань. Сон меки стясь. Монга стянь. Ванан, сон озонды эчке бабань фтала. Монга стама вешень, арань Кажаева бабань фталу.
Атясь тага кармась озондома. Монга. Сон тага комась, арась плманжа лангс. Монга. Атять пряс токась бабать сарафаноц. Монга шаштонь сяда малав бабать пильгонзонды. Да, сталботь, лама васта шаштовонь: прязе тонговсь бабать пильгонзон ёткс. Бабась эводсь, и лонть лангозон озась, а кие ункснезе сонь сталмонц?! Фталоц марнек ронгозень тавадозе. Ваксстонза бабатне шарфнесть, абондсть, месенди, кле, тяфта тя атякалафкссь?
И давай монь эсон тялямс. Кона клокса, кона кучкорьксса, сон, кле, антихристсь, аф озондома сась, а тарома. И хуш бабань пильге вийхне аф сяшкава кемот, но тейне сявок сатсь, самай грехонень коряват. И мон эсь пачкан корхнян: «Тялясть, тялясть сембе грехонень, кода Агапиязе мярьгсь, фкявок тяда када, тяда юкста». Сон, конешна, грехонень пялешкаснонга ашезень сода, нльне Терешкань Полятьке ашезе лятфне,—кати юкстазе, кати сянь колга мезьге ашезь куленде. А монць ушедонь лятфнемост, кочксемост.
Меколи ни тейне аф лад арась. Копорезе, казфоне, ирдезне сярядихть. Нльне сяда сярядихть сянь коряска, кода Канор сярятьфтезень утомсонза тялямстон, мзярда сатомань рьванц ваксста. Но эста нинге сяда одолень—кирдень. А тяни?.. Тяни тяфта тялязьге ваймоцень сявсазь. Но аф! Ваймозень потмостон аф нолдаса, аф максса! Кургозень кядьлапшса пандса. Кядезень пачк ваймозе аф лисеви.
Павел ТОРОПКИН.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022