КУДСНА ПЯШКСЕ ИДЕНЬ ВАЙГЯЛЬДА

Тяниень пингть цють ни аф сурса лувовихть ся семьятне, коса касфтови колма-ниле шаба. Сяда сидеста мирттне-рьвятне шачфнихть эстеест фкя идня, а сяда ламотнень трямасна, кле, пяк стака. Лиякс арьсихть полатне Адрахманофне, конатнень сисем шабадост. Аф кунара удалась корхнемс мирттнень-рьвятнень мархта телефононь пачк и содамс, кода эряй-ащи лама идень тя семьясь.
Андрей Владимирович и Полина Анатольевна кафцьке шачсть-кассть Саранскяйса. Эрясть шабрань кудса, но фкя-фкянь колга лама пинге мезевок ашесть сода. Васедсть оттне, мзярда аделазь школаснон. Лиссь тя идень лагерьса, коса сай пингонь полатне работасть вожатайкс. Удалаф и весяла стирсь эстокиге салазе Андреень мяленц. Васьфнесть синь пялешка киза, а меле рьвяясть.
—Мон инголенди содайне, што семьяньке кармай оцю,—азозе Андрей Владимирович.—Пяк кельгсайне иднятнень, сяс эрь кизоня ваймама пингста якань работама лагери вожатайкс.—Полинаське пара мяльса возсесь шабанятнень мархта.
2010 кизоня Адрахманофнень шачсь васенце иднясна—Павел. А кизонь ётазь—омбоцесь. Теенза тядятне-алятне макссть эсь лацонь лем—Добрыня. Цёранясь шачсь пингта инголе, сон пяк лафченяль, нльне врачневок ашесть надия, што атнайнясь ляды шиса. Сяс, мзярда шабать эряфонц инкса пелькссь потась, полатне састь мяльс максомс теенза богатырень лем. Тяни Добрыня тонафни омбоце класса и касомас-вииякшнемас коре мезьсовок аф лядонды  кизосонза ялганзон эзда.
Адрахманофнень колмоце  шабасна эвондась белай свету 2012 кизоня. Тя ульсь кунара учентф стирня—Елизавета. Меле шачсть Константин, Анна, Михаил, Анастасия. Тячи Адрахманофнень семьяса колма школьникт, синь якайхть васенце, омбоце и колмоце классненди. Костя, Анна и Миша якайхть идень саду. Сембода ёмланяти—Настяняти нинге аш кизонявок. Семьяса сон ащи няка вастс.
Школаса тонафнихне кеняртьфнесазь тядяснон-аляснон аф аньцек цебярь оценкаснон, но и эрь кодама тевса маштомошиснон мархта. Кепотьксонди, Павел, Добрыня и Лиза лац морайхть скрипкаса. Эсь маштомошиснон синь няфнесазь аф аньцек школаса ётафневи илатнень пингста, но и ошень эрь кодама мероприятиятнень эса. Музыкати кельгомась, улема, ётась теест тядяснон эзда. Полина Анатольевна ёт шабакс морси гитараса. Лагерьса работамстонза най кеняртьфнелезень вожатай ялганзон и иднятнень седиень токай мороса. Да и тянивок, кда эвондакшни ётка пингоц, сявондьсы кядезонза инструментть. Адрахманофнень ули кода лемдемс семейнай ансамблькс: кие гитараса морай, кие—скрипкаса, а кие, ванат, кургса мора таргай.
Павликсь, скрипкада башка,  оцю мяльса налхкси шахматса и тя сонь пяк лац лисенди. Сон ни аф весть примсесь участия шахматтнень коряс турнирса, конатнень пингста аф шуроста сяськондьсыне корязонза сяда оцю налхкихненьге.
Адрахманофне кельгсазь спортть. Эрь шобдавась тя семьяса ушеткшни зарядкаста, шабатне тиендихть отжиманият, турникть вельде кепсесазь ронгснон-пондснон. Шабатне нльне маштыхть якама кядьснон лангса. Тялонда семьянек курькснихть конькаса. А нинге Адрахманофне пяк кельгсазь ялга якамаснон. Эрь кизоня улендихть ваймосемань базаса.
Тяниень пингть, кода и сембе, семьясь ащекшни кудса. Тевфтома ульцяв аф лисендихть, лавкав якай аньцек семьянь азорсь. Шабатне лама пинге макссихть тонафнемати, кона  вятеви дистанционнайста. Фкясь аньцек пичефти: компьютероц семьять фкя, а школьникта колма. Сашендови тонафнемс фкять мельге омбоцети.
Тяни, кудса ащемста, Адрахманофненди удалси сяда лама пинге ётафнемс марса. Налхксихть шра лангонь налхксемаса, занцихть пря творчестваса. А вов кудазоравати, Полина Анатольевнанди, мзярда марнек семьясь кудса, сашендови сяда лама пинге ётафнемс плитать ваксса. Но тя мяленц аф колсесы, вдь сонь улихть лездыенза. Оцю шабатне, школаса тонафнихне, кда эрявксты, и модамарьхть ваткайхть, и кядьгонят штайхть. Вийс коре лезнихть ёмлатневок: латцесазь вастова ёряф налхкшнень, ваныхть Настянять мельге.
Адрахманофне эряйхть кафта комната мархта квартираса. Полатне рамазь сонь васенце шабаснон шачемда меле. Эста теест максфоль субсидия, кода од семьянди. Но ня ярмакне ашесть сатне, сяс мирттне-рьвятне сявсть кредит. Мзярда шачсь нилеце шабасна, ипотечнай кредитсь пантфоль республиканскяй бюджетонь средстватнень вельде. Адрахманофненди тя арась оцю лезксокс, вдь паннемс кредитть лама идень семьяти аф тёждяль.
Тяни, мзярда семьясь ламода кассь, квартираса вастсь аф сатни. Сяс Адрахманофнень инь оцю арьсемасна—строямс эстеест оцю куд, коса эрть кармай сонцень уженяц.
Адрахманофнень мархта корхнемста шарьхкотьфоль:  тя семьяса азорондай кельгомась, фкя-фкянь шарьхкодемась. Полина Анатольевна аньцек шназь корхтай мирденц колга. Тяфтама пола ваксса, кле, пичетькшнемс аф сашендови, сон аф курендай, сяпиняти аф прафты. Андрей Владимирович аф нолатнень эзда, кярьмотькшни эрь кодама тевс, штоба шабанза улельхть аф лияда кальдявста щафт-каряфт, топодьстост. А сонць най рьванц эса шнашенды. Поляти, кле, тняра шабать мархта, шарьхкотьф, стака, но сон мзярдовок аф пеняцякшни, старандай, штоба кудоньке фалу улель лямбе, ванфневоль  шарьхкодемась, фкя-фкянь ужяльдемась.
Адрахманофне—Шкаенди верондай ломатть. Семьясь эряй Шкаень валть мархта, озондозь. Недляшиста иднек улендихть службаса. Андрей Владимирович и Полина Анатольевна старандайхть касфтомс шабаснон пара вайме ломанькс, тонафтсазь аф кирнемс кяж, лезнемс, кинди тя эряви.
—Аф шарьхкодьсаськ, мес оцю семьяса эряфть ламотне лувондсазь пяк стакакс,—мярьгсть мирттне-рьвятне.—Меколанкт, кудоньке пяшксе идень вайгяльда и тяда оцю паваз тейнек аш.
О.Евдокимова.